ഖത്തറിൽ മാസം ഉൽപാദിപ്പിക്കുന്നത് ദശലക്ഷം ലിറ്റർ ഹാൻഡ് സാനിറ്റൈസർ

ദോഹ: കോവിഡ് -19 സാഹചര്യത്തിൽ പ്രതിരോധ പ്രവർത്തനങ്ങളുടെ ഭാഗമായി കൈകൾ അണുമുക്തമാക്കുന്നതിനുള്ള ഹാൻഡ് സാനിറ്റൈസറുകൾ ഉൽപാദിപ്പിക്കുന്നതിൽ രാജ്യം സ്വയം പര്യാപ്തതയിലേക്ക്. പ്രാദേശികമായി പ്രതിമാസം ദശലക്ഷം ലിറ്റർ ഹാൻഡ് സാനിറ്റൈസറാണ് ഖത്തർ ഉൽപാദിപ്പിച്ചുകൊണ്ടിരിക്കുന്നത്.

രാജ്യത്ത് അണുമുക്ത ഉൽപന്നങ്ങളുടെ ഉൽപാദനം ഏറെ വർധിച്ചിട്ടുണ്ട്​. രാജ്യത്തെ എല്ലാ റീട്ടെയിൽ ഔട്ട്​ലെറ്റുകളിലും സാനിറ്റൈസറുകൾ ലഭ്യമാണ്​. നിലവിൽ പ്രതിമാസം 9,92,000 ലിറ്റർ ഹാൻഡ് സാനിറ്റൈസറുകളാണ് ഖത്തർ പ്രതിമാസം ഉൽപാദിപ്പിക്കുന്നതെന്നും ഗവൺമെൻറ് കമ്യൂണിക്കേഷൻസ്​ ഓഫിസ്​ (ജി.സി.ഒ) വ്യക്തമാക്കുന്നു.

ജി.സി.ഒ വെബ്സൈറ്റിൽ പുതുതായി ഉൾപ്പെടുത്തിയ ഫോക്കസ്​ എന്ന പേജിലാണ് ഇക്കാര്യം പറയുന്നത്. കോവിഡ് -19 കണക്കുകളും വിവരങ്ങളും, സ്വയം പര്യാപ്തത, വിദ്യാഭ്യാസം, സുരക്ഷ മുൻകരുതലുകൾ, യാത്ര തുടങ്ങിയ നിരവധി വിഷയങ്ങളാണ് ഇതിൽ കൈകാര്യം ചെയ്യുന്നത്.രാജ്യത്തെ കോവിഡ് -19 കേസുകളുടെ എണ്ണത്തിൽ ഗണ്യമായി കുറവുണ്ട്​. എന്നാൽ, സുരക്ഷ മുൻകരുതലുകൾ പാലിക്കുന്നതിൽ വീഴ്ച വരുത്തരുതെന്നും ജി.സി.ഒ പൊതുജനങ്ങളോടാവശ്യപ്പെട്ടു.

രാജ്യത്ത് ഭക്ഷ്യക്ഷാമമില്ല. എല്ലാവർക്കും ദീർഘകാലത്തേക്കാവശ്യമായ ഭക്ഷ്യ വിഭവങ്ങളുടെ കരുതൽ ശേഖരം ഖത്തറിലുണ്ട്​. രാജ്യത്ത് മതിയായ വിഭവങ്ങളുടെ സംഭരണം വർധിപ്പിക്കുന്നതിനായി വാണിജ്യ വ്യവസായ മന്ത്രാലയം 14 കരാറുകളിൽ ഒപ്പുവെച്ചിട്ടുണ്ട്​. പ്രാദേശിക വിപണികളിലേക്ക് തടസ്സമില്ലാതെ ഉൽപന്നങ്ങളുടെ ഒഴുക്ക് ലക്ഷ്യമിട്ടുള്ള ഭരണകൂടത്തി​െൻറ പദ്ധതിയുടെ ഭാഗമാണ് കരാറുകൾ. ന്യായവിലക്ക് ആവശ്യമായ ഉൽപന്നങ്ങൾ ജനങ്ങൾക്ക് ലഭ്യമാക്കുകയാണ് ലക്ഷ്യമെന്നും ജി.സി.ഒ വിശദീകരിച്ചു.

വിദൂര വിദ്യാഭ്യാസം കൂടുതൽ േപ്രാത്സാഹിപ്പിക്കുന്നതി​െൻറ ഭാഗമായി ഖത്തർ മീഡിയ കോർപറേഷൻ വിദ്യാഭ്യാസ ഉന്നത വിദ്യാഭ്യാസ മന്ത്രാലയവുമായി സഹകരിച്ച് രണ്ട് പുതിയ ചാനലുകളാണ് ആരംഭിച്ചിരിക്കുന്നത്. എജുക്കേഷൻ 1, എജുക്കേഷൻ 2 ചാനലുകൾ നിലവിലെ അധ്യയന വർഷത്തിലുടനീളം വിദ്യാർഥികൾക്കും രക്ഷിതാക്കൾക്കും വലിയ പിന്തുണയും സഹായവുമാകും നൽകുകയെന്നും ജി.സി.ഒ ചൂണ്ടിക്കാട്ടി.