ഖത്തർ ഇന്ത്യൻ എംബസി വിസ, ​കോൺസുലാർ സേവനങ്ങൾ സ്വകാര്യവത്കരിക്കുന്നു; ഏജൻസികളിൽ നിന്ന് അപേക്ഷ​ ക്ഷണിച്ചു

ദോഹ: ഖത്തറിലെ ഇന്ത്യൻ എംബസിക്കു കീഴിലെ ​​വിസ, പാസ്​പോർട്ട്​, കോൺസുലാർ സേവനങ്ങളുടെ സ്വകാര്യവത്കരണ നടപടികൾക്ക്​ തുടക്കമായി. ആദ്യഘട്ടമെന്ന നിലയിൽ സേവനങ്ങൾ നൽകുന്നതിനായി ഔട്​സോഴ്​സിങ്​ ഏജൻസികളിൽ നിന്നും ടെൻഡർ ക്ഷണിച്ചുകൊണ്ട്​ ഇന്ത്യൻ എംബസി അറിയിപ്പു നൽകി. സാമൂഹിക മാധ്യമ പ്ലാറ്റ്​ഫോമായ ‘എക്​സ്​’ ഇന്ത്യൻ എംബസി പേജ്​ വഴിയാണ്​ പ്രൊപ്പോസൽ അപേക്ഷ (ആർ.എഫ്​.പി) ക്ഷണിച്ചത്​. വിവിധ കോൺസുലാർ സേവനങ്ങൾ, പാസ്​പോർട്ട് പുതുക്കലും അനുവദിക്കലും​, വിസ, അറ്റസ്​റ്റേഷൻ, പൊലീസ്​ ക്ലിയറൻസ്​ ഉൾപ്പെടെ എംബസി നൽകിവരുന്ന സേവനങ്ങളാണ്​ സ്വകാര്യ ഏജൻസികൾ വഴിയാക്കി മാറ്റുന്നത്​.

എംബസിയുടെ സേവനങ്ങളുടെ വേഗതയും ഗുണനിലവാരവും മെച്ചപ്പെടുത്തുന്നതിനായി സ്വകാര്യ ഏജൻസികൾ വഴിയാക്കുമെന്ന്​ നേരത്തെ തന്നെ ഇന്ത്യൻ അംബാസഡർ അറിയിച്ചിരുന്നു. അതിൻെറ ഭാഗമായാണ്​ ടെൻഡർ ക്ഷണിച്ചത്​.

https://www.indianembassyqatar.gov.in/users/assets/pdf/tender/doha_06feb2024_tender.pdf എന്ന ലിങ്ക്​ വഴി ടെൻഡർ നിർദേശങ്ങളും പങ്കുവെച്ചു. ഈ മേഖലയിൽ പരിചയസമ്പന്നരും യോഗ്യതയുള്ളവരുമായ സേവന ദാതാക്കൾക്ക്​ അപേക്ഷിക്കാവുന്നതാണ്​.

ഖത്തറിലെ ഇന്ത്യൻ സമൂഹത്തിന് അവശ്യ സേവനങ്ങൾ എത്തിക്കുന്നതിൽ കാര്യക്ഷമത വർധിപ്പിക്കുകയാണ് ഔട്ട്‌സോഴ്‌സിങ് സംരംഭം ലക്ഷ്യമിടുന്നതെന്ന് ഔദ്യോഗിക പ്രസ്താവനയിൽ ഇന്ത്യൻ എംബസി വ്യക്തമാക്കി. യോഗ്യരായവർക്ക്​ മാർച്ച്​ 10ന്​ മുമ്പായി ബിഡ്​ സമർപ്പിക്കാം. ഏപ്രിൽ രണ്ടിന്​ ബിഡ്​ പ്രഖ്യാപിക്കും.