ഇ-ഫുഡ്​ സേഫ്​റ്റിയുമായി ഖത്തർ

പ്രാദേശിക, ഇറക്കുമതി, കയറ്റുമതി ഉൽപന്നങ്ങളുടെ ഗുണമേന്മ പരിശോധന മുതൽ ഡോക്യുമെ​േൻറഷൻ വരെ ഇലക്​ട്രോണിക്​ സംവിധാനം വഴി

ദോഹ: രാജ്യത്തെ വിപണിയിൽ എത്തുന്നത്​ ഏറ്റവും സുരക്ഷിതമായ ഭക്ഷ്യവസ്​തുക്കൾ ആയിരിക്കണമെന്ന നിർബന്ധം ഖത്തറിനുണ്ട്​.

അതിന്​ ഏറ്റവും അത്യാധുനിക സംവിധാനങ്ങൾതന്നെ ഉപയോഗപ്പെടുത്തുകയാണ്​ ഖത്തർ. ആഭ്യന്തരമായി ഉല്‍പാദിപ്പിക്കുന്നതും ഇറക്കുമതി ചെയ്യുന്നതുമായ എല്ലാ ഭക്ഷ്യ ഉല്‍പന്നങ്ങളും ശാസ്ത്രീയമായ പരിശോധനകള്‍ക്കുശേഷം മാത്രം വിപണിയിലെത്തിക്കുകയെന്ന ലക്ഷ്യവുമായി ഇലക്​ട്രോണിക്​ ഭക്ഷ്യ സുരക്ഷാസംവിധാനം നടപ്പാക്കുന്നു. ആരോഗ്യ മന്ത്രാലയത്തിന്​ കീഴിലാണ്​ ഈ പദ്ധതി.ആരോഗ്യ മന്ത്രാലയത്തിന് കീഴിലെ വിവിധ വിഭാഗങ്ങള്‍, ജനറല്‍ അതോറിറ്റി ഓഫ് കസ്​റ്റംസ്, പൊതു–സ്വകാര്യ കമ്പനികള്‍ തുടങ്ങിയവയെ ബന്ധിപ്പിച്ചാണ് പൊതുജനാരോഗ്യ വകുപ്പ് പുതിയ ഇലക്ട്രോണിക് ഭക്ഷ്യസുരക്ഷ സംവിധാനം ആവിഷ്കരിച്ചത്.

പ്രാദേശിക ഉല്‍പന്നങ്ങള്‍, ഇറക്കുമതി, കയറ്റുമതി ഉല്‍പന്നങ്ങള്‍ തുടങ്ങി രാജ്യത്തെ മുഴുവന്‍ ഭക്ഷ്യവസ്തുക്കളുടെയും ഗുണമേന്മ കര്‍ശനവും നൂതനവുമായ ലബോറട്ടറി സംവിധാനങ്ങള്‍ വഴി ഉറപ്പുവരുത്തുന്നതാണ് പദ്ധതി. ഉടന്‍ ഈ സംവിധാനം പരീക്ഷണാടിസ്ഥാനത്തില്‍ നടപ്പാക്കുമെന്ന് ആരോഗ്യ വകുപ്പ് ഭക്ഷ്യസുരക്ഷ ഡയറക്ടര്‍ വസന്‍ അബ്​ദുല്ല അല്‍ ബാകിര്‍ അറിയിച്ചു.

ഹമദ് ഇൻറർനാഷനൽ എയർപോർട്ട്, ഹമദ്, റുവൈസ് തുറമുഖങ്ങള്‍ അബൂ സംറ കര അതിര്‍ത്തി എന്നിവിടങ്ങളിലൂടെ ഇറക്കുമതി ചെയ്യുന്നതും കയറ്റുമതി ചെയ്തതുമായ ഭക്ഷ്യവസ്തുക്കളുടെ ഇലക്ട്രോണിക് പരിശോധന, ഡോക്യുമെൻറ്​ പരിശോധന, വെർച്വൽ പരിശോധന തുടങ്ങിയവ പുതിയ സംവിധാനം വഴി കാര്യക്ഷമമാക്കുന്നു. കസ്​റ്റംസ് അതോറിറ്റിയുടെ അല്‍ നദീബ് ഇലക്ട്രോണിക് സിസ്​റ്റവുമായി ഇവയെ ബന്ധിപ്പിച്ചിട്ടുണ്ട്.

ഈ രംഗത്ത് പ്രവര്‍ത്തിക്കുന്ന കമ്പനികളുമായി വിശാലവും ഫലപ്രദവുമായ ആശയവിനിമയ സംവിധാനം സ്ഥാപിച്ചുകൊണ്ടാണ് സംവിധാനം രൂപപ്പെടുത്തിയത്.

പ്രാദേശികമായി നിര്‍മിക്കുന്ന ഭക്ഷണങ്ങൾ, ഫാക്ടറികൾ, റസ്​റ്റാറൻറുകൾ, ഹോട്ടലുകൾ, ഈ മേഖലയിലെ മറ്റ് സൗകര്യങ്ങൾ എന്നിവ പരിശോധിക്കുക, രേഖകൾ പരിശോധിക്കുക, ചെക്‌ലിസ്​റ്റുകൾ പൂരിപ്പിക്കുക, പരിശോധന റിപ്പോർട്ടുകൾ നൽകുക തുടങ്ങിയവയിലൂടെ ഈ സംവിധാനം കൃത്യമായി അപ്ഡേറ്റ് ചെയ്യും.

ഭക്ഷ്യവസ്തുക്കളുടെ പരിശോധനകൾക്കായി അത്യാധുനിക ഇലക്ട്രോണിക് ടാബ്‌ലെറ്റുകൾ ഉപയോഗിക്കുന്നതിനുപുറമെ, എല്ലാ സേവനങ്ങളും ശാസ്ത്രീയമായി അടിസ്ഥാനമാക്കിയുള്ള ഇലക്ട്രോണിക് പരിശോധനയിലേക്ക് മാറ്റുന്നതും പദ്ധതിയുടെ ഭാഗമാണ്. രാജ്യത്തെ 1983 കമ്പനികളും 1.63 ലക്ഷം ഉൽപന്നങ്ങളും രജിസ്​റ്റർ ചെയ്​തു കഴിഞ്ഞതായി ആരോഗ്യ മന്ത്രാലയം അറിയിച്ചു.