ഖത്തർ എയർവേസ്​ നമ്പർ വൺ

ദോഹ: ലോകത്തിലെ ഏറ്റവും മികച്ച വിമാനക്കമ്പനിയായി ഖത്തർ എയർവേസിനെ തെരഞ്ഞെടുത്തു. ​േവ്യാമയാനരംഗത്തെ ​സുരക്ഷയും സേവന മികവും വിലയിരുത്തുന്ന റേറ്റിങ്​ ഏജൻസിയായ ആസ്​ട്രേലിയയിലെ എയർലൈൻ റേറ്റിങ്ങിൻെറ 2021ലെ പട്ടികയിലാണ്​ ഖത്തർ എയർവേസിനെ ലോകത്തിലെ ഏറ്റവും മികച്ച വിമാനക്കമ്പനിയായി തെരഞ്ഞെടുത്തത്​​. ബെസ്​റ്റ്​ മിഡിൽ ഈസ്​റ്റ്​ എയർലൈൻസ്​, മികച്ച കാറ്ററിങ്​ സംവിധാനം, ഏറ്റവും മികച്ച ബിസിനസ്​ ക്ലാസ്​ എന്നീ പുരസ്​കാരങ്ങളും ഖത്തർ എയർവേസ്​ സ്വന്തമാക്കി.

തുടർച്ചയായി മൂന്നാമത്തെ തവണയാണ്​ ബെസ്​റ്റ്​ ബിസിനസ്​ ക്ലാസ്​ സർവിസിനുള്ള പുരസ്​കാരം ഖത്തർ എയർവേസ്​ സ്വന്തമാക്കുന്നത്​. വ്യോമയാന മേഖലയിലെ വിദഗ്​ധരും സുരക്ഷാ വിഭാഗവും നടത്തുന്ന പരിശോധനയുടെ അടിസ്ഥാനത്തിലാണ്​ എയർലൈൻസ്​ റേറ്റിങ്​ നിശ്ചയിക്കുന്നത്​. യാത്രക്കുള്ള സുരക്ഷ, യത്രക്കാരുടെ സംതൃപ്​തി, അവർക്ക്​ ലഭ്യമാവുന്ന സേവനങ്ങൾ എന്നിവക്കാണ്​ മുൻഗണന. ഈ ഘടകങ്ങളുടെയെല്ലാം വിലയിരുത്തലിൻെറ അടിസ്ഥാനത്തിൽ നിശ്ചയിച്ച റേറ്റിങ്ങിലാണ്​ ഖത്തർ എയർവേസ്​ ഒന്നാം സ്ഥാനത്തെത്തിയത്​.

കോവിഡ്​ ലോകത്തെല്ലായിടത്തും ദുരിതം തീർത്ത നാളിൽ ഇടതടവില്ലാതെ സർവിസ്​ നടത്തിയും ഏറ്റവും സുരക്ഷിതമായ യാത്ര ഒരുക്കിയുമാണ്​ ഖത്തർ എയർവേസ്​ ഒന്നാമതായത്​. 'ഈ വർഷത്തെ ഏറ്റവും മികച്ച എയർലൈനായി ഖത്തർ എയർവേസ്​ മാറിയിരിക്കുന്നു. മധ്യേഷ്യയിലും നമ്പർ വൺ ആണ്​. കഴിഞ്ഞ 16 മാസം വ്യോമയാന മേഖല കടുത്ത പ്രതിസന്ധി നേരിടുകയും, ഒ​ട്ടേറെ വിമാനക്കമ്പനികൾ ​സേവനം നിർത്തിവെക്കുകയും ചെയ്​തപ്പോഴും ഉത്തരവാദിത്തത്തോടെ സേവനം ചെയ്​താണ്​ ഖത്തർ ​എയർവേസ്​ വേറിട്ട മാതൃക തീർത്തത്​. യാത്രക്കാർക്ക്​ ഏറ്റവും വിശിഷ്​ടവും സുരക്ഷിതവുമായ അനുഭവം സൃഷ്​ടിക്കുകയെന്നത്​ ഞങ്ങളുടെ രക്തത്തിൽ അലിഞ്ഞുചേർന്നതാണ്​. ആകാശത്തും ഭൂമിയിലും പഞ്ചനക്ഷത്ര സൗകര്യത്തോടെ ആരോഗ്യകരവും സംതൃപ്​തവുമായ സേവനമൊരുക്കുകയാണ്​ ലക്ഷ്യം.

അതിനുള്ള അംഗീകാരമാണ്​ ഈ പുരസ്​കാരം' -ഖത്തർ എയർവേസ്​ ഗ്രൂപ്​ ചീഫ്​ എക്​സിക്യൂട്ടിവ്​ അക്​ബർ അൽ ബാകിർ പറഞ്ഞു. എയർ ന്യൂസിലൻഡ്​, സിംഗപ്പൂർ എയർലൈൻസ്​, കൻറാസ് (ആസ്​ട്രേലിയ)​, എമിറേറ്റ്​സ് (യു.എ.ഇ)​, കാതായ്​ പസഫിക്​ (ഹോ​ങ്കോങ്​), ​വിർജിൻ അറ്റ്​ലാൻറിക് (ബ്രിട്ടൻ)​, യുനൈറ്റഡ്​ എയർലൈൻസ്​ (അമേരിക്ക), ഇ.വി.എ എയർ (തായ്​വാൻ), ബ്രിട്ടീഷ്​ എയർവേസ്​ എന്നിവരാണ്​ ആദ്യ 10 സ്ഥാനങ്ങളിൽ. യു.എ.ഇയുടെ മറ്റൊരു വിമാന കമ്പനിയായ ഇത്തിഹാദ്​ എയർവേസാണ്​ 20 അംഗ പട്ടികയിലെ അവസാന സ്ഥാനക്കാർ.