ഖത്തർ-ഇന്ത്യ മന്ത്രിതല ഉന്നത സമിതി രൂപവത്​കരിക്കും

ദോഹ: ഉഭയകക്ഷി ബന്ധം ഉൗഷ്​മളമാക്കുന്നതിന്​ ഇന്ത്യയും ഖത്തറും സംയുക്​ത ഉന്നത തല സമിതി രൂപവത്​കരിക്കുന്നു. രണ്ട്​ രാജ്യങ്ങളുടെയും വിദേശകാര്യ മന്ത്രിമാരുടെ സംയുക്​ത അധ്യക്ഷതയിലാകും സമിതി പ്രവർത്തിക്കുക. ഇരുരാജ്യങ്ങളും തമ്മിലെ ബന്ധം കൂടുതൽ മേഖലകളിലേക്ക്​ വ്യാപിപ്പിക്കുകയും പരസ്​പര താൽപര്യമുള്ള വിഷയങ്ങൾ ചർച്ച ചെയ്യുകയും ചെയ്യുകയെന്ന ലക്ഷ്യത്തോടെയാണ്​ സമിതിക്ക്​ രൂപം നൽകിയത്​.
ഖത്തർ സന്ദർശനത്തിനെത്തിയ ഇന്ത്യൻ വിദേശകാര്യ മന്ത്രി സുഷമ സ്വരാജ്​ ഖത്തർ ഉപപ്രധാനമന്ത്രിയും വിദേശകാര്യ മന്ത്രിയുമായ ശൈഖ്​ മുഹമ്മദ്​ ബിൻ അബ്​ദുൽ റഹ്​മാൻ ആൽഥാനിയുമായി നടത്തിയ കൂടിക്കാഴ്​ചക്ക്​ ശേഷം പുറപ്പെടുവിച്ച സംയുക്​ത പ്രസ്​താവനയിലാണ്​ ഉന്നതതല സമിതി രൂപവത്​കരിക്കുന്നത്​ പ്രഖ്യാപിച്ചത്​.
ഞായറാഴ്​ച വൈകു​ന്നേരം ഖത്തറിലെത്തിയ സുഷമ സ്വരാജ്​ തിങ്കളാഴ്​ച രാവിലെ ഖത്തർ അമീർ ശൈഖ്​ തമീം ബിൻ ഹമദ്​ ആൽഥാനിയുമായും കൂടിക്കാഴ്​ച നടത്തിയിരുന്നു.
അമീരി ദിവാനിൽ നടന്ന കൂടിക്കാഴ്ചയിൽ ഇരുരാജ്യങ്ങളും തമ്മിലുള്ള സൗഹൃദ–നയതന്ത്രബന്ധവും വിവിധ മേഖലകളിൽ സഹകരണം ശക്തമാക്കുന്നതുമായി ബന്ധപ്പെട്ടും ചർച്ച ചെയ്തു. മേഖലാ–അന്തർദേശീയ തലങ്ങളിലെ വിവിധ വിഷയങ്ങളും ഇരുനേതാക്കളും പരസ്​പരം വിശകലനം ചെയ്തു.
2016 ജൂൺ നാല്​, അഞ്ച്​ തീയതികളിൽ ഖത്തർ സന്ദർശിച്ച പ്രധാനമ​ന്ത്രി നരേന്ദ്ര മോദിയും അമീർ ശൈഖ്​ തമീം ബിൻ ഹമദ്​ ആൽഥാനിയും തമ്മിലെ ചർച്ചയുടെ തീരുമാന പ്രകാരമാണ്​ മന്ത്രിതല സംയുക്​ത സമിതി രൂപവത്​കരിച്ചതെന്നും സംയുക്​ത പ്രസ്​താവനയിൽ വ്യക്​തമാക്കി. എല്ലാ ഉഭയകക്ഷി വിഷയങ്ങളും മേഖലയിലെയും അന്താരാഷ്​ട്ര തലത്തിലെയും രണ്ട്​ രാജ്യങ്ങൾക്കും താൽപര്യമുള്ള സംഭവവികാസങ്ങളും സമിതി ചർച്ച ചെയ്യും.
സാമ്പത്തികം, വാണിജ്യം, സാംസ്​കാരികം, ശാസ്​ത്രം, സാ​േങ്കതിക വിദ്യ, വിവര സാ​േങ്കതിക വിദ്യ, വിദ്യാഭ്യാസം എന്നീ ​േമഖലകളിൽ സഹകരണം കൂടുതൽ ശക്​തമാക്കുകയാണ്​ മന്ത്രിതല സമിതിയുടെ ഉത്തരവാദിത്തം.
ഇതോടൊപ്പം ഇരുരാജ്യങ്ങളും തമ്മിൽ ഒപ്പുവെച്ച കരാറുകൾ നടപ്പാക്കാനും ഇതുസംബന്ധിച്ച പ്രയാസങ്ങൾ തീർക്കാനും സമിതി ​പരിശ്രമിക്കും.
ആവശ്യമെങ്കിൽ ഉപസമിതികളും ​സ്ഥിരമോ താൽക്കാലികമോ ആയ ജോയിൻറ്​ വർക്കിങ്​ ഗ്രൂപ്പുകളും രൂപവത്​കരിക്കാനും സംയുക്​ത മന്ത്രിതല സമിതിക്ക്​ അധികാരമുണ്ട്​. ഉന്നത തല സമിതി നിലവിൽ വരുന്നതിലൂടെ നൂറ്റാണ്ടുകളായി ഇരുരാജ്യങ്ങളും തമ്മിൽ നിലനിൽക്കുന്ന ബന്ധം കൂടുതൽ ഉൗഷ്​മളമാകുമെന്നും പ്രതീക്ഷിക്കുന്നുണ്ട്​.