ഖത്തറിലേക്ക്​ ആഗസ്​റ്റ്​ മുതൽ മടങ്ങിയെത്താം, ​​ക്വാറ​​ൻറീൻ സ്വന്തം ചെലവിൽ 

ദോഹ: നാലുഘട്ടങ്ങളിലായി കോവിഡ്​ നിയന്ത്രണങ്ങൾ ഖത്തർ നീക്കാനിരിക്കേ രാജ്യത്തേക്ക്​ മടങ്ങി വരുന്നവർക്ക്​  താമസസ്​ഥലങ്ങളിൽ ക്വാറൻറീനിൽ കഴിയാനാകില്ല. തിരിച്ചുവരുന്നവർ സ്വന്തം ചെലവിൽ 14 ദിവസം ഹോട്ടൽ ക്വാറൻറീനിൽ കഴിയേണ്ടിവരും. ജൂൺ 15 മുതൽ തുടങ്ങി സെപ്​റ്റംബർ വരെയുള്ള നാലുഘട്ടങ്ങളിലായാണ്​ ഖത്തർ  നിയന്ത്രണങ്ങളെല്ലാം നീക്കുന്നത്​. ആദ്യഘട്ടത്തിൽ ഖത്തറിലുള്ളവർക്ക്​ അടിയന്തര സാഹചര്യത്തിൽ പുറത്തേക്ക്​ യാത്ര  ചെയ്യാം. എന്നാൽ തിരിച്ചുവരു​േമ്പാൾ സ്വന്തം ചെലവിൽ ഹോട്ടൽ ക്വാറൻറീനിൽ കഴിയൽ നിർബന്ധമാണ്​. അല്ലെങ്കിൽ  പൊതുജനാരോഗ്യമന്ത്രാലയം നൽകുന്ന കേന്ദ്രങ്ങളിൽ കഴിയണം. ഇതും സ്വന്തം ചെലവിൽ ആയിരിക്കണമെന്നും ദേശീയ  ദുരന്തനിവാരണ കമ്മിറ്റി പരമോന്നത കമ്മിറ്റി വക്​താവും വിദേശകാര്യ സഹമന്ത്രിയുമായ ലുൽവ ബിൻ റാഷിദ് അൽഖാതിർ  അറിയിച്ചു. 

ആഗസ്​റ്റ്​ ഒന്നുമുതലാണ്​ ദോഹയിലേക്ക്​ മറ്റ്​ രാജ്യങ്ങളിൽ നിന്നുള്ള വിമാനങ്ങൾ അനുവദിക്കുന്നത്​.  പ്രവാസികൾക്ക്​ തിരിച്ചുവരാനാണിത്​. ഇവരും രണ്ടാഴ്​ച ക്വാറ​ൻറീനിൽ കഴിയണം. ഇതുമായി ബന്ധപ്പെട്ട കൂടുതൽ  വിവരങ്ങൾ, യാത്രക്കുള്ള ബുക്കിങ്​ തുടങ്ങിയവ ഉടൻ പ്രഖ്യാപിക്കും. എന്നാൽ കോവിഡ്​ ഭീഷണി കുറവുള്ള  രാജ്യങ്ങളിൽനിന്നുള്ളവർക്ക്​ മാത്രമേ​ മടങ്ങാൻ കഴിയൂ. ഇതിനാൽ ഇന്ത്യക്കാർക്ക്​ സാധ്യത കുറവാണ്​. 

രാജ്യത്തിന്​ പുറത്ത്​ കഴിയുന്ന പ്രായമായ പ്രവാസികളടക്കം അവസാന ഘട്ടത്തിൽ മാത്രമേ തിരികെ ജോലിയിൽ  പ്രവേശിക്കാൻ പാടുള്ളൂവെന്ന് ദേശീയ സാംക്രമികരോഗ മുന്നൊരുക്ക സമിതി സഹാധ്യക്ഷൻ ഡോ. അബ്ദുല്ലതീഫ് അൽ  ഖാൽ അറിയിച്ചിരുന്നു. നാല് ഘട്ടങ്ങളിലായാണ് നിയന്ത്രണങ്ങൾ നീക്കുക. സെപ്തംബർ 1നാണ് നിയന്ത്രണങ്ങൾ  നീക്കുന്നതിനുള്ള അന്തിമ ഘട്ടം. ഈ ഘട്ടത്തിലേ പ്രായമായവർ തിരികെ ജോലിക്കായി പുറത്തിറങ്ങേണ്ടതുള്ളൂ. ആ  സമയത്ത് രാജ്യത്തെ രോഗവ്യാപനം താഴ്ന്ന നിലയിലായിരിക്കുമെന്നാണ് പ്രതീക്ഷിക്കുന്നതെന്നും അദ്ദേഹം കഴിഞ്ഞ ദിവസം  പറഞ്ഞിരുന്നു. 
രാജ്യത്തെ പള്ളികൾ ജൂൺ 15 മുതൽ തുറന്നുതുടങ്ങും. എന്നാൽ ​​​പ്രായമായവരും കുട്ടികളും പള്ളിയിൽ  പോകുന്നത്​ ഒഴിവാക്കണം. അവരുടെ ആരോഗ്യം പരിഗണിച്ചാണ്​ ഇതെന്നും അദ്ദേഹം വ്യക്​തമാക്കി.

ഹോട്ടൽ ക്വാറൻറീൻ അടക്കമുള്ള പാക്കേജുമായി ഖത്തർ എയർവേയ്​സ്​

അതിനിടെ, യാത്രാ ടിക്കറ്റിനൊപ്പം ഹോട്ടലുകളിൽ 14 ദിവസത്തെ താമസവും ഉൾപ്പെടുത്തിയുള്ള പ്രത്യേക പാക്കേജുകൾ  ഖത്തർ എയർവേയ്സ്​ ഉടൻ പ്രഖ്യാപിക്കും. ക്വാറൻറീൻ സൗകര്യമുള്ള ഫൈവ് സ്​റ്റാർ, ഫോർ സ്​റ്റാർ, ത്രീ സ്​റ്റാർ  ഹോട്ടലുകൾ തെരഞ്ഞെടുക്കാനുള്ള സൗകര്യവും പാക്കേജിലുണ്ടാകും.

ഖത്തറിലെ കോവിഡ്​ നിയന്ത്രണങ്ങൾ നീക്കൽ ഇങ്ങനെ

ജൂൺ 15 മുതലുള്ള ആദ്യഘട്ടത്തിൽ ചുരുക്കം പള്ളികളാണ്​ തുറക്കുക. കർശന നിയ​ന്ത്രണങ്ങളോടെയാണിത്​.ഷോപ്പിങ്​ കേന്ദ്രങ്ങളിലെ ചില കടകൾ ഭാഗികമായി തുറക്കും. ചില സ്വകാര്യ ആരോഗ്യകേന്ദ്രങ്ങളുടെ 40 ശതമാനം സൗകര്യം  ​മാത്രം അടിയന്തര സേവനങ്ങൾ നൽകാനായി പ്രവർത്തിപ്പിക്കാം.ചില പാർക്കുകൾ വ്യായാമം നടത്താനായി അുവദിക്കും. എന്നാൽ 12 വയസിന്​ താ​െഴയുള്ള കുട്ടികൾക്ക് ​പ്രവേശനമുണ്ടാകില്ല.ത​ുറസ്സായ സ്​ഥലങ്ങളിൽ മാത്രം കായിക പരിശീലനമാവാം. വിശാലമായ കായിക പരിശീലന ഹാളുകളിൽ അഞ്ചുപേരിൽ  കൂടാൻ പാടില്ല. ജൂലൈ ഒന്ന്​ മുതലുള്ള രണ്ടാം ഘട്ടത്തിൽ കൂടുതൽനിയന്ത്രണങ്ങൾ നീക്കും

 ചുരുങ്ങിയ മണിക്കൂറുകൾ മാളുകൾക്ക്​  പ്രവർത്തിക്കാനാകും. മാർക്കറ്റുകളും ഹോൾസെയിൽ മാർക്കറ്റുകളും ആളുകളെ പ്രവേശിപ്പിക്കുന്നതിന്​ നിയന്ത്രണം  വരുത്തി നിശ്​ചിത മണിക്കൂറുകൾ പ്രവർത്തിപ്പിക്കാം. കുറഞ്ഞ ആളുകൾക്ക്​ പ്രവേശനം നൽകി റെസ്​റ്റോറൻറുകൾ തുറക്കാം.മ്യൂസിയങ്ങളും ലൈബ്രറികളും നിശ്​ചിത ആളുകൾക്ക് പ്രവേശനം നൽകി നിശ്​ചിത മണിക്കൂറുകൾ പ്രവർത്തിപ്പിക്കും.50 ശതമാനം ജീവനക്കാരും ഓഫിസുകളിലെത്തി ജോലി ചെയ്യണം. ആഗസ്​റ്റ്​ മുതലുള്ള മൂന്നാം ഘട്ടത്തിലാണ്​ മറ്റുരാജ്യങ്ങളിൽ നിന്ന്​ വിമാനങ്ങൾ ദോഹയിലേക്ക്​ അനുവദിക്കുക. രാജ്യത്തേക്ക്​  മടങ്ങിയെത്തുന്ന താമസക്കാർക്ക്​ വേണ്ടിയാണിത്​. ഈ ഘട്ടത്തിൽ വാണിജ്യകേന്ദ്രങ്ങൾ പൂർണമായും പ്രവർത്തിപ്പിക്കും.
ഹോൾസെയിൽ മാർക്കറ്റുകൾ നിശ്​ചിത ആളുകളെ പ്രവേശിപ്പിച്ച്​ നിശ്​ചിത മണിക്കൂറുകൾ തുറക്കും. നിശ്​ചിത സമയം  കൂടുതൽ ആളുകൾക്ക്​ പ്രവേശനം നൽകി റെസ്​റ്റോറൻറുകൾ പ്രവർത്തിപ്പിക്കാം. ഡ്രൈവിങ്​ സ്​കൂളുകൾ തുറക്കാൻ  അനുമതി നൽകും. 80 ശതമാനം ജീവനക്കാരും ഓഫിസുകളിലെത്തി ജോലി ചെയ്യണം. കർശനമായ കോവിഡ്​ പ്രതിരോധ  നടപടികൾ സ്വീകരിച്ചായിരിക്കണം ഇത്​. 

ബാർബർ ഷോപ്പുകൾ, ബ്യൂട്ടി സലൂണുകൾ, മസ്സാജ്​ സ​െൻററുകൾ എന്നിവ 50  ശതമാനം ആളുകളെ പ്രവേശിപ്പിച്ച്​ തുറക്കാം. സെപ്റ്റംബറിലെ നാലാംഘട്ടത്തോടെ നിയന്ത്രണങ്ങൾ പൂർണമായും നീക്കും.  ഈഘട്ടത്തിൽ വാണിജ്യകേന്ദ്രങ്ങൾ പൂർണമായും തുറന്നുപ്രവർത്തിക്കാൻ തുടങ്ങും. റെസ്​റ്റോറൻറുകൾ പൂർണതോതിൽ   തുറക്കാം. എല്ലാ ജീവനക്കാരും ഓഫിസുകളിലെത്തി ജോലി ചെയ്യാൻ തുടങ്ങും. പൊതുജനാരോഗ്യമന്ത്രാലയത്തിൻെറ  മാർഗനിർദേശങ്ങൾക്കനുസരിച്ച്​ വിമാനസർവീസുകൾ വർധിപ്പിക്കും. ദോഹ മെട്രോ, കർവ തുടങ്ങിയ പൊതുഗതാഗത  സേവനങ്ങൾ നിയന്ത്രണത്തോടെ പുനരാരംഭിക്കും. ഈ ഘട്ടത്തിൽസ്വകാര്യ സ്​കൂളുകളടക്കമുള്ള വിദ്യാഭ്യാസ സ്​ ഥാപനങ്ങളുടെയും പ്രവർത്തനം പുനരാരംഭിക്കും