ഇൻഡസ്​ട്രിയൽ ഏരിയ: പോക്കുവരവിന്​ ഇനി പ്രത്യേക അനുമതി വേണ്ട

ദോഹ: കോവിഡ്-19 നിയന്ത്രണങ്ങൾ നീക്കുന്നതി​െൻറ ഭാഗമായി ഇൻഡസ്​ട്രിയൽ ഏരിയയിലേക്ക് പ്രവേശിക്കാനും  പുറത്തിറങ്ങാനും ഇനി മുതൽ അനുമതി പത്രത്തി​െൻറ ആവശ്യമില്ലെന്ന് ഖത്തർ ഗവൺമ​െൻറ് കമ്യൂണിക്കേഷൻ ഓഫിസ്​ അറിയിച്ചു. അതേസമയം, ബസുകളിലെ ആളുകളുടെ എണ്ണവും മാസ്​ക് ധരിച്ചെന്ന് ഉറപ്പുവരുത്താനും ഇഹ്തിറാസ്​ ആപ് പരിശോധിക്കാനുമുള്ള പ്രവേശന കേന്ദ്രങ്ങളിലെ ചെക്ക് പോയിൻറുകളുടെ പ്രവർത്തനം തുടരും.
കോവിഡ് വ്യാപനത്തെ തുടർന്നാണ് ഇൻഡസ്​ട്രിയൽ ഏരിയയിൽ കർശന നിയന്ത്രണങ്ങൾ ഏർപ്പെടുത്താൻ ദേശീയ ദുരന്തനിവാരണ ഉന്നതാധികാര സമിതി തീരുമാനിച്ചത്. ആയിരക്കണക്കിനാളുകളാണ് ഏരിയയിൽ മാത്രം പരിശോധനക്ക് വിധേയമായത്.

രോഗബാധ സ്​ഥിരീകരിക്കുകയും സംശയിക്കപ്പെടുകയും ചെയ്ത 6500ലധികം പേരെ  രാജ്യത്തി​െൻറ വിവിധ ഭാഗങ്ങളിലായി സ്​ഥാപിച്ച സമ്പർക്ക വിലക്ക് കേന്ദ്രങ്ങളിലേക്ക് മാറ്റിപ്പാർപ്പിച്ചതോടൊപ്പം മികച്ച  ചികിത്സ ഉറപ്പാക്കുകയും ചെയ്തു.കടുത്ത നിയന്ത്രണങ്ങൾക്കൊടുവിൽ കോവിഡ് വ്യാപനം തടയുന്നതിൽ ലക്ഷ്യം കാണാൻ തുടങ്ങിയതോടെയാണ് ഘട്ടംഘട്ടമായി ഇൻഡസ്​ട്രിയൽ ഏരിയയിൽ ഏർപ്പെടുത്തിയ നിയന്ത്രണങ്ങൾ നീക്കാൻ അധികൃതർ തുടങ്ങിയത്. രാജ്യത്തുടനീളം ആദ്യഘട്ട നിയന്ത്രണങ്ങൾ നീക്കുന്നത് ഇന്നലെ നിലവിൽ വന്നതോടെയാണ് ഇൻഡസ്​ട്രിയൽ ഏരിയയിലേക്കുള്ള പ്രവേശനത്തിനും പുറത്തിറങ്ങാനുമുള്ള അനുമതി ഒഴിവാക്കി ജി.സി.ഒ അറിയിപ്പ്  പുറത്തുവിട്ടത്.

അതേസമയം, ഇൻഡസ്​ട്രിയൽ ഏരിയയിലെ താമസക്കാരുടെയും മറ്റു സമൂഹത്തിലെ അംഗങ്ങളുടെയും ആരോഗ്യസുരക്ഷ  ഉറപ്പാക്കാൻ പ്രവേശന കവാടങ്ങളിൽ പരിശോധന തുടരും. നിയന്ത്രണങ്ങൾ നീക്കുന്നതിലൂടെ വൈറസ്​ പൂർണമായി അപ്രത്യക്ഷമായെന്നല്ല അർഥമാക്കുന്നതെന്ന് ഓർമിപ്പിച്ച ജി.സി.ഒ, നിയന്ത്രണങ്ങൾ ഘട്ടമായി പിൻവലിക്കുന്നത് വിജയകരമാക്കുന്നതിന് എല്ലാവരുടെയും സഹകരണം  അനിവാര്യമാണെന്നും സാധാരണ ജീവിതത്തിലേക്ക് മടങ്ങാൻ എല്ലാ സുരക്ഷാ മുൻകരുതലുകളും നിയന്ത്രണങ്ങളും പാലിക്കുന്നതിൽ ജാഗ്രതയുള്ളവരാകണമെന്നും പൊതുജനങ്ങളോടാവശ്യപ്പെടുകയും ചെയ്തു.