10 വർഷത്തെ എൽ.എൻ.ജി കരാറുമായി ഖത്തറും ചൈനയും

ദോഹ: പത്തുവർഷത്തേക്ക്​ ചൈനക്ക്​ ദ്രവീകൃത പ്രകൃതി വാതകം നൽകാനുള്ള കരാറിൽ ചൈനയും ഖത്തറും ഒപ്പുവെച്ചു. പ്രതിവർഷം 10 ലക്ഷം മെട്രിക്​ ടൺ വീതം എൽ.എൻ.ജി കൈമാറാനാണ്​ ധാരണ. ആഗോള പ്രശസ്​തരായ എണ്ണക്കമ്പനിയായ 'ഷെൽ' വഴിയാവും പ്രകൃതി വാതക കൈമാറ്റം. പത്തുവർഷത്തേക്കുള്ള കരാർ 2022 ജനുവരിയിൽ പ്രാബല്യത്തിൽ വരും.

എണ്ണ-വാതക മേഖലയിൽ ഖത്തറി‍െൻറ പ്രധാന ഇറക്കുമതി രാജ്യവും വാണിജ്യ പങ്കാളിയുമാണ്​ ചൈന. ​അടുത്തിടെയാണ്​ ​പ്രമുഖ ചൈനീസ്​ എണ്ണക്കമ്പനിയായ സി.എൻ.ഒ.ഒ.സി ഖത്തറി‍െൻറ എൽ.എൻ.ജി മേഖലയിൽ 2900 കോടി ഡോളറി‍െൻറ സഹകരണത്തിന്​ സന്നദ്ധത അറിയിച്ചത്​.

ലോകത്ത്​ ഏറ്റവും കൂടുതൽ പ്രകൃതി വാതകം ഇറക്കുമതി ചെയ്യുന്ന രാജ്യമാണ്​ ചൈന. ദീർഘകാലത്തെ ശക്​തരായ വാണിജ്യപങ്കാളിയുമായുള്ള ഇടപാടിൽ ഊർജ മന്ത്രിയും ഖത്തർ പെട്രോളിയം പ്രസിഡൻറും സി.ഇ.ഒയുമായ സാദ്​ ബിൻ ഷെറിന അൽ കാബി സന്തോഷം പ്രകടിപ്പിച്ചു.