ഖത്തർ ഇന്ന്​ പോർചുഗലിനെതിരെ

ദോഹ: ലോകകപ്പിനൊരുങ്ങുന്ന ഖത്തറിന്​ ഏറ്റവും വലിയ അഗ്​നി പരീക്ഷയാണ്​ കാത്തിരിക്കുന്നത്​.

മികച്ച എതിരാളികളെ തേടി യൂറോപ്പിലേക്ക്​ പറന്ന ഫെലിക്​സ്​ സാഞ്ചസിന്​ ഇതിനേക്കാൾ മികച്ചൊരു എതിരാളിയെ വേറെ കിട്ടാനുണ്ടാവില്ല. സാക്ഷാൽ ക്രിസ്​റ്റ്യാനോ റൊണാൾഡോയുടെ പോർചുഗൽ. ശനിയാഴ്​ച ഖത്തർ സമയം രാത്രി 7.45ന്​ ഹംഗറിയിലെ ഡ്രെബ്രിസിനിലാണ്​ മത്സരം. ​ബുധനാഴ്​ച രാത്രിയിലെ പോരാട്ടത്തിൽ സെർബിയയോട്​ മറുപടിയില്ലാത്ത നാല്​ ഗോളിന്​ തോറ്റെങ്കിലും കരുത്തരായ എതിരാളിയോട്​ ഏറ്റുമുട്ടി ഏറെ പാഠങ്ങളുമായാണ്​ ഖത്തർ അടുത്ത അങ്കത്തിനിറങ്ങുന്നത്​. ഗോൾ കീപ്പിങ്ങിൽ സാദ്​ അൽ ഷീബ്​​ മുതൽ ​മുന്നേറ്റത്തിൽ അൽമുഈസ്​ അലിയും ഹസൻ ഹൈദോസ്​ വരെയുള്ള മുൻനിരതാരങ്ങൾ ഏറെ പരീക്ഷിക്ക​പ്പെട്ടു.

എന്നാൽ, ആ സെർബിയയേക്കാൾ കരുത്തരാണ്​ ശനിയാഴ്​ചത്തെ എതിരാളി പോർചുഗൽ. ഫിഫ റാങ്കിങ്ങിൽ എട്ടാം സ്​ഥാനക്കാർ. മുൻ യൂറോപ്യൻ ചാമ്പ്യന്മാർ. ക്രിസ്​റ്റ്യാനോ റൊണാൾഡോ മുതൽ ഡീഗോ ജോട്ട, ബ്രൂണോ ഫെർണാണ്ടസ്​, റൂബൻ ഡയസ്​, പെപെ, റുയി പ്രാട്രിഷ്യോ തുടങ്ങി ലോക ഫുട്​ബാളിലെ സൂപ്പർ താരങ്ങളാണ്​ മറുപാതിയിൽ. അതേസമയം, ബുധനാഴ്​ച നടന്ന യൂറോപ്യൻ യോഗ്യത റൗണ്ടിൽ അയർലൻഡിനെ തോൽപിച്ച ടീമിൽ നിന്നും അടിമുടി മാറ്റങ്ങളുമായാവും കോച്ച്​ ഫെർണാണ്ടോ സാ​േൻറാസ്​ ഖത്തറിനെതിരെ ടീമിനെ ഇറക്കുക. എങ്കിലും, പോർചുഗലിന്‍റെ റിസർവ്​ ബെഞ്ചിനുമുണ്ട്​ ലോകനിലവാരം. ക്രിസ്​റ്റ്യാനോ റൊണാൾഡോ കളിക്കാനിടയില്ലെന്നാണ്​ ടീം ക്യാമ്പിലെ റിപ്പോർട്ടുകൾ. ദേശീയ ടീമിൽ അരങ്ങേറ്റം കാത്തിരിക്കുന്ന ​ഒറ്റാവിയോ, ഗോളി ​ഡീഗോ കോസ്​റ്റ എന്നിവർക്കൊപ്പം, നെൽസൺ സെമിഡോ, റൂബൻ നെവസ്​, ജോ മൗടീന്യോ എന്നിവരാവും ​െപ്ലയിങ്​ ഇലവനിൽ. പരിചയ സമ്പന്നനായ ആന്ദ്രെ സിൽവയാവും ക്രിസ്​റ്റ്യനോയുടെ റോളിൽ. കൂട്ടായി ഗോൺസാലോ ഗ്യൂഡസിനെയും പ്രതീക്ഷിക്കാം.

പോർചുഗലിനെതിരെ ഖത്തറിന്‍റെ ആദ്യ മത്സരം കൂടിയാണിത്​. ഒക്​ടോബർ ഒമ്പതിന്​ വീണ്ടും ഏറ്റുമുട്ടും.