അന്താരാഷ്​ട്ര ആണവോർജ ഏജൻസിയുമായി ഇസ്രായേൽ സഹകരിക്കണമെന്ന്​ ഖത്തർ

ദോഹ: അന്താരാഷ്​ട്ര ആണവോർജ ഏജൻസിയുമായി ഇസ്രായേൽ സഹകരിക്കണമെന്നും തങ്ങളുടെ ആണവ റിയാക്ടറുകൾ ഏജൻസി പരിശോധകർക്കായി തുറന്നുനൽകണമെന്നും ഖത്തർ ആവശ്യപ്പെട്ടു. ഒാസ്​ട്രിയയിലെ ഖത്തർ അംബാസഡറും വിയന്നയിലെ യു.എൻ, അന്താരാഷ്​ട്ര സംഘടനകളിലെ ഖത്തർ സ്​ഥിരം പ്രതിനിധിയുമായ അംബാസഡർ സുൽതാൻ ബിൻ സൽമീൻ അൽ മൻസൂരിയാണ്​ ഇക്കാര്യം പറഞ്ഞത്​. ഇസ്രായേലിെൻറ ആണവശേഷി സംബന്ധിച്ച് വിയന്നയിൽ നടന്ന അന്താരാഷ്​ട്ര ആണവോർജ ഏജൻസി ബോർഡ് ഓഫ് ഗവേണേസ്​ യോഗത്തിൽ സംസാരിക്കുകയായിരുന്നു അദ്ദേഹം.

അന്താരാഷ്​ട്ര ബന്ധങ്ങളിൽ നിയമം നടപ്പിലാക്കുന്നതിനെ ഖത്തർ ശക്തമായി തന്നെ പിന്തുണക്കുന്നുണ്ട്​. സമാധാനപരവും സ്​ ഥിരതയുള്ളതുമായ ഒരു അന്താരാഷ്​ട്ര സാഹചര്യം രൂപപ്പെടുത്തുകയാണ് ലക്ഷ്യം. എല്ലാ ജനങ്ങളിലേക്കും സുസ്​ഥിര വികസനത്തിനുള്ള അവസരങ്ങൾ ഇത് കൂടുതൽ സാധ്യമാക്കും. അന്താരാഷ്​ട്ര കരാറുകൾക്കും ഐക്യരാഷ്​ട്രസഭ പ്രമേയങ്ങൾക്കും അനുസൃതമായി ആണവ നിരായുധീകരണം എന്നതുകൊണ്ട് പ്രധാനമായും അർഥമാക്കുന്നത് അന്താരാഷ്​ട്ര ബന്ധങ്ങളിൽ നിയമം നടപ്പിലാക്കുന്നത് ഉയർത്തിപ്പിടിക്കുകയാണെന്നതാണ്​.

ഖത്തറടക്കമുള്ള എല്ലാ അറബ് രാഷ്​ട്രങ്ങളും ആണവായുധം കൈവശംവെക്കുന്നത് തടയുന്നതിനുള്ള കരാറിൽ ചേർന്നിട്ടുണ്ട്​. മിഡിലീസ്​റ്റിനെ ആണവായുധ രഹിത മേഖലയാക്കുന്നതിനുള്ള മുഴുവൻ അന്താരാഷ്​ട്ര പ്രമേയങ്ങളും ഇവരെല്ലാം അംഗീകരിച്ചിട്ടുണ്ട്​. എന്നാൽ, ഇസ്രായേൽ ഈ ശ്രമങ്ങളിൽനിന്ന്​ മുഖംതിരിക്കുകയാണെന്നും അൽ മൻസൂരി വ്യക്തമാക്കി. ഫലസ്​തീൻ ജനതക്കെതിരായ ഇസ്രായേലിെൻറ സമീപനവും അന്താരാഷ്​ട്രനിയമങ്ങൾ പാലിക്കുന്നതിലെ ഇസ്രായേൽ വിമുഖതയും ഫലസ്​തീനികൾക്കെതിരായി ഇസ്രായേൽ എല്ലാതരം ആയുധങ്ങളും ഉപയോഗിക്കുന്നതും അദ്ദേഹം സംസാരത്തിനിടെ ചൂണ്ടിക്കാട്ടി.

സത്യത്തെ മനഃപൂർവം മൂടിക്കളയുന്ന പ്രസംഗങ്ങൾ ഇസ്രായേൽ തുടരരുത്​. ഇസ്രായേലിെൻറ ആണവായുധശേഷിയെ വെളിപ്പെടുത്തുന്ന യാഥാർഥ്യങ്ങളിൽനിന്ന് മറുപടിപറയാതെ ഒഴിഞ്ഞുമാറരുതെന്നും ബോർഡിലെ ഇസ്രായേൽ പ്രതിനിധിയോട് അൽ മൻസൂരി ആവശ്യപ്പെട്ടു. ആണവോർജശേഷിയുമായി ബന്ധപ്പെട്ട് ഏജൻസിയോട് സഹകരിക്കാൻ ഇസ്രായേലിന് ബാധ്യതയുണ്ട്​. പരിശോധകർക്കായി റിയാക്ടറുകൾ തുറന്നുകൊടുക്കുകയാണ്​ വേണ്ടത്​. മധ്യപൗരസ്​ത്യദേശത്ത് നിന്നും ആണവായുധങ്ങൾ ഇല്ലാതാക്കുന്നതിന് അന്താരാഷ്​ട്ര സമൂഹവും ബന്ധപ്പെട്ട ഏജൻസികളും ശ്രമിക്കണമെന്നും പ്രായോഗിക നടപടികളുമായി മുന്നോട്ടുവരണമെന്നും അദ്ദേഹം വ്യക്തമാക്കി.