കൂളറിൽ നിന്ന്​ ഷോക്കേറ്റ്​ അപകടം വർധിക്കുന്നതായി പൊലീസ്​

ദുബൈ: കൂളറിൽ നിന്ന്​ ഷോക്കേറ്റ്​ അപകടമുണ്ടാകുന്ന സംഭവങ്ങൾ വർധിക്കുന്നതായി ദുബൈ പൊലീസ്​. അറ്റകുറ്റപ്പണി ശരിയായി നടത്താത്തതാണ്​ അപകടത്തിന്​ കാരണമെന്ന്​ പൊലീസ്​ ഫോറൻസിക്​ വിഭാഗം അറിയിച്ചു. വീട​ുകളുടെയും നിർമാണ മേഖലകളിലും സ്​ഥാപിക്കുന്ന കൂളറുകളിൽ നിന്നാണ്​ കൂടുതൽ അപകടങ്ങളുമുണ്ടാകുന്നത്​. ഇത്തരത്തിൽ അപകടമുണ്ടായാൽ ഉടമകൾക്കെതിരെ നടപടിയുണ്ടാകുമെന്ന്​ പൊലീസ്​ മുന്നറിയിപ്പ് ​നൽകി. കഴിഞ്ഞ ദിവസം വെള്ളംകുടിക്കുന്നതിനിടെ ഷോക്കേറ്റ്​ തൊഴിലാളി മരിച്ച പശ്ചാത്തലത്തിലാണ്​ അറിയിപ്പ്​. കഴിഞ്ഞ ജൂലൈ വരെ 117 ഇത്തരം അപകടങ്ങളാണ്​ എമിറേറ്റിൽ റിപ്പോർട്ട്​ ചെയ്​തതെന്ന്​ ഫോറൻസിക്​ എൻജിനീയറിങ്​ വിഭാഗം അറിയിച്ചു. സമയാസമയങ്ങളിൽ കൃത്യമായി അറ്റകുറ്റപ്പണികൾ നടത്താൻ ഉടമകളും കമ്പനിയും ശ്രദ്ധിക്കാത്തതാണ്​ അപകടത്തിനു​ കാരണമാകുന്നത്​. വീടുകൾക്ക്​ മുന്നിൽ കുടിവെള്ളത്തിനായി വാട്ടർ കൂളർ സ്​ഥാപിക്കുന്നവർ അറ്റകുറ്റപ്പണികൾ നടത്തണമെന്ന്​ പൊലീസ്​ ആവശ്യപ്പെട്ടു. തൊഴിലാളി മരിച്ച സംഭവത്തിൽ കൂളർ ഉടമക്കെതിരെ ക്രിമിനൽ നടപടി സ്വീകരിക്കുമെന്നും പൊലീസ്​ വ്യക്തമാക്കിയിട്ടുണ്ട്​.