ഫാർമ ഡോട്ട് എയറോയിൽ ഇനി ഖത്തർ എയർവേയ്സ്​ കാർഗോയും

ദോഹ: ഫാർമസ്യൂട്ടിക്കൽ ഉൽപന്നങ്ങളുടെ ഗതാഗത മേഖല കൂടുതൽ മികവുറ്റതാക്കുന്നതിന് രൂപവത്​കരിക്കപ്പെട്ട ആഗോള പ്ലാറ്റ്ഫോമായ ഫാർമ ഡോട്ട് എയ​റോയിൽ ഇനി ഖത്തർ എയർവേസ്​​ കാർഗോയും ഉണ്ടാകും. ഫാർമ ഡോട്ട് എയ​റോയിലെ ഖത്തർ എയർവേസ്​​ കാർഗോയുടെ അംഗത്വം കഴിഞ്ഞദിവസം മുതൽ നിലവിൽ വന്നു. അംഗത്വമെടുത്തതോടെ ഫാർമ ഡോട്ട് എയറോയുടെ ബോർഡ് യോഗങ്ങളിലും ഖത്തർ എയർവേസ്​​ പങ്കെടുക്കും.

ബെൽജിയത്തിലെ ബ്രസൽസ്​ ആസ്​ഥാനമായി പ്രവർത്തിക്കുന്ന നോൺ െപ്രാഫിറ്റ് ഓർഗനൈസേഷനാണ് (എൻ.പി.ഒ) ഫാർമ ഡോട്ട് എയറോ. ഫാർമസ്യൂട്ടിക്കൽ ഉൽപന്നങ്ങളുടെ ഗതാഗതം ലക്ഷ്യമിട്ട് എയർ കാർഗോ മേഖലയിലേക്ക് നേരിട്ട് സഹകരണം സ്​ഥാപിക്കുകയും വിതരണ ശൃംഖലയിൽ വിവിധ കാർഗോ കമ്പനികളുമായി നേരിട്ട് ബന്ധപ്പെടുന്നതിനുള്ള സൗകര്യമൊരുക്കുകയുമാണ് ഫാർമ ഡോട്ട് എയറോയുടെ ദൗത്യം.

ഫാർമസ്യൂട്ടിക്കൽ ഉൽപന്നങ്ങളുടെ വിതരണ ശൃംഖല സമഗ്രമാക്കുന്നതിൽ ഫാർമ ഡോട്ട് എയറോയുമായുള്ള സഹകരണം പ്രധാന പങ്കുവഹിക്കുമെന്ന് ഖത്തർ എയർവേസ്​​ കാർഗോ ചീഫ് ഓഫിസർ ഗ്വിലാം ഹാലെക്സ്​ പറഞ്ഞു.

ഫാർമ എയറോയിൽ പൂർണ അംഗത്വമെടുത്തതോടെ വിപണി വിവരങ്ങൾ അറിയുന്നതിനും പങ്കുവെക്കുന്നതിനും കമ്പനിയെ പ്രാപ്തമാക്കുമെന്നും വിവിധ എയർ കാർഗോ കമ്പനികളുമായി കൂടുതൽ സഹകരണം സ്​ഥാപിക്കാനാകുമെന്നും അദ്ദേഹം കൂട്ടിച്ചേർത്തു.

പ്രധാനമായും ലൈഫ് സയൻസ്​, മെഡ് ടെക്ക്, ഫാർമ വ്യോമഗതാഗത ശൃംഖല കൂടുതൽ ശക്തിപ്പെടുമെന്നും പുരോഗമിക്കുമെന്നും അദ്ദേഹം ചൂണ്ടിക്കാട്ടി.ഫാർമ ഡോട്ട് എയറുമായി കൂടുതൽ സഹകരണം സ്​ഥാപിക്കുമെന്നും അദ്ദേഹം സൂചിപ്പിച്ചു.