ഖത്തർ എയർവേസ്​​ വലിയ കാർഗോ വിമാനങ്ങൾ വാങ്ങുന്നു

ദോഹ: വലിയ കാർഗോ വിമാനങ്ങൾ വാങ്ങാൻ ഖത്തർ എയർവേസിന്​ പദ്ധതിയുണ്ടെന്ന്​ ഗ്രൂപ്​ സി.ഇ.ഒ അക്ബർ അൽ ബാകിർ. ഖത്തർ എയർവേസ്​​ കാർഗോയിലെ പഴയ കാർഗോ വിമാനങ്ങൾക്ക് പകരമായി പുതിയ വലിയ കാർഗോ വിമാനങ്ങൾ എത്തിക്കാനാണ്​ പദ്ധതി. റഷ്യയിൽ നടന്ന സെൻറ്പീറ്റേഴ്സ്​ ബർഗ്​ രാജ്യാന്തര സാമ്പത്തിക ഫോറത്തിലെ അഭിമുഖത്തിൽ സംസാരിക്കുകയായിരുന്നു അദ്ദേഹം.

പഴയ വിമാനങ്ങൾക്ക് പകരമായി പുതിയവ കാർഗോ നിരയിലേക്കെത്തിക്കാനുള്ള പദ്ധതി വർഷങ്ങളായി ഖത്തർ എയർവേസിനുണ്ട്. ബോയിങ്ങിലോ എയർബസിലോ കാർഗോ വിമാനങ്ങൾക്ക് ഓർഡർ നൽകാനാണ് പദ്ധതിയിടുന്നത്.

അതിനിടെ, മുപ്പതോ അതിലധികമോ കാർഗോ വിമാനങ്ങൾ ബോയിങ്ങിൽനിന്ന്​ സ്വന്തമാക്കാൻ ഖത്തർ എയർവേസ്​ വൻ നിക്ഷേപത്തിന് പദ്ധതിയിടുന്നതായി വാർത്ത ഏജൻസിയായ റോയിട്ടേഴ്സ്​ റിപ്പോർട്ട് ചെയ്യുന്നുണ്ട്​. ബോയിങ്ങി​െൻറ ഏറ്റവും പുതിയ ഫ്രൈറ്ററായ 777എക്സ്​ ജെറ്റ്​ ലൈനറാണ് ഖത്തർ എയർവേസിെൻറ പരിഗണനയിലുള്ളത്.

ഖത്തർ എയർവേസ്​ കാർഗോ നിരയിൽ നിലവിലുള്ള 30 വിമാനങ്ങളും ബോയിങ് കമ്പനിയുടേതാണ്​.ലോകത്തെ മുൻനിര കാർഗോ വാഹകരാണ്​ ഖത്തർ എയർവേസ്​ കാർഗോ. ഈയടുത്ത്​ കാർഗോ വിമാനനിരയിലേക്ക്​ മൂന്ന് ബോയിങ് 777 ൈഫ്രറ്ററുകൾ കൂടി കമ്പനി വാങ്ങിയിരുന്നു. ഇവ ദീർഘദൂര കാർഗോ സർവിസുകൾക്കും കാർഗോ ചാർട്ടർ സർവിസുകൾക്കുമായാണ്​ ഉപയോഗിക്കുന്നത്​. ഇതോടെ ആകെ കാർഗോ വിമാനങ്ങളുടെ എണ്ണം 30 ആയി വർധിച്ചു.

24 ബോയിങ് 777 ൈഫ്രറ്ററുകൾ, നാല് എയർബസ്​ എ330 ൈഫ്രറ്ററുകൾ, രണ്ട് ബോയിങ് 747 ൈഫ്രറ്ററുകൾ എന്നിവയാണ്ഖത്തർ എയർവേസ്​ കാർഗോ വിമാനങ്ങൾ.

ബോയിങ് 777 വിമാനങ്ങളുടെ ഇന്ധന ക്ഷമത, ലോങ് റേഞ്ച്, ഉന്നത പ്രവർത്തനശേഷി എന്നിവയെല്ലാം കമ്പനിയുടെ പ്രവർത്തനം സുസ്​ഥിരമാക്കുന്നതിൽ നിർണായകമാണ്​. ആഗോള വാണിജ്യ വിതരണ ശൃംഖലയിലെ ആവശ്യങ്ങൾ പൂർത്തീകരിക്കുന്നതിൽ ഇവ ഏറെ സഹായിക്കും. കോവിഡ് പ്രതിസന്ധികൾക്കിടയിൽ അവശ്യ വസ്​തുക്കൾ, മരുന്നുകൾ, മറ്റു അസംസ്​കൃത ഉൽപന്നങ്ങൾ എന്നിവ ലോകത്തുടനീളം എത്തിക്കുന്നതിൽ മാതൃകാപരമായ പങ്കാണ്​ കമ്പനി വഹിച്ചുകൊണ്ടിരിക്കുന്നത്​.