ഖത്തർ: ഭാഗിക സൂര്യഗ്രഹണം 1.35 മുതൽ; മുൻകരുതൽ പാലിക്കാൻ നിർദേശം

ദോഹ: ഗൾഫ്​ രാജ്യങ്ങളും ഇന്ത്യയും ഉൾപ്പെടെ വിവിധ ​ഏഷ്യൻ രാജ്യങ്ങളിൽ ദൃശ്യമാകുന്ന ഭാഗിക സൂര്യഗ്രഹണം ഖത്തറിൽ ഉച്ച 1.35 മുതൽ ആരംഭിക്കുമെന്ന്​ കലണ്ടർ ഹൗസ്​ അറിയിച്ചു. 2.47മുതൽ ഗ്രഹണം പൂർണമായി ദ​ൃശ്യമാവും. 3.52ഓടെ അവസാനിക്കുമെന്നും അറിയിച്ചു. ഭാഗിക ഗ്രഹണം പരമാവധിയിലെത്തു​േമ്പാൾ 38ശതമാനം സൂര്യ​ന്‍റെ കാഴ്​ച മറ​ക്കപ്പെടും.

ഭാഗിക സൂര്യഗ്രഹണത്തിന്‍റെ പശ്​ചാത്തലത്തിൽ പൊതുജനങ്ങൾ ആരോഗ്യ മുൻകരുതൽ പാലിക്കണമെന്ന്​ അധികൃതർ നിർദേശിച്ചു. നഗ്നനേത്രങ്ങൾ കൊണ്ട് സൂര്യഗ്രഹണം കാണാൻ ശ്രമിക്കരുതെന്ന്​ ആരോഗ്യ മന്ത്രാലയം മുന്നറിയിപ്പ്​ നൽകി. കാഴ്​ച പൂർണമായോ ഭാഗികമായോ നഷ്​ടപ്പെടാൻ ഇത്​ കാരണമാവും. മുൻകരുതൽ പാലിക്കാതെ സൂര്യഗ്രഹണം കാണാൻശ്രമിച്ചത്​ കാരണം അസ്വസ്​ഥ അനുഭവപ്പെടുന്നവർ ചികിത്സ തേടണമെന്നും നിർദേശിച്ചു.

ഖത്തർ കലണ്ടർ ഹൗസ്​, കാലാവസ്​ഥാ നിരീക്ഷണ വിഭാഗം എന്നിവയുടെ നേതൃത്വത്തിൽ ഭാഗിക സൂര്യഗ്രഹണം വീക്ഷിക്കാൻ വിവിധ കേന്ദ്രങ്ങളിൽ വിപുലമായ സംവിധാനങ്ങൾ ഏർപ്പെടുത്തിയിട്ടുണ്ട്​.