തുർക്കി- ഖത്തർ ബന്ധം കൂടുതൽ ശക്​തമാകുന്നു

ദോഹ: ​തുർക്കിയും ഖത്തറും തമ്മിലെ അടുത്ത ബന്ധം വിനോദ സഞ്ചാര, ​വ്യാപാര മേഖലകൾക്ക്​ കൂടുതൽ ഗുണകരമാകുന്നു. ഖത് തറും തുർക്കിയും തമ്മിലെ വ്യാപാരത്തിൽ രണ്ട്​ വർഷത്തിനിടയിൽ ഇരട്ടിയിൽ അധികം വർധനവാണുണ്ടായിട്ടുള്ളത്​. ഖത്തർ സ്വദേശികളുടെ ഇഷ്​ട സഞ്ചാര കേന്ദ്രമായി തുർക്കി മാറിയിട്ടുമുണ്ട്​. ഇൗ വർഷം അവസാനത്തോടെ തുർക്കി^ ഖത്തർ വ്യാപാരം രണ്ട്​ ബില്ല്യൺ ഡോളർ കഴിയുമെന്ന്​ തുർക്കി അംബാസഡർ ഫിക്​റെത്​ ഒസെർ പറഞ്ഞു. കഴിഞ്ഞ വർഷം 750 ദശലക്ഷം ഡോളർ ആയിരുന്നുവെങ്കിൽ ഇൗ വർഷം ഇതുവരെ 1.3 ബില്ല്യൺ ഡോളർ പിന്നിട്ടുകഴിഞ്ഞ​ു.

വർഷാവസാനത്തോടെ രണ്ട്​ ബില്ല്യൺ ഡോളർ മറികടക്കുമെന്നാണ്​ പ്രതീക്ഷയെന്നും അദ്ദേഹം പറഞ്ഞു. രണ്ട്​ വർഷത്തിനിടെ തുർക്കിയിലെത്തുന്ന ഖത്തരികളുടെ എണ്ണത്തിൽ 100 ശതമാനത്തിൽ അധികം വർധനവുണ്ടായിട്ടുണ്ട്​. 2016ൽ 33000 സന്ദർശകരാണ്​ ഉണ്ടായിരുന്നതെങ്കിൽ 2018ൽ ഇതുവരെ 71000 സന്ദർശകർ തുർക്കിയിൽ എത്തിക്കഴിഞ്ഞു. 2018 പൂർത്തിയാകു​േമ്പാഴേക്കും ഒരു ലക്ഷം പേരെയാണ്​ ഖത്തറിൽ നിന്ന്​ പ്രതീക്ഷിക്കുന്നതെന്നും അദ്ദേഹം പറഞ്ഞു. തുർക്കിയിൽ സ്വത്ത്​ വാങ്ങുന്ന ഖത്തരികളുടെ എണ്ണവും വർധിച്ചിട്ടുണ്ട്​. ഇതി​​​െൻറ ഭാഗമായി നിരവധി തുർക്കി റിയൽ എസ്​റ്റേറ്റ്​ കമ്പനികൾ ദോഹയിൽ ഒാഫിസ്​ ആരംഭിക്കുന്നുമുണ്ടെന്നും അദ്ദേഹം പറഞ്ഞു.