ഖത്തർ എക്​സോൺ ഓപൺ ടെന്നിസ്: ഉജ്ജ്വല ജയത്തോടെ മറെ തുടങ്ങി

ദോഹ: നിറഞ്ഞ ഗാലറിയുടെ മധ്യത്തിൽ മിന്നുന്ന ജയത്തോടെ ഖത്തർ എക്​സോൺ ഓപൺ ടെന്നിസിൽ സൂപ്പർ താരം ആൻഡി മറയെുടെ കുതിപ്പിന്​ തുടക്കം. സീഡില്ലാതെ കളത്തിലിറങ്ങിയ മുൻ ഗ്രാൻഡ്​സ്ലാം ചാമ്പ്യൻ ആദ്യ റൗണ്ടിൽ ജപ്പാന്‍റെ താരോ ഡാനിയേലിനെ അനായാസം തോൽപിച്ചാണ്​ തുടക്കം ഗംഭീരമാക്കിയത്​. ഈ വർഷാദ്യം നടന്ന ആസ്​ട്രേലിയൻ ഓപണിന്‍റെ രണ്ടാം റൗണ്ടിൽ മറെയുടെ കുതിപ്പിന്​ തടയിട്ട അതേ ഡാനിയേലിനെതിരായിരുന്നു മറെയുടെ നേരിട്ടുള്ള ജയം. സ്കോർ 6-2, 6-2.

നേരത്തെ രണ്ടു തവണും ​ഖത്തർ ഓപണിന്‍റെ ക്വാളിഫയറിൽ മടങ്ങിയ ജപ്പാൻ താരത്തിന്​ ആദ്യമായി നേരിട്ട്​ എൻട്രി ലഭിച്ചപ്പോൾ മറെയുടെ തിരിച്ചുവരവിൽ ഇടറി വീഴാനായിരുന്നു യോഗം. ശക്​തമായ ബാക്​ ഹാൻഡ്​ ഷോട്ടുകളും ട്രേഡ്​ മാർക്കായ ​ഹിറ്റുകളുമായാണ്​ മറെയ ദോഹയിൽ തിരിച്ചുവരവ്​ നടത്തിയത്​. 2017ന്​ ശേഷം ദോഹയിൽ താരത്തിന്‍റെ ആദ്യ ജയം കൂടിയായിരുന്നു ഇത്​. ക്രോസ്​ ഷോർട്ടുകളുമായി കോർട്ട്​ നിറയെ ഓടികളിക്കുന്ന മറെയയും കാണാൻ കഴിഞ്ഞു.

ശസ്ത്രക്രിയയും വിരമിക്കൽ പ്രഖ്യാപനവുമെല്ലാമായി നീറിയ സീസണിനുശേഷം തിരിച്ചുവരവിനൊരുങ്ങുന്ന താരത്തിന്‍റെ മിന്നും പ്രകടനത്തിനായിരുന്നു ദോഹ വേദിയായത്​. ചൊവ്വാഴ്ച നടന്ന മറ്റു മത്സരങ്ങളിൽ സ്​പെയിനിന്‍റെ അലയാന്ദ്രോ ഫോകിനയും കസാഖ്​സ്താന്‍റെ അലക്സാണ്ടർ ബുബ്ലികും ഫ്രാൻസിന്‍റെ അർതർ റി​ൻഡെർനെചും രണ്ടാം റൗണ്ടിൽ കടന്നു. ടോപ്​ സീഡ്​ ഡാനിൽ ഷപോവലോവ്​, മരിൻ സിലിച്​, ഡാൻ ഇവാൻസ്​ എന്നിവർ ബുധനാഴ്ച കളത്തിലിറങ്ങും.