മുട്ടുംവിളിക്കാരും ഓർമകളിൽ മായാത്ത ഉമ്മയും

സുബ്ഹ് ബാങ്കിൻെറ ഒന്നോ രണ്ടോ മണിക്കൂർ മുമ്പായിരിക്കും നോർത്ത് ഇന്ത്യക്കാരായ ഒരു സംഘം റോഡിലൂടെ അറവനമുട്ടിൻെറ താളത്തിൽ ഹിന്ദി പാട്ടുംപാടി നോമ്പുകാരെ അത്താഴം കുടിക്കാൻ ഉണർത്തിയിരുന്നത്. തൃശൂരിലെ തിരുവത്ര ചാവക്കാട്​ ഭാഗങ്ങളിൽ ഇത്തരക്കാർ എല്ലാ റമദാനിലും സജീവമായിരുന്നു. ഇവർക്ക് ഒരു വിളിപ്പേരുമുണ്ട്, മുട്ടുംവിളിക്കാർ എന്ന്​. റമദാനിലെ ഒഴിച്ചുകൂടാനാകാത്ത സ്പെഷ്യലിൽ ഒന്നാണ് മുട്ടും വിളിക്കാർ. ഇവരുടെ ഉച്ചത്തിലുള്ള പഴയ ഹിന്ദി സിനിമയിലെ പാട്ടും അറവനമുട്ടിൻെറ താളത്തിലുമാണ്​ ഓരോ വീടും ഉണരുന്നത്.

ഈ സൽകർമ്മം ചെയ്യാൻ ഇവരെ ആരും നിയോഗിക്കുന്നതല്ല. ഇവരുടെ പൂർവികർ പിന്തുടർന്ന് പോകുന്നത്​ അവരും ചെയ്യുന്നുവെന്ന്​ മാത്രം. എല്ലാ റമദാൻ കാലവും ഇവർ അവരവരുടെ സംസ്​ഥാനങ്ങളിൽ നിന്ന്​ എത്തുകയാണ്​ ചെയ്യാറ്​. രണ്ടിൽ കൂടുതൽ ആളുകൾ ഉണ്ടാകും. ഇവരുടെ താമസം നഗരത്തിലെ പ്രധാന പള്ളിയിലായിരിക്കും. ഗ്രാമത്തിലെ ഓരോ വീടുകളിൽ നിന്ന് ഭക്ഷണവും വസ്ത്രങ്ങളും കൊടുക്കും. ഈ പുതിയ കാലത്ത് ‘മുട്ടും വിളിക്കാരെ’ കാണാറില്ല. കഴിഞ്ഞ കുറേ റമദാനുകളിൽ ഇവരുടെ സാന്നിധ്യം ചാവക്കാട്​ മേഖലകളില്ല. സ്മാർട്ട് ഫോണുകളുടെ റിങ് ട്യൂണിൻെറ ശബ്​ദത്തിലാണ് പ്രവാസിയുടെ അത്താഴം കുടിക്കൽ.

ഉമ്മാടെ ഓർമ്മകൾ ഏറ്റവും കൂടുതൽ സ്പർശിക്കുന്നത് ഈ മാസത്തിലെ രാപകലുകളിൽ തന്നെയാണ്​. അത്താഴം കുടിക്കാൻ ഉമ്മ എണീപ്പിക്കും. തേങ്ങ പാലും റോബസ്​റ്റ്​ പഴവും മറ്റെന്തോ ചേർത്തും കൈ കൊണ്ട് പിഴിഞ്ഞ് ഒരു സ്പെഷ്യൽ ജ്യൂസ് ഉമ്മ ഉണ്ടാക്കാറുണ്ട്. അതിൻെറ രുചി ഉമ്മ ഉണ്ടാക്കി തരുമ്പോൾ മാത്രമാണ്​ കിട്ടാറ്​. മുട്ടുംവിളിക്കാർ കഴിഞ്ഞാൽ റമദാനിലെ ഓർമ്മകളിൽ ഒരു മറവിക്കും
വിട്ടുകൊടുക്കാത്ത മറ്റൊന്ന് ഉമ്മാടെ ഈ സ്പെഷ്യൽ ജ്യൂസാണ്. രണ്ട് വർഷം മുമ്പ് റമദാൻ 24നാണ്​ ഉമ്മ മരിക്കുന്നതും. ഈ പ്രവാസിയുടെ നാല് ചുമരിൻെറ കൊട്ടാരം അതിനാൽ തന്നെ ഓർമകളാൽ സമ്പന്നം.