ഖത്തറിലെ സർക്കാർ, സ്വകാര്യ സ്​കൂളുകൾ തുറക്കുക മൂന്ന് ഘട്ടങ്ങളിലായി

ദോഹ: 2020-21 അധ്യായന വർഷത്തിലേക്ക് രാജ്യത്തെ സർക്കാർ, സ്വകാര്യ സ്​കൂളുകളും വിദ്യാഭ്യാസ സ്​ഥാപനങ്ങളും സെപ്റ്റംബർ ഒന്നിന് തുറന്നുപ്രവർത്തക്കും. മൂന്ന് ഘട്ടങ്ങളിലായാണ് വിദ്യാഭ്യാസ സ്​ഥാപനങ്ങൾ തുറക്കുകയെന്ന്  വിദ്യാഭ്യാസ ഉന്നത വിദ്യാഭ്യാസ മന്ത്രാലയം വ്യക്തമാക്കി.

ഒന്നാം ഘട്ടം: സ്​കൂളുകൾ തുറക്കുന്ന ദിവസമായ സെപ്തംബർ 1 മുതൽ 3 വരെ സ്​കൂളുകളിലെത്തുന്ന വിദ്യാർഥികളുടെ  എണ്ണം മൂന്നിലൊന്ന് ആയിരിക്കണം. ഇത് സംബന്ധിച്ച് എജ്യുക്കേഷണൽ അഫേഴ്സ്​ ആൻഡ് സ്​പെഷ്യൽ എജ്യുക്കേഷൻ  വകുപ്പ് രാജ്യത്തെ സർക്കാർ, സ്വകാര്യ സ്​കൂളുകൾക്കും കിൻറർഗാർട്ടനുകൾക്കും മാർഗനിർദേശം അയച്ചിട്ടുണ്ട്. സ്​കൂളുകളിലെത്തുന്ന വിദ്യാർഥികളുടെ എണ്ണം എങ്ങനെ നിയന്ത്രിക്കാം എന്നതുൾപ്പെടെയുള്ള നിർദേശങ്ങളാണ്  അയച്ചിരിക്കുന്നത്.

രണ്ടാം ഘട്ടം: സെപ്റ്റംബർ 6 മുതൽ 17 വരെയുള്ള രണ്ടാഴ്ച കാലയളവിൽ സ്​കൂളുകളിലെയും കിൻറർഗാർട്ടനുകളിലെയും വിദ്യാർഥികളുടെ എണ്ണം 50 ശതമാനത്തിൽ അധികമാകരുത്. ഈ കാലയളവിൽ ആദ്യത്തെ ആഴ്ച 50 ശതമാനം  വിദ്യാർഥികളും രണ്ടാമത്തെ ആഴ്ച ബാക്കി വരുന്ന 50 ശതമാനം വിദ്യാർഥികളുമാണ് സ്​കൂളുകളിലെത്തേണ്ടത്. സ്​ കൂളുകളിലെത്താൻ കഴിയാത്ത വിദ്യാർഥികൾക്ക് ഒാൺലൈൻ ക്ലാസ്​ ലഭ്യമാക്കും.

മൂന്നാം ഘട്ടം: സെപ്റ്റംബർ 20 മുതൽ സർക്കാർ, സ്വകാര്യ സ്​കൂളുകളിലും കിൻറർഗാർട്ടനുകളിലും മുഴുവൻ വിദ്യാർഥികളും എത്തുന്ന ഘട്ടമാണിത്. വിദ്യാഭ്യാസ ഉന്നത വിദ്യാഭ്യാസ മന്ത്രാലയത്തിലെ ആരോഗ്യ സുരക്ഷാ വകുപ്പി​െൻറയും പൊതുജനാരോഗ്യ മന്ത്രാലയത്തി​െൻറയും നിർദേശങ്ങൾക്ക് അനുസൃതമായി എല്ലാ സുരക്ഷാ മുൻകരുതൽ നടപടികളും സ്വീകരിച്ചായിരിക്കണം വിദ്യാർഥികൾ സ്​കൂളുകളിലെത്തേണ്ടത്.

വിദ്യാർഥികൾക്കിടയിലും രക്ഷിതാക്കൾ, അധ്യാപക, അഡ്മിൻ ജീവനക്കാർക്കിടയിലും നിലവിലെ സാഹചര്യം സംബന്ധിച്ച് ബോധവൽകരണം ശക്തമാക്കുകയാണ് ലക്ഷ്യമെന്ന് മന്ത്രാലയത്തിലെ വിദ്യാഭ്യാസകാര്യ അസി. അണ്ടർ സെക്രട്ടറി  ഫൗസിയ അൽ ഖാതിർ പറഞ്ഞു. വിദ്യാഭ്യാസ പ്രക്രിയകൾക്ക് തടസ്സം സൃഷ്​ടിക്കാതെ വിദ്യാർഥികൾക്കും ജീവനക്കാർക്കും  ഇടയിൽ സാമൂഹിക അകലം പാലിക്കുക, ആരോഗ്യ സുരക്ഷ ഉറപ്പാക്കുക എന്നിവ സംബന്ധിച്ചും ബോധവൽകരണം നടത്തുമെന്നും അവർ പറഞ്ഞു.