പൊലീസ്​ പിടിച്ചെടുത്ത വാഹനങ്ങൾ ഉടമകൾക്ക് തിരിച്ചെടുക്കാം

ദോഹ: വിവിധ കാര്യങ്ങൾക്കായി അധികൃതർ പിടിച്ചെടുത്ത വാഹനങ്ങൾ ഉടമകൾക്ക്​ തിരിച്ചെടുക്കാൻ ഗതാഗത വകുപ്പ്​ അവസരമൊരുക്കുന്നു. ഇതിനായി ഒരുമാസത്തെ സമയമാണ്​ ഗതാഗത വകുപ്പ്​ അനുവദിച്ചിരിക്കുന്നത്​. മൂന്നു മാസത്തിലധികമായി അധികൃതർ നീക്കംചെയ്യുകയും ഇൻഡസ്​ട്രിയൽ ഏരിയയിലെ യാർഡിലേക്ക്​ മാറ്റുകയും ചെയ്​ത വാഹനങ്ങളിൽ തങ്ങളുടേത്​ ഉണ്ടെങ്കിൽ അവ ഈ സൗകര്യത്തിലൂടെ തിരിച്ചെടുക്കാൻ കഴിയും.

ഇൻഡസ്​ട്രിയൽ ഏരിയ സ്​ ട്രീറ്റ്​ നമ്പർ 52ലെ ട്രാഫിക്​ ഇൻവെസ്​റ്റിഗേഷൻ വകുപ്പിലാണ്​ ഇതുമായി ബന്ധപ്പെട്ട നടപടിക്രമങ്ങൾ പൂർത്തീകരിക്കേണ്ടത്​. പിഴ, ഗ്രൗണ്ട്​ ഫീസ്​ എന്നിവ അടച്ച്​ നടപടികൾ പൂർത്തീകരിച്ചാൽ വാഹനങ്ങൾ ഉടമകൾക്ക്​​ വീണ്ടെടുക്കാൻ കഴിയും. നവംബർ 18 മുതൽ ഒരു മാസത്തേക്കാണ്​ ഈ സേവനം ലഭ്യമാകുക. നിശ്ചിത സമയത്തിനകവും ഉടമകൾ ഹാജരായി നടപടികൾ പൂർത്തിയാക്കാത്ത വാഹനങ്ങൾ ട്രാഫിക്​ ജനറൽ ഡയറക്​ടറേറ്റ്​ ലേലത്തിൽ വെക്കും.