ഹുക്ക: ഹോട്ടലുകളിലും ക്ലബുകളിലും പരിശോധന ശക്തമാക്കുന്നു

ദോഹ: ഹുക്ക ഉപയോഗിക്കുന്ന ഹോട്ടലുകളിലും കോഫി ഷോപ്പുകളിലും ക്ലബുകളിലും ആരോഗ്യ മന്ത്രാലയം മിന്നൽ പരിശോധന തുടരുന്നു. ഏതാനും ദിവസങ്ങൾ മുമ്പാണ്​ പരിശോധന ആരംഭിച്ചത്​. അനുമതി ലഭിക്കാതെ നിയമ വിരുദ്ധമായി ഹുക്ക ഉപയോഗിക്കുന്ന നിരവധി സ്​ഥാപനങ്ങൾക്കെതിരെ നിയമ നടപടി സ്വീകരിച്ച് വരികയാണെന്ന് അധികൃതർ വ്യക്തമാക്കി.

നിലവിൽ ഹുക്ക ഉപയോഗിക്കാനുള്ള അനുമതി ഒരു സ്​ഥാപനത്തിനും നൽകുന്നില്ല. നേരത്തെ അനുമതി ലഭിച്ച സ്​ഥാപനങ്ങൾ നിയമങ്ങൾ പാലിച്ച് തുടരുന്നതിന് അനുമതിയുണ്ട്. എന്നാൽ നിലവിലെ അനുമതിയുടെ കാലാവധി അവസാനിച്ചാൽ കർശന ഉപാധികളോടെയായിരിക്കും പുതുക്കി നൽകുകയെന്ന് അധികൃതർ അറിയിച്ചു. പുകവലി ഉൽപന്നങ്ങൾ കുട്ടികൾക്ക് നൽകുന്ന സ്​ഥാപങ്ങൾക്കെതിരെ കർശന നടപടി സ്വീകരിച്ച് വരികയാണെന്ന് ബന്ധപ്പെട്ടവർ അറിയിച്ചു. സ്​കൂളുകളുകളുടെ സമീപത്ത് പുകയില ഉൽപന്നങ്ങൾ വിൽക്കുന്ന സ്​ഥാപനങ്ങളെ കണ്ടെത്താൻ വ്യാപക പരിശോധനയാണ് നടക്കുന്നത്.