ഖത്തർ ഉപരോധം തീർന്നു; 'അൽ ഉല' അന്തിമപ്രഖ്യാപനം ചൊവ്വാഴ്​ച

ദോഹ: നാലാം വർഷത്തിലേക്ക്​ കടന്ന ഖത്തർ ഉപരോധം തീരുന്നു. ഇതുസംബന്ധിച്ച കരാർ ഒപ്പിടലും അന്തിമപ്രഖ്യാപനവും ഇന്ന്​ സൗദിയിൽ നടക്കുന്ന ജി.സി.സി ഉച്ചകോടിയിൽ ഉണ്ടാകും. 'അൽ ഉല' പ്രഖ്യാപനം എന്നായിരിക്കും ഇത്​ അറിയപ്പെടുക. ഉച്ചകോടി നടക്കുന്ന സൗദിയിലെ സ്​ഥലമാണ്​ അൽ ഉല.

2017 ജൂണിലാണ്​ സൗദി, യു.എ.ഇ, ബഹ്റൈൻ, ഈജിപ്​ത് രാജ്യങ്ങൾ ഖത്തറിനെതിരെ കരവ്യോമകടൽ ഉപരോധം തുടങ്ങിയത്​. ഗൾഫ്​മേഖലയിൽ ഏറെ അസ്വാരസ്യങ്ങൾക്കും വേദനകൾക്കും ഇടവെച്ച ഉപരോധത്തിനാണ്​ ചൊവ്വാഴ്​ചയോടെ പരിഹാരമാകുന്നത്​.

ഇന്നലെ രാത്രി തന്നെ സൗദി അതിർത്തിയായ അബൂ സംറ തുറന്നിരുന്നു. ബാരിക്കേഡുകൾ അടക്കം എടുത്തുമാറ്റിയിട്ടുണ്ട്​. കുവൈത്ത്​ അമീർ, ഖത്തർ അമീറുമായും സൗദി കിരീടാവകാശിയുമായും രണ്ട്​ തവണ ഇക്കാര്യം സംബന്ധിച്ച്​ ഫോണിൽ സംസാരിച്ചതിന്​ ശേഷമാണ്​ അന്തിമതീരുമാനത്തിലേക്കെത്തിയത്​. അൽ ഉല പ്രഖ്യാപനത്തിൽ ഇരുരാഷ്​ട്രത്തലവൻമാരും ഒപ്പിടുന്നതുസംബന്ധിച്ചും കുവൈത്ത്​ അമീർ ഇരുവരോടും സംസാരിച്ചിരുന്നു. ഇരുരാജ്യങ്ങളുടെയും കരവ്യോമകടൽ അതിർത്തികൾ തുറക്കുക എന്നതാണ്​ കരാർ.

തുടക്കം മുതലേ കുവൈത്തിൻെറ മധ്യസ്​ഥതയിൽ നടക്കുന്ന ശ്രമങ്ങളാണ്​ വിജയത്തിൽ എത്തിയിരിക്കുന്നത്. ​ട്രംപിൻെറ മുതിർന്ന ഉപദേശകൻ ജാരദ്​ കുഷ്​നർ അടുത്തിടെ നടത്തിയ ജി.സി.സി സന്ദർശനത്തോടെയാണ്​ ​പരിഹാരനടപടികൾ ത്വരിതഗതിയിലായത്​. അധികാരമൊഴിയുന്നതിന്​ മു​േമ്പ പ്രതിസന്ധി പരിഹരിച്ച്​ തങ്ങളുടെയും ഇസ്രായേലിൻെറയും ഇറാൻ വിരുദ്ധ നിലപാടുകൾക്ക്​ കൂടുതൽ സാഹചര്യമൊരുക്കുകയാണ്​ യു.എസ്​ പ്രസിഡൻറ്​ ഡോണൾഡ്​ ട്രംപ്​ ലക്ഷ്യമിടുന്നത്​.

ഉപരോധവുമായി ബന്ധപ്പെട്ട രാജ്യങ്ങൾ അമേരിക്കയുടെ സഖ്യകക്ഷികളാണ്​. ഖത്തറിലാണ്​ മേഖലയിലെ ഏറ്റവും വലിയ അമേരിക്കൻ സൈനിക താവളമുള്ളത്​. യു.എസ്​ നേവിയുടെ അഞ്ചാമത്​ ഫ്ലീറ്റ്​ ബഹ്​റൈൻ ആസ്​ഥാനമാക്കിയാണ്​ പ്രവർത്തിക്കുന്നത്​. സൗദിയിലും യു.എ.ഇ.യിലും യു.എസ്​ താവളങ്ങളുണ്ട്​. ഗൾഫ്​പ്രതിസന്ധി പരിഹരിക്കുന്നതിനുള്ള ശ്രമങ്ങളെ കഴിഞ്ഞ ദിവസം യു.എ.ഇയും പിന്തുണച്ചിരുന്നു. സൗദി, ഒമാൻ, ഖത്തർ രാജ്യങ്ങൾ പരിഹാരനടപടികൾ നേരത്തേ സ്വാഗതം ചെയ്​തിട്ടുണ്ട്​.

പരിഹാരശ്രമങ്ങൾക്ക്​ മിക്ക രാജ്യങ്ങളും നേരത്തേ തന്നെ പിന്തുണയറിയിച്ചിട്ടുണ്ട്​. കുവൈത്ത്​ നടത്തുന്ന ശ്രമങ്ങളിലൂടെ സമഗ്രഹമായ പ്രശ്​നപരിഹാരം ഉണ്ടാകുമെന്നാണ്​​ ഈജിപ്​ത്​ വിദേശകാര്യമന്ത്രാലയം അറിയിച്ചത്. പരിഹാരശ്രമങ്ങളെ യു.എ.ഇയും നേരത്തേ പിന്തുണച്ചിട്ടുണ്ട്​.

ഉപരോധം അവസാനിപ്പിക്കുന്നതിനുള്ള കരാർ ഉടൻ ഉണ്ടാകുമെന്ന്​​​ സൗദി വിദേശകാര്യ മന്ത്രി പ്രിൻസ്​ ഫൈസൽ ബിൻ ഫർഹാനും പറഞ്ഞിരുന്നു. ഇക്കാര്യത്തിൽ മധ്യസ്​ഥത വഹിക്കുന്ന കുവൈത്തിൻെറ ശ്രമങ്ങളെയും അദ്ദേഹം അഭിനന്ദിച്ചിരുന്നു. പരിഹാരശ്രമങ്ങൾ ഫലപ്രാപ്​തിയിൽ എത്തുകയാണെന്ന്​ കുവൈത്ത്​ വിദേശകാര്യമന്ത്രി ശൈഖ്​ അഹ്​മദ്​ നാസർ അൽ സബാഹും ഖത്തർ വിദേശകാര്യമന്ത്രിയും ഉപപ്രധാനമന്ത്രിയുമായ ശൈഖ്​ മുഹമ്മദ്​ ബിൻ അബ്​ദുറഹ്​മാൻ ആൽഥാനിയും പറഞ്ഞിരുന്നു. പരിഹാരനടപടികൾ ഒമാൻ വിദേശകാര്യ മന്ത്രി സയ്യിദ്​ ബദർ ബിൻ ഹമദ്​ ബിൻ ഹമൂദ്​ അൽ ബുസൈദിയും സ്വാഗതം ചെയ്​ തിട്ടുണ്ട്​.

ഖത്തർ ഒൗദ്യോഗിക വാർത്താ ഏജൻസിയായ ക്യു.എൻ.എയുടെ വെബ്​സൈറ്റ്​ തകർത്ത്​ ഖത്തർ അമീറി​െൻറ പേരിൽ തെറ്റായ പ്രസ്​താവന ഉൾപ്പെടുത്തി പ്രചരിപ്പിച്ചായിരുന്നു ഉപരോധം തുടങ്ങിയത്​. എന്നാൽ കുപ്രചാരണമാണ്​ അമീറിനെതിരെ നടക്കുന്നതെന്നും ഇതിൽ നിന്ന്​ വിട്ടുനിൽക്കണമെന്നും ഖത്തർ ഒൗദ്യോഗികമായി അറിയിച്ചിരുന്നു.

അൽജസീറ ചാനൽ അടച്ചുപൂട്ടുക, ഇറാനുമായുള്ള ബന്ധം അവസാനിപ്പിക്കുക, ഖത്തറിലെ തുർക്കി സൈനിക താവളം അടക്കുക തുടങ്ങിയ 13 ഇന ആവശ്യങ്ങൾ അംഗീകരിക്കുക എന്നതായിരുന്നു ഉപരോധം അവസാനിപ്പിക്കാനുള്ള നിബന്ധനകളായി ഉപരോധ രാജ്യങ്ങൾ പറഞ്ഞിരുന്നത്​. എന്നാൽ ഉപാധികളില്ലാത്ത, രാജ്യത്തിൻെറ പരമാധികാരം മാനിക്കുന്ന ഏത്​ തരം ചർച്ചകൾക്കും ഒരുക്കമാണെന്നാണ്​ ഖത്തറിൻെറ തുടക്കം മുതലുള്ള നിലപാട്​.

ഗൾഫ്​ പ്രതിസന്ധി പരിഹരിക്കാനുള്ള അന്തിമതീരുമാനം ജി.സി.സി ഉച്ചകോടി എടുക്കുമെന്നപ്രതീക്ഷയാണ്​ കഴിഞ്ഞ ആഴ്​ചകളിൽ ഉണ്ടായിരുന്നത്​. പരിഹാരവഴികളിൽ ഒരു തടസവുമി​െല്ലന്ന്​ ഖത്തർ വിദേശകാര്യമന്ത്രിയും ഉപപ്രധാനമന്ത്രിയുമായ ശൈഖ്​ മുഹമ്മദ്​ ബിൻ അബ്​ദുറഹ്​മാൻ ആൽഥാനി കഴിഞ്ഞ ദിവസം പറഞ്ഞിരുന്നു. ഇതാണ്​ ഇപ്പോൾ അന്തിമതീരുമാനത്തിൽ എത്തിയിരിക്കുന്നത്​