വെള്ളിയാഴ്​ചത്തെ 'ഖത്തർ റൺ 2021' മാറ്റിവെച്ചു

ദോഹ: വെള്ളിയാഴ്​ച ആസ്​പെയർ പാർക്കിൽ നടക്കേണ്ടിയിരുന്ന 'ഗൾഫ്​മാധ്യമം ഖത്തർ റൺ 2021' മാറ്റിവെച്ചു. രാജ്യത്ത്​ കോവിഡ്​ നിയന്ത്രണങ്ങൾ പുനസ്​ഥാപിച്ചതിനാലും പുറത്തുനടക്കുന്ന പരിപാടികൾക്ക്​ നിയന്ത്രണം വന്നതിനാലുമാണ് തീരുമാനം. ഖത്തർ റണിൻെറ പുതിയ തീയതി പിന്നീട്​ അറിയിക്കും. ഇതുമായി ബന്ധപ്പെട്ട അറിയിപ്പ്​ മൽസരാർഥികൾക്ക്​ കഴിഞ്ഞദിവസം തന്നെ അയച്ചിട്ടുണ്ട്​.

വിവിധ ദേശക്കാർ, ഭാഷക്കാർ...സ്വദേശികളും വിദേശികളും...സ്​ത്രീകളും കുട്ടികളും... തുടങ്ങി നിരവധിപേരാണ്​ പരിപാടിയിൽ പ​ങ്കെടുക്കാൻ ഇതിനകം രജിസ്​റ്റർ ചെയ്​തിരിക്കുന്നത്​. ഇവർക്കുള്ള ജഴ്​സിയുടെയും മറ്റും വിതരണം കഴിഞ്ഞ ദിവസം ഗൾഫ്​മാധ്യമം ഓഫിസിൽ നടന്നു. ദേശീയകായികദിനത്തോടനുബന്ധിച്ചാണ് 'നല്ല ആരോഗ്യത്തിലേക്ക്​' എന്ന സന്ദേശവുമായി​ 'ഖത്തർ റൺ 2021' ആസൂത്രണം ചെയ്​തിരുന്നത്​. ​

വെള്ളിയാഴ്​ച രാവിലെ 6.30ന്​ ദോഹ ആസ്​പെയർ പാർക്കിൽ നടത്താനിരുന്ന പരിപാടി ബുധനാഴ്​ച വൈകുന്നേരം രാജ്യത്ത്​ കോവിഡ്​ നിയന്ത്രണങ്ങൾ പുനസ്​ഥാപിച്ചതിനാൽ മാറ്റിവെക്കുകയായിരുന്നു. നിയന്ത്രണങ്ങൾ നീങ്ങി സാഹചര്യം അനുകൂലമാകുന്നയുടൻ പരിപാടി മുൻനിശ്​ചയിച്ചപോലെ നടക്കുമെന്നും സംഘാടകസമിതി അറിയിച്ചു. ഗ്രാൻറ്​മാൾ ഹൈപ്പർമാർക്കറ്റാണ്​ മുഖ്യ​പ്രായോജകർ.

ഇന്ത്യ, ഖത്തർ, ബ്രിട്ടൻ, യു.എസ്​.എ, യുക്രൈൻ, ന്യുസിലാൻറ്​, ഫിലിപ്പീൻസ്​, ടുണീഷ്യ, ജർമനി, റഷ്യ, പാകിസ്​താൻ, ഫ്രാൻസ്​ തുടങ്ങിയ വിവിധ രാജ്യക്കാരാണ്​ പ​ങ്കെടുക്കുക. ഇത്​ രണ്ടാം തവണയാണ്​ ഖത്തർ റൺ നടത്തുന്നത്​. അൽബിദ പാർക്കിൽ കഴിഞ്ഞ വർഷം നടന്ന ആദ്യഎഡിഷൻ വൻവിജയമായിരുന്നു.

പത്ത്​ കിലോമീറ്റർ, അഞ്ച്​ കിലോമീറ്റർ, മൂന്ന്​ കിലോമീറ്റർ വിഭാഗങ്ങളിലായാണ്​ മൽസരം.

പത്ത്​ കിലോമീറ്റർ, അഞ്ച്​ കിലോമീറ്റർ വിഭാഗത്തിൽ പുരുഷൻമാർക്കും സ്​ത്രീകൾക്കും വെവ്വേറെയാണ്​ മൽസരം. ജൂനിയർ വിഭാഗത്തിൽ​ മൂന്നുകിലോമീറ്ററിലാണ്​ മൽസരം. ഏഴ്​ വയസുമുതൽ 15​ വയസുവരെയുള്ളവർക്ക്​ പ​ങ്കെടുക്കാം. ആൺകുട്ടികൾക്കും പെൺകുട്ടികൾക്കും ​വെവ്വേറെയാണ്​ മൽസരം. ഏഴ്​ മുതൽ പത്ത്​ വയസുവരെയുള്ളവർക്ക്​ ​ൈപ്രമറി വിഭാഗത്തിലും 11 വയസുമുതൽ 15 വയസുവരെയുള്ളവർ സെകൻഡറി വിഭാഗത്തിലുമാണ്​ മൽസരിക്കുക. എല്ലാ വിഭാഗത്തിലും ആദ്യ മൂന്നുസ്​ ഥാനത്തെത്തുന്നവരെ ഗംഭീര സമ്മാനങ്ങളാണ്​ കാത്തിരിക്കുന്നത്​. വിവരങ്ങൾക്ക്​ 55373946, 66742974 എന്നീ നമ്പറുകളിൽ വിളിക്കാം.​ 'ഖത്തർ റൺ 2021'ൻെറ ജഴ്​സി ഉക്രൈൻ സ്വദേശിയും കായികതാരവുമായ ടിഷ്യാന പിഡോറിന കഴിഞ്ഞ ദിവസം പ്രകാശനം ചെയ്​തിരുന്നു. കഴിഞ്ഞ വർഷത്തെ ഖത്തർ റണിലെ അഞ്ച്​ കിലോമീറ്റർ വനിതാവിഭഗത്തിലെ ഒന്നാംസ്​ ഥാനക്കാരിയാണ്​ ടിഷ്യാന.