വ്യാജ സ്​കോളർഷിപ്: മുന്നറിയിപ്പുമായി അമേരിക്കൻ എംബസിയും

ദോഹ: വ്യാജ സ്​കോളർഷിപ്പുമായി ബന്ധപ്പെട്ട് ജാഗ്രത പാലിക്കണമെന്ന് ഖത്തറിലെ അമേരിക്കൻ എംബസിയും മുന്നറിയിപ്പുമായി രംഗത്ത്. വിവിധ രാജ്യങ്ങളിലെ ഖത്തർ എംബസികളുമായും അമേരിക്കൻ എംബസികളുമായും ചേർന്ന് പ്രവർത്തിക്കുകയാണ്​ തങ്ങളെന്ന വ്യാജ അവകാശവാദവുമായാണ് ചിലർ തട്ടിപ്പ് നടത്തുന്നത്​. വിദ്യാഭ്യാസ അവസരങ്ങളും നിയമ സഹായവും വാഗ്ദാനം ചെയ്ത് പണം ആവശ്യപ്പെടുന്നുണ്ടെന്നും ജാഗ്രത പാലിക്കണമെന്നും അമേരിക്കൻ എംബസി അറിയിച്ചു. ഒരു അമേരിക്കൻ സർക്കാർ സ്​ഥാപനമോ ഖത്തറിലെ അമേരിക്കൻ എംബസിയോ വിദ്യാഭ്യാസ സേവനങ്ങൾക്കും നിയമസഹായത്തിനുമായി പണം ആവശ്യപ്പെടുന്നില്ല.

ഖത്തറിലുള്ള എല്ലാവർക്കും അമേരിക്കയിലെ ഉപരിപഠനം സംബന്ധിച്ച് സൗജന്യ മാർഗനിർദേശം എജുക്കേഷൻ യു.എസ്​.എ ദോഹ (doha@educationusa.org) നൽകുന്നുണ്ടെന്നും എംബസി പറഞ്ഞു. ഇത്തരം തട്ടിപ്പുകൾക്കെതിരെ ജാഗ്രതയോടെ നിലകൊള്ളണം. പണം ആവശ്യപ്പെട്ടു കൊണ്ടും നിങ്ങൾ എഫ്.ബി.ഐയുടെ നിരീക്ഷണത്തിലാണെന്നും പറഞ്ഞ് ഫോൺ കോളോ ഇ–മെയിലോ വന്നാൽ ആഭ്യന്തര മന്ത്രാലയത്തെയോ സൈബർ ൈക്രം കോമ്പറ്റിങ്​ സ​െൻററിനെയോ 66815757 നമ്പറിലോ cccc@moi.gov.qa എന്ന വിലാസത്തിലോ ബന്ധപ്പെടണമെന്നും എംബസി അറിയിച്ചു.