നാട്ടിൽ കുടുങ്ങിയ ആരോഗ്യപ്രവർത്തകർക്ക്​ ഖത്തറിലേക്ക്​ മടങ്ങാൻ അനുമതി

ദോഹ: കോവിഡ്​ പ്രതിസന്ധിയിൽ നാട്ടിൽ കുടുങ്ങിയ ഇന്ത്യക്കാരായ ആരോഗ്യപ്രവർത്തകർക്ക്​ മടങ്ങിയെത്താൻ ഖത്തറി​​െൻറ അനുമതി. നിലവിൽ ഖത്തർ രാജ്യാന്തരവിമാനങ്ങളെ അനുവദിക്കുന്നില്ല. ഖത്തറിലെ സർക്കാർ സ്വകാര്യമേഖലയിൽ ജോലി ചെയ്യുന്ന ഡോക്​ടർമാർ, നഴ്​സുമാർ, പാരാമെഡിക്കൽ സ്​റ്റാഫ്​ തുടങ്ങി നിരവധി ആരോഗ്യപ്രവർത്തകരാണ്​ മടങ്ങാനാവാതെ ഇന്ത്യയിൽ കഴിയുന്നത്​. 

ഇതിൽ നല്ലൊരു വിഭാഗം മലയാളികളുമാണ്​. അവധിക്കും മറ്റും നാട്ടിലെത്തിയ ഇവർ കോവിഡ്​ പ്രതിരോധപ്രവർത്തനങ്ങളു​െട ഭാഗമായ വിമാനവിലക്കിൽ കുടുങ്ങുകയായിരുന്നു. ഇവർക്ക്​ ഖത്തറിലേക്ക്​​  മടങ്ങിവരാനുള്ള പ്രത്യേക റീ എൻട്രി ​െപർമിറ്റ്​​ ഖത്തർ ആഭ്യന്തരമന്ത്രാലയം നൽകിക്കഴിഞ്ഞു. ഇതി​​െൻറ അടിസ്​ഥാനത്തിൽ ഹമദ്​ മെഡിക്കൽ കോർപറേഷൻ തങ്ങളുടെ ജീവനക്കാരോട്​ നാട്ടിലെ ഏറ്റവും അടുത്തുള്ള വിമാനത്താവളമേതാണെന്നതടക്കമുള്ള വിവരങ്ങളും ആരാഞ്ഞിട്ടുണ്ട്​. 

കഴിഞ്ഞ ദിവസം മലയാളികളടക്കമുള്ള കൂടുതൽ ആരോഗ്യപ്രവർത്തകർക്ക്​ അനുതി ലഭിച്ചിട്ടുണ്ട്​. ഇവർക്കായി ഖത്തറിലേക്ക്​ ഇൻഡിഗോ പ്രത്യേകസർവീസ്​ നടത്തുമെന്ന്​ ഹമദ്​ മെഡിക്കൽ കോർപറേഷനിൽ ജോലി ചെയ്യുന്നവർക്ക്​ ലഭിച്ച അറിയിപ്പിൽ പറയുന്നത്​​. എന്നാൽ എന്നാണ്​  മടങ്ങാനാവുക എന്നത്​ സംബന്ധിച്ച വിവരങ്ങൾ ലഭ്യമല്ല.

ജനുവരി ഫെബ്രുവരി മാസങ്ങളിൽ നാട്ടിലെത്തി, കഴിഞ്ഞ മാർച്ചിൽ ഖത്തറിലേക്ക്​ മടങ്ങിയെത്തേണ്ടിയിരുന്നവരാണിവർ. 
ഹമദ് മെഡിക്കൽ കോർപ്പറേഷൻ, സിദ്​റ മെഡിസിൻ, ഖത്തർ റെഡ്​ക്രസൻറ്​, ഖത്തർ പെട്രോളിയം, അൽ അഹ്​ലി  ഹോസ്പിറ്റൽ, തുടങ്ങി സർക്കാർ അർധസർക്കാർ സ്വകാര്യമേഖലയിലെ വിവിധ സ്​ഥാപനങ്ങളിൽ ജോലി  ചെയ്യുന്നവരാണിവർ.