'ഖത്തർ 2022 ഒരു അനുഭവമാകും'

ദോഹ: ഖത്തറിലെ മുതിർന്ന സ്​പോർട്​സ്​ ജേണലിസ്​റ്റും 'ദി പെനിൻസുല' മുൻ സ്​പോർട്​സ്​ എഡിറ്ററും 'ദോഹ സ്​റ്റേഡിയം പ്ലസ്​' സ്​പോർട്​സ്​ വീക്​ലിയുടെ മുൻ മാനേജിങ്​ എഡിറ്റുമായ ഡി. രവികുമാർ ലോകകപ്പിലേക്കുള്ള ഖത്തറി​െൻറ ഒരുക്കങ്ങൾ 'ഗൾഫ്​ മാധ്യമ'വുമായി പങ്കുവെക്കുന്നു. തിരുവല്ല ഇരവിപേരൂർ സ്വദേശിയാണ്​ ഇദ്ദേഹം.

'ഖത്തർ 2022 ഒരു അനുഭവമാകും'

ഖത്തറി​െൻറ തയാറെടുപ്പിൽ ഞങ്ങൾ അഭിമാനിതരാണ്​. ഇത്രയും നേരത്തെ ഒരുക്കങ്ങൾ പൂർത്തിയായ മറ്റൊരു ആതിഥേയ രാജ്യവും ലോകകപ്പ്​ ചരിത്രത്തിൽ ഇല്ല. ഒട്ടനവധി ലോകകപ്പിൽ പ​ങ്കെടുത്തിട്ടുണ്ടെങ്കിലും ഖത്തറി​െൻറ ഒരുക്കം ഞങ്ങളെ വിസ്​മയിപ്പിക്കുന്നതാണ്​' -ഫിഫ പ്രസിഡൻറ്​ ജിയാനി ഇൻഫൻറിനോ നടത്തിയ പ്രഖ്യാപനം തന്നെയാണ്​ ഖത്തി​െൻറ ലോകകപ്പ്​ തയാറെടുപ്പിലെ പൊൻതൂവൽ. ഈ വർഷാവസാനം നടക്കുന്ന ഫിഫ അറബ്​ കപ്പ്​ പോരാട്ടം ​ലോകകപ്പി​െൻറ ഡ്രസ്​ റിഹേഴ്​സലായി മാറും. ​അപ്പോഴേക്കും ഏഴ്​ സ്​റ്റേഡിയങ്ങൾ മത്സരസജ്ജമാവും. ആറ്​ സ്​റ്റേഡിയങ്ങളിൽ അറബ്​ കപ്പ്​ പോരാട്ടം നടത്താണ്​ പദ്ധതി. ലോകകപ്പിനുള്ള 32 െട്രയ്​നിങ്​ സെൻററുകൾ തയാറായിക്കഴിഞ്ഞു. ഓരോ ടീമിനും ഒരു സെൻറർ എന്നനിലയിലാണ്​ തയാറാക്കിയത്​. രണ്ട്​ പിച്ചുകൾ ഓരോ സെൻററിലുമുണ്ട്​. മറ്റ്​ അടിസ്​ഥാന സൗകര്യങ്ങളിൽ ലോകോത്തര നിലവാരത്തിലാണ്​ പൂർത്തിയാക്കിയത്​. റോഡുകൾ, ഹോട്ടലുകൾ, പാർക്കുകൾ എന്നിവ ഏതാണ്ട്​ പൂർത്തിയായി.

അടുത്തഘട്ടം ഫാൻ എക്​സ്​പീരിയൻസ്​

ലോകകപ്പി​െൻറ അടിസ്​ഥാന സൗകര്യങ്ങൾ ഒരുവർഷം മു​േമ്പ ഒരുക്കുന്ന ഖത്തറി​െൻറ അടുത്ത ലക്ഷ്യം ഫാൻ എക്​സപീരിയൻസാണ്​. ലോകത്തി​െൻറ വിവിധ ഭാഗങ്ങളിലുള്ളവർക്ക്​ അറേബ്യയുടെ പാരമ്പര്യവും ഉൗഷ്​മളതയും ആതി​ഥ്യമര്യാദയും പരിചയപ്പെടുത്തുന്നതിലാവും ഇനി സംഘാടകരുടെ ​​ശ്രദ്ധ. അതി​െൻറ പ്രധാന ചുവടുവെപ്പാണ്​ കഴിഞ്ഞദിവസം പ്രഖ്യാപിച്ച ഫാൻ ലീഡേഴ്​സ്​ നെറ്റ്​വർക്​. ലോകത്തി​െൻറ വിവിധ ഭാഗങ്ങളിൽനിന്ന്​ തി​രഞ്ഞെടുക്കപ്പെടുന്ന 500ഓളം പേരുടെ ഈ സംഘം ലോകകപ്പിൽ ഖത്തറി​െൻറ അംബാസഡർമാരായി മാറും.

കോവിഡിനെയും തരണംചെയ്​തു

കോവിഡ്​ മഹാമാരി ഖത്തറി​െൻറ ഒരുക്കങ്ങളെ തെല്ലും ​ബാധിച്ചിട്ടില്ല. മറ്റിടങ്ങളിലെല്ലാം കളിമുടങ്ങിയപ്പോൾ കഴിഞ്ഞ സീസണിനിടെ വിവിധ ലീഗുകളിലും ടൂർണമെൻറുകളിലുമായി 150ഓളം മത്സരങ്ങൾക്കാണ്​ ഖത്തർ വേദിയായത്​. ക്ലബ്​ ലോകകപ്പും അറബ്​ യോഗ്യതാ റൗണ്ടും ലോകകപ്പ്​ യോഗ്യതാ റൗണ്ടും ഉൾപ്പെടെയുള്ള മത്സരങ്ങളാണിത്​. ബയോ സുരക്ഷാ ബബ്​ളിൽനിന്നുകൊണ്ടായിരുന്നു ഈ സംഘാടനം. ഇതിനിടയിൽ വളരെ കുറച്ച്​ കോവിഡ്​ പോസിറ്റിവ്​ കേസ്​ മാത്രമേ ഉണ്ടായുള്ളൂ. ലോകകപ്പ്​ സമയത്തും കോവിഡ്​ ഭീഷണി ഉയർത്തിയാലും താളംതെറ്റാതെ ​ടൂർണമെൻറ്​ നടത്താനുള്ള ആത്​മവിശ്വാസത്തിലാണ്​ സംഘാടകർ. വാക്​സിനേഷ​െൻറ തോതിലും രാജ്യം ഏറെ മുന്നിലാണ്​. നിലവിൽ 60 ശതമാനം ​ജനങ്ങൾ രണ്ട്​ ഡോസും സ്വീകരിച്ചുകഴിഞ്ഞു.

ഏഷ്യൻ ചാമ്പ്യന്മാരായി ആതിഥേയർ

ആതിഥേയർ എന്ന ആനുകൂല്യത്തിൽ അല്ല ഖത്തർ ലോകകപ്പിൽ കളിക്കുന്നത്​. നിലവിലെ ഏഷ്യൻ ചാമ്പ്യന്മാർ എന്ന തലയെടുപ്പ്​ ഖത്തറി​െൻറ ലോകകപ്പ്​ പോരാട്ടത്തിനുണ്ട്​. ഏറ്റവും മികച്ച ടീമിനെ തന്നെ ലോകകപ്പിൽ ഇറക്കാനുള്ള തയാറെടുപ്പിലാണ്​ ഖത്തർ ഫുട്​ബാൾ അസോസിയേഷൻ. കോച്ച്​ ഫെലിക്​സ്​ സാഞ്ചസിന്​ കീഴിൽ ടീം നിലവിൽ കോൺകകാഫ്​ ഗോൾഡ്​ കപ്പ്​ കളിക്കാനായി അമേരിക്കയിലാണ്​. ആദ്യ റൗണ്ടിൽ പുറത്താവാതെ, നോക്കൗട്ടിൽ മികച്ച മത്സരം കളിക്കാനുള്ള എല്ലാ ഒരുക്കത്തിലുമാണ്​ ഖത്തർ ഒരുങ്ങുന്നത്​.