റമദാനിലേക്കായി ഖത്തർ ഇൻഷുറൻസ്​ കമ്പനിയുടെ സൗജന്യ ആപ്പ്

ദോഹ: മിന മേഖലയിലെ മുൻനിര ഇൻഷുറൻസ്​ കമ്പനിയായ ഖത്തർ ഇൻഷുറൻസ്​ കമ്പനി റമദാനിലേക്കായി സൗജന്യ ഇസ്​ലാമിക് ആപ്പ് പുറത്തിറക്കി. 
ആൻേഡ്രായിഡിൽ നിന്നും ഐ.ഒ.എസിൽ നിന്നും സൗജന്യമായി ഡൗൺലോഡ് ചെയ്തെടുക്കാൻ കഴിയുന്ന ആപ്ലിക്കേഷനിൽ വിശുദ്ധ ഖുർആനും ഇസ്​ലാമിക് സാഹിത്യങ്ങളും ഇസ്​ലാമിക സംസ്​കാരം മുറുകെ പിടിക്കുന്നതിനുള്ള പ്രത്യേക നിർദേശങ്ങളും അടങ്ങിയിരിക്കുന്നു. 

വിശുദ്ധ ഖുർആൻ പാരായണം ചെയ്യുന്നതിനും ലോകപ്രശസ്​തരായ ഖാരിഉ(ഖുർആൻ പാരായണം ചെയ്യുന്നവർ)കളുടെ പാരായണം കേൾക്കുന്നതിനും തഫ്സീർ(പരിഭാഷയും വിശദീകരണവും) വായിക്കുന്നതിനും സൗകര്യം ഉള്ളതോടൊപ്പം തന്നെ, ഖുർആനിക സൂക്തങ്ങൾ ആയതുകൾ തരം തിരിച്ച് പരിശോധിക്കുന്നതിനും സാധിക്കും. 

ദോഹയിൽ നിന്നും പ്രക്ഷേപണം ചെയ്യുന്ന ഖുർആൻ 24 റേഡിയോ സൗജന്യമായി തൽസമയം കേൾക്കുന്നതിനും നമസ്​കാര സമയങ്ങൾ അറിയുന്നതിനും ഖിബ്​ല നിർണയിക്കുന്നതിനും ആപ്പിലൂടെ സാധിക്കുന്നു. കൂടാതെ ഉപഭോക്താവിന് ഏറ്റവും അടുത്തുള്ള പള്ളിയേതെന്ന് കണ്ടെത്തുന്നതിന് സഹായിക്കുന്നതോടൊപ്പം ഖത്തറിലെ ഖത്തർ ഇൻഷുറൻസ്​ കമ്പനിയുടെ ശാഖകൾ അറിയുന്നതിനുള്ള സൗകര്യവും ഈ ആപ്പിൽ ഉൾപ്പെടുത്തിയിരിക്കുന്നു.