സ്വകാര്യമേഖല കയറ്റുമതി 85 ശതമാനം വർധിച്ചു

ദോഹ: 2021 ഒക്ടോബറിൽ രാജ്യത്തി​െൻറ സ്വകാര്യമേഖലയിൽനിന്നുള്ള കയറ്റുമതി 85 ശതമാനം വർധിച്ച് 230 കോടി റിയാലിലെത്തിയതായി ഖത്തർ ചേംബർ റിപ്പോർട്ട്. മുൻവർഷത്തെ കണക്കുകളുമായി താരതമ്യം ചെയ്യുമ്പോൾ കോവിഡ് മഹാമാരിയെത്തുടർന്നുണ്ടായ സാമ്പത്തിക ആഘാതത്തിൽനിന്നും കരകയറുന്നതി​െൻറ സൂചനയാണിതെന്നും കഴിഞ്ഞ വർഷം 124 കോടിയുടെ കയറ്റുമതിയാണ് നടന്നതെന്നും ഖത്തർ ചേംബർ വ്യക്തമാക്കി. രാജ്യത്തെ വ്യാപാരമേഖലക്ക് ഖത്തർ ചേംബറിന്‍റെ പിന്തുണയുണ്ടെന്നും നിക്ഷേപവും വളർച്ചയും േപ്രാത്സാഹിപ്പിക്കുന്നതിനാവശ്യമായ നടപടികളെല്ലാം ചേംബറി​െൻറ ഭാഗത്തുനിന്നുണ്ടെന്നും റിപ്പോർട്ടിൽ സൂചിപ്പിക്കുന്നു.

2021ൽ 56902 ഇലക്​ട്രോണിക് ഇടപാടുകളാണ് നടന്നത്​. കയറ്റുമതി സംബന്ധിച്ച് 42,321 സർട്ടിഫിക്കറ്റുകൾ നൽകി. 70,000 അംഗങ്ങളാണ് ഖത്തർ ചേംബറിന് കീഴിലുള്ളതെന്നും റിപ്പോർട്ടിൽ വ്യക്തമാക്കി. 2020 ഫെബ്രുവരി മാസത്തിലെ കണക്കുകളുമായി താരതമ്യം ചെയ്യുമ്പോൾ 2021 ഒക്ടോബറിലെ കയറ്റുമതിയിൽ 17.9 ശതമാനം വർധന രേഖപ്പെടുത്തിയതായും കോവിഡി​െൻറ തുടക്കത്തിലുണ്ടായിരുന്നതിൽനിന്നും 302 ശതമാനമാണ് കയറ്റുമതി മൂല്യം ഉയർന്നിരിക്കുന്നതെന്നും ഖത്തർ ചേംബർ പറയുന്നു. ഏറ്റവും കൂടുതൽ കയറ്റുമതി ഒമാനിലേക്കാണ്​. 23 ശതമാനമാണ്​ ഒമാനിലേക്കുള്ള കയറ്റുമതി രേഖപ്പെടുത്തുന്നത്​. രണ്ടാം സ്ഥാനത്തായി 22 ശതമാനവുമായി ഇന്ത്യയുണ്ട്​. ചൈന, തുർക്കി, ജർമനി എന്നീ രാജ്യങ്ങളാണ്​ തൊട്ടുപിന്നിലായുള്ളത്​. ഏറ്റവും കൂടുതൽ കയറ്റുമതിചെയ്തത് അവശ്യ-വ്യവസായിക എണ്ണയും അലുമിനിയം ഉൽപന്നങ്ങളുമാണ്​.