ബഹുഭാഷാ തൊഴിൽ കരാറുകൾക്ക്​ ഇനി ഡിജിറ്റൽ അംഗീകാരം

ദോഹ: ബഹുഭാഷാ തൊഴിൽ കരാറുകൾക്കായി ഡിജിറ്റൽ ഓഥൻറിക്കേഷൻ സംവിധാനവുമായി ഖത്തർ തൊഴിൽ സാമൂഹിക മന്ത്രാലയം. കമ്പനികളിലെ തൊഴിൽ കരാറുകൾക്ക് ഡിജിറ്റൽ സാങ്കേതികവിദ്യ വഴി അംഗീകാരം നൽകുകയാണ് ഇതിലൂടെ ലക്ഷ്യമിടുന്നത്. തൊഴിൽ മന്ത്രാലയത്തി​െൻറ കാര്യാലയങ്ങളിലും മന്ത്രാലയ സേവനങ്ങൾ നൽകുന്ന ഗവൺമ​െൻറ് സർവീസ്​ കോംപ്ലക്സുകളിലും നേരിട്ടെത്തി തൊഴിൽ കരാറുകൾക്ക് അംഗീകാരം തേടുന്നത് ഡിജിറ്റൽ ഒഥൻറിക്കേഷൻ സംവിധാനത്തോടെ ഒഴിവാക്കാം. 

തൊഴിൽ നിയമപ്രകാരം തൊഴിലാളിയുമായുള്ള കരാറുകൾ ഡിജിറ്റലായി അവസാനിപ്പിക്കാനും ഈ സേവനം ഉപയോഗപ്പെടുത്താം. കമ്പനി ഉടമകൾക്ക് സ്​മാർട്ട് കാർഡും പാസ്​വേഡും ഉപയോഗിച്ച് ഡിജിറ്റൽ സംവിധാനം തുറക്കാൻ സാധിക്കും. പിന്നീട് കരാറിലെ വ്യവസ്​ഥകളും മറ്റു വിവരങ്ങളും പൂരിപ്പിക്കുകയും പ്രിൻറ് ചെയ്യുകയും ഒപ്പുവെക്കുകയും ചെയ്തതിന് ശേഷം ആവശ്യമായ രേഖകളുമായി ഇതേ സംവിധാനത്തിലൂടെ തന്നെ അപ്​ലോഡ് ചെയ്ത് മന്ത്രാലയത്തിൽ സമർപ്പിക്കണം. 

മന്ത്രാലയത്തിൽ നിന്നുള്ള അനുമതി ലഭിച്ചാലുടൻ ആവശ്യമായ തുക അടച്ച് തൊഴിൽ കരാർ ഡിജിറ്റൽ ആയി പ്രിൻറ് ചെയ്തെടുക്കുകയും ചെയ്യാം. തൊഴിൽ മന്ത്രാലയത്തി​െൻറ സേവനങ്ങൾ ഡിജിറ്റൽവൽകരിക്കുന്നതി​െൻറ ഭാഗമായാണ് തൊഴിൽ കരാർ ഒഥൻറിക്കേഷനും ഒാൺലൈനായി ആരംഭിച്ചിരിക്കുന്നത്.