അറബ് സിവിൽ ഏവിയേഷൻ എക്സിക്യൂട്ടിവിൽ ഖത്തറിന്​ ഇടം

ദോഹ: അറബ് സിവിൽ ഏവിയേഷൻ ഓർഗനൈസേഷൻ എക്സിക്യൂട്ടിവ് സമിതിയിലേക്ക് നടന്ന അംഗത്വ തെരഞ്ഞെടുപ്പിൽ ഖത്തറിന് വിജയം. മൊറോക്കൻ തലസ്ഥാനമായ റബാതിൽ നടന്ന സംഘടനയുടെ ജനറൽ അസംബ്ലി 26ാമത് സെഷനോടനുബന്ധിച്ച് നടന്ന തെരഞ്ഞെപ്പിലാണ് ഖത്തറിനെ എക്സിക്യൂട്ടിവ് സമിതി അംഗമായി തെരഞ്ഞെടുക്കപ്പെട്ടത്. ഖത്തർ സിവിൽ ഏവിയേഷൻ അതോറിറ്റി ചെയർമാൻ അബ്​ദുല്ല ബിൻ നാസർ ബിൻ തുർക്കി അൽ സുബൈഈയുടെ നേതൃത്വത്തിലുള്ള പ്രതിനിധി സംഘമാണ് യോഗത്തിൽ പങ്കെടുത്തത്.

അറബ് സിവിൽ ഏവിയേഷൻ സംഘടന എക്സിക്യൂട്ടിവ് സമിതിയിലേക്ക് ഖത്തറിനെ വീണ്ടും തെരഞ്ഞെടുത്തതിൽ അതിതായ സന്തോഷമുണ്ടെന്ന് തെരഞ്ഞെടുപ്പിനു ശേഷം അബ്​ദുല്ല അൽ സുബൈഈ പറഞ്ഞു.

സിവിൽ ഏവിയേഷൻ മേഖലയടക്കമുള്ള സംയുക്ത അറബ് പ്രവർത്തനങ്ങളുടെ എല്ലാ മേഖലകളിലും ഖത്തർ പ്രധാന പങ്ക് വഹിക്കുന്നുണ്ടെന്നും വീണ്ടും സമിതിയിലേക്ക് ഖത്തറിനെ തെരഞ്ഞെടുക്കപ്പെട്ടത് അതിനുള്ള അംഗീകാരമാണെന്നും അദ്ദേഹം വ്യക്തമാക്കി. 2018 മേയ് മാസത്തിൽ നടന്ന തെരഞ്ഞെടുപ്പിലും അറബ് സിവിൽ ഏവിയേഷൻ സംഘടനാ എക്സിക്യൂട്ടിവ് സമിതിയിലേക്ക് ഖത്തർ വിജയിക്കുകയും അംഗമായി തെരഞ്ഞൈടുക്കപ്പെടുകയും ചെയ്തിരുന്നു.