ഖത്തർ എയർവേസ്​​ അമേരിക്കൻ സർവിസുകൾ 12 ആക്കുന്നു; പ്രതിവാരം 85 വിമാനങ്ങൾ

ദോഹ: ജൂൺ ഒന്നു മുതൽ അമേരിക്കയിലെ അറ്റ്​ലാൻറയിലേക്കുള്ള ഖത്തർ എയർവേസ്​​ സർവിസ്​ പുനരാരംഭിക്കുമെന്ന് ഖത്തർ എയർവേസ്​​ അറിയിച്ചു. ഇതോടെ മഹാമാരിക്കുമുമ്പ് ഖത്തറിൽനിന്ന്​്​ അമേരിക്കയിലേക്ക് നടത്തിയിരുന്ന സർവിസുകൾ എല്ലാം പ്രവർത്തനക്ഷമമാകും. കോവിഡ്-19ന് മുമ്പുണ്ടായിരുന്ന സർവിസുകളെക്കാൾ രണ്ട് അധിക സർവിസുകൾകൂടി അമേരിക്കയിലേക്ക് ഖത്തർ എയർവേസ്​​ പ്രവർത്തിപ്പിക്കുന്നുണ്ട്. കൂടാതെ ബോസ്​റ്റൺ, മിയാമി, ന്യൂയോർക്, ഫിലഡെൽഫിയ, സാൻ ഫ്രാൻസിസ്​കോ, സിയാറ്റ്​ൽ എന്നിവിടങ്ങളിലേക്കുള്ള സർവിസുകളുടെ എണ്ണവും വർധിപ്പിക്കുമെന്ന് ഖത്തർ എയർവേസ്​​ വ്യക്തമാക്കി. ഇതോടെ ഖത്തർ-അമേരിക്ക സെക്ടറിൽ പ്രതിവാരം പ്രവർത്തിക്കുന്ന വിമാന സർവിസുകളുടെ എണ്ണം 85 ആയി കൂടും.

സർവിസുകൾ വർധിപ്പിക്കുന്നതോടെ കേപ് ടൗൺ, മാലിദ്വീപ്, സിഷൽസ്​, സാൻസിബാർ തുടങ്ങി ആഫ്രിക്കയിലെയും ഏഷ്യയിലെയും മിഡിലീസ്​റ്റിലെയും ഖത്തർ എയർവേസിെൻറ വിനോദസഞ്ചാര സഞ്ചാര കേന്ദ്രങ്ങളുമായി സർവിസുകൾ ബന്ധിപ്പിക്കാനാകും. കോവിഡുപോലുള്ള മഹാമാരിയുടെ വെല്ലുവിളികൾക്കിടയിലും അമേരിക്കയിലെ തങ്ങളുടെ യാത്രാക്കാരോടും വ്യാപാര പങ്കാളികളോടുമുള്ള പ്രതിബദ്ധത നിറവേറ്റാൻ ഖത്തർ എയർവേസ്​​ സന്നദ്ധരാണെന്നും സാൻ ഫ്രാൻസിസ്​കോ, സിയാറ്റ്​ൽ എന്നീ പുതിയ രണ്ട് സർവിസുകളോടൊപ്പം അമേരിക്കയിലേക്കുള്ള ഖത്തർ എയർവേസ്​​ സർവിസുകൾ കോവിഡിനുമുമ്പുള്ള ക്രമത്തിലേക്ക് തിരിച്ചെത്തിയിരിക്കുകയാണെന്നും ഗ്രൂപ് സി.ഇ.ഒ അക്ബർ അൽ ബാകിർ പറഞ്ഞു.അറ്റ്​ലാൻറയിലേക്ക് ആഴ്ചയിൽ നാല് വിമാനങ്ങളാണ് സർവിസ്​ നടത്തുക. ബോസ്​റ്റണിലേക്ക് ജൂലൈ മൂന്നു മുതൽ നാല് സർവിസുകളായും മിയാമിയിലേക്ക് ജൂലൈ ഏഴു മുതൽ അഞ്ച് സർവിസുകളായും എണ്ണം വർധിപ്പിക്കും. ന്യൂയോർക്കിലേക്ക് ജൂലൈ 21 മുതൽ പ്രതിദിനം രണ്ട് വിമാന സർവിസുകളാണ് ആരംഭിക്കുക.