പി.എ. മുബാറക്​ ഖത്തറിൽ നിര്യാതനായി

ദോഹ: ഖത്തറിലെ മുതിർന്ന മാധ്യമ പ്രവർത്തകനും കെ.എം.സി.സി മുൻ സംസ്​ഥാന ​ജനറൽ സെക്രട്ടറിയുമായിരുന്ന പി.എ. മുബാറക്​ (66) ദോഹയിൽ അന്തരിച്ചു. രണ്ടുമാസത്തിലധികമായി അസുഖബാധിതനായി ഹമദ്​ ജനറൽ ആശുപത്രിയിൽ ചികിത്സയിലായിരുന്നു.

എറണാകുളം ജില്ല മുസ്​ലിംലീഗ്​ ഭാരവാഹിയായിരുന്ന ആലുവ പരേതനായ പി.എ. അബ്​ദുറഹ്​മാൻ കുട്ടിയുടെയും മൂവാറ്റുപുഴ പട്ടിലായികുടിയിൽ പരേതയായ എ.ജെ. ഫാത്തിമയുടെയും മകനാണ്​. ഭാര്യ നാജിയ മുബാറക്​ കഴിഞ്ഞ ഏപ്രിലിൽ കോവിഡ്​ ബാധിച്ച്​ ചികിത്സയിലിരിക്കെ മരണപ്പെട്ടു.

മക്കൾ: നാദിയ (ദുബൈ), ഫാത്തിമ (ഖത്തർ). മരുമക്കൾ: മുഹമ്മദ്​ ഷമീൻ (ദുബൈ), മുഹമ്മദ്​ പർവീസ്​ (ഖത്തർ ഫൗണ്ടേഷൻ). ​സഹോദരങ്ങൾ: പി.എ. മെഹബൂബ്​, ലത്തീഫ്​, അഹമ്മദ്​, ആമിന, സെയ്​തു, സുഹ്​റ, ജലാൽ, നിസാ അലി, റസിയകുട്ടി കമ്മദ്​.

ഖബറടക്കം ശനിയാഴ്​ച ദോഹയിൽ നടക്കുമെന്ന്​ ബന്ധുക്കൾ അറിയിച്ചു. മയ്യിത്ത്​ നമസ്​കാരം ​മഗ്​രിബ്​ നമസ്​കാരാനന്തരം അബൂഹമൂർ പള്ളിയിൽ.

നാല്​ പതിറ്റാണ്ടിലേറെയായി ഖത്തറിലുണ്ടായിരുന്ന പി.എ. മുബാറക്​ വിവിധ സാമൂഹിക സാംസ്​കാരിക സംഘടനാ നേതൃത്വത്തിലും സജീവമായിരുന്നു. വാണിജ്യ മന്ത്രാലയത്തിലെ മുൻ ഉദ്യോഗസ്​ഥനായിരുന്നു. ശേഷം, ബിസിനസ്​ കൺസൾട്ടൻറായും പ്രവർത്തിച്ചു. ചന്ദ്രിക ദിനപത്രത്തിന്‍റെറ ഖത്തറിലെ ആദ്യകാല ലേഖകനായിരുന്നു. നിര്യാണത്തിൽ ഖത്തർ ഇന്ത്യൻ മീഡിയാ ഫോറം അനുശോചിച്ചു.