600ലധികം ജീവനക്കാരെ പിരിച്ചുവിടും:സ്​കൂളുകളിലും സ്വദേശിവൽക്കരണം ശക്തമാക്കുന്നു

ദോഹ: രാജ്യത്തെ സ്​കൂളുകളിലും സ്വദേശിവൽകരണം ശക്തമാക്കാൻ വിദ്യാഭ്യാസ ഉന്നത വിദ്യാഭ്യാസ മന്ത്രാലം നടപടിയെടുക്കുന്നു. ഇതി​​െൻറ ഭാഗമായി സ്​കൂളുകളിലേക്ക് ഔദ്യോഗിക സർക്കുലറുകൾ മന്ത്രാലയം അയച്ചു കഴിഞ്ഞു.അടുത്ത അധ്യായന വർഷം മുതൽ രാജ്യത്തെ ൈപ്രമറി, പ്രിപറേറ്ററി, സെക്കൻഡറി തലങ്ങളിലെ ബോയ്സ്​, ഗേൾസ്​ ഇൻഡിപെൻഡൻറ് സ്​കൂളുകളിലാണ് പുതിയ സർക്കുലറനുസരിച്ച് അധ്യാപകരിലും സ്​കൂൾ അഡ്മിനിസ്​േട്രഷൻ ജീവനക്കാരിലും ഖത്തറൈസേഷൻ നടപ്പാക്കുക. പ്രാദേശിക അറബി ദിനപത്രമായ അൽ ശർഖ് റിപ്പോർട്ട് ചെയ്യുന്നത് പ്രകാരം അടുത്ത അധ്യായന വർഷത്തിൽ 650ഓളം അധ്യാപകരെയും അഡ്മിനിസ്​േട്രറ്റർമാരെയും പിരിച്ചുവിട്ടുകൊണ്ടുള്ള പട്ടിക മന്ത്രാലയം ഓരോ സ്​കൂളിലേക്കും അയച്ചിട്ടുണ്ട്. ജൂൺ ഒന്ന് വരെയാകും ഇവരുടെ അവസാന പ്രവൃത്തി ദിവസം. അതേസമയം, പിരിച്ചുവിടുന്ന ഒഴിവുകൾ നികത്തുന്നതിനായുള്ള ഖത്തരികളും വിദേശികളും അടങ്ങുന്ന പട്ടിക ഇതിനകം തയ്യാറായിട്ടുണ്ടെന്നും പുതിയ അധ്യായന വർഷത്തിൽ സ്​കൂളുകളിലെ മറ്റു ഒഴിവുകളും ഇതോടൊപ്പം നികത്തുമെന്നും റിപ്പോർട്ട് സംബന്ധിച്ച് പ്രത്യേക വൃത്തങ്ങൾ വ്യക്തമാക്കുന്നു. 

എന്നാൽ പിരിച്ചുവിടൽ സംബന്ധിച്ച് മന്ത്രാലയത്തി​​െൻറ നോട്ടീസ്​ ലഭിച്ച സ്​കൂൾ അധികൃതർ ആശ്ചര്യപ്പെട്ടിരിക്കുകയാണെന്നും വിദ്യാഭ്യാസമന്ത്രാലയത്തിന് കീഴിലെ മാനവ വിഭവശേഷി വകുപ്പ് വഴി എംപ്ലോയീ ഡാറ്റാ സിസ്​റ്റത്തിലൂടെയാണ് ലിസ്​റ്റ് സ്​കൂളുകളിലേക്ക് അയക്കപ്പെട്ടിരിക്കുന്നതെന്നും അൽ ശർഖ് ദിനപത്രം റിപ്പോർട്ടിൽ പറയുന്നു. പിരിച്ചുവിടേണ്ട ജീവനക്കാരുടെ കാര്യത്തിൽ എത്രയും പെട്ടെന്ന് ആവശ്യമായ നടപടികൾ കൈക്കൊള്ളണമെന്നും ഒരാഴ്ചക്കകം അവരുടെ ആനുകൂല്യങ്ങൾ സംബന്ധിച്ചുള്ള നടപടിക്രമങ്ങൾ പൂർത്തിയാക്കണമെന്നും സ്​കൂൾ ഡയറക്ടർമാർക്ക് മന്ത്രാലയം നിർദേശം നൽകിയിട്ടുണ്ട്. അധ്യാപകർക്കും അഡ്മിനിസ്​േട്രറ്റർമാർക്കും പുറമേ, സെക്രട്ടറിമാർ, കമ്പ്യൂട്ടർ അധ്യാപകർ, കോർഡിനേറ്റർമാർ തുടങ്ങിയവരും ടെർമിനേഷൻ ലിസ്​റ്റിൽ ഉൾപ്പെട്ടിട്ടുണ്ടെന്ന് മന്ത്രാലയ വൃത്തങ്ങൾ വ്യക്തമാക്കുന്നു. അധ്യാപന രംഗത്ത് 15 വർഷത്തിലധികം പ്രവൃത്തിപരിചയം ഉള്ളവരും പട്ടികയിൽ ഉൾപ്പെട്ടിട്ടുണ്ടെന്ന് അൽ ശർഖ് ദിനപത്രം വ്യക്തമാക്കി. പുതിയ ഉത്തരവ് പ്രാബല്യത്തിൽ വരുന്നതോടെ മിക്ക സ്​കൂളുകൾക്കും എട്ടിനും പത്തിനും ഇടയിൽ അധ്യാപകരെയും ജീവനക്കാരെയും നഷ്​ടമാകുമെന്നാണ് കരുതപ്പെടുന്നത്. ചില സ്​കൂളുകൾക്ക് 14 ജീവനക്കാർ വരെ നഷ്​ടമായേക്കും.