കെ​ങ്കേമമായി ഓണം

ദോഹ: കോവിഡ്​ നിയ​ന്ത്രണങ്ങൾക്കിടയിലും ഓ​ണാഘോഷം പൊടിപൊടിച്ച് ഖത്തറിലെ​ മലയാളിക്കൂട്ടങ്ങൾ.

മുൻ വർഷങ്ങളിലെ​ പോലെ മാസങ്ങൾ നീളുന്ന ആഘോഷങ്ങൾക്ക്​ ഇടമില്ലെങ്കിലും കുടുംബങ്ങളും ബന്ധുക്കളും സുഹൃത്തുക്കളും ഒത്തുചേർന്നും വിവിധ കൂട്ടായ്​മകളുടെ പ്രവർത്തകർ സംഘടിച്ചും കഴിഞ്ഞ ദിവസങ്ങളിൽ ഖത്തറി​ന്‍റെ വിവിധ ഭാഗങ്ങളിൽ ഓണം ആഘോഷമാക്കി.

സെറ്റ്​ മുണ്ടും സാരിയും അണിഞ്ഞ്​ മലയാളി മങ്കമാരായി അണിഞ്ഞൊരുങ്ങിയും പൂക്കളമൊരുക്കിയും ഖത്തറി​ന്‍റെ മണ്ണിലും കേരളത്തനിമ കാത്തു. കഴിഞ്ഞ വർഷത്തേക്കൾ ആഘോഷങ്ങൾക്ക്​ കൂടുതൽ പൊലിമയുണ്ടായിരുന്നു. എല്ലാവർക്കും വാക്​സിൻ ലഭ്യമായതും കോവിഡ്​ നിയ​ന്ത്രണങ്ങളിൽ ഇളവുകളുള്ളതും ഇൻഡോറിലും ഔട്ട്​​ഡോറിലും പരിമിതമായ എണ്ണത്തിൽ ആളുകൾക്ക്​ സംഘടിക്കാൻ കഴിഞ്ഞതും ആഘോഷങ്ങളെ ജനകീയമാക്കി. സദ്യകൾക്കാണ്​ തിര​ുവോണനാളിലെ തിരക്ക്​. ​​ലുലു ഹൈപ്പർമാക്കറ്റ്​, ഗ്രാൻഡ്​ ഹൈപ്പർമാർക്കറ്റ്​, ന്യൂ ഇന്ത്യൻ സുപ്പർമാർക്കറ്റ്​ തുടങ്ങി ഖത്തറിലെ റീ​ട്ടെയിൽ ശൃംഖലകളിൽ സദ്യക്ക്​ വലിയ തിരക്ക്​ അനുഭവപ്പെട്ടു. നേരത്തേ ബുക്​ ചെയ്​തവർക്ക്​ മാത്രമായിരുന്നു 20ഒാളം ഇനങ്ങളുള്ള സദ്യ നൽകിയത്​. ​ലേബർക്യാമ്പുകൾ, മലയാളി സംഘടനകൾ എന്നിവരുടെ നേതൃത്വത്തിൽ വിവിധ ഇടങ്ങളിൽ ഓണപരിപാടികളും നടന്നു.

ഫോ​ട്ട ഓണാഘോഷം

ദോഹ: ഫ്രണ്ട്സ് ഓഫ് തിരുവല്ല (ഫോട്ട) നേതൃത്വത്തില്‍ ഓണാഘോഷം കോവിഡ് പ്രോട്ടോകോള്‍ പ്രകാരം ആഘോഷിച്ചു. ഫോട്ട പ്രസിഡൻറ്​ ജിജി ജോണ്‍ അധ്യക്ഷതവഹിച്ചു. റജി.കെ ബേബി സ്വാഗതവും തോമസ്‌ കുര്യന്‍ നന്ദിയും പറഞ്ഞു. ഫോട്ടാ രക്ഷാധികാരി കെ. വി. തോമസ്‌, വനിത വിഭാഗം പ്രസിഡൻറ്​​ അനിത സന്തോഷ്‌ എന്നിവര്‍ സംസാരിച്ചു. കുരുവിള കെ. ജോര്‍ജ്, അനീഷ്‌ ജോര്‍ജ് മാത്യു, സജി പൂഴിക്കാല എന്നിവര്‍ പരിപാടികള്‍ക്ക് നേതൃത്വം നൽകി. ഹമദ് മെഡിക്കല്‍ കോര്‍പറേഷനില്‍ ആക്ടിങ്​ ഡയറക്ടര്‍ ഓഫ് നഴ്സിങ്​ ആയി നിയമിതയായ ഫോട്ടാ വനിതാ വിഭാഗം പ്രസിഡന്‍റ്​ അനിത സന്തോഷിനെ യോഗത്തില്‍ അഭിനന്ദിച്ചു. 30 വര്‍ഷത്തില്‍ അധികമായി തുടരുന്ന ഖത്തറിലെ പ്രവാസം ജീവിതം അവസാനിപ്പിച്ച്​, യു.എസിലേക്ക് പോകുന്ന ഫ്രണ്ട്സ് ഓഫ് തിരുവല്ല സ്ഥാപക അംഗവും ദോഹയിലെ സാമൂഹിക സാംസ്​കാരിക മേഖലയിലെ നിറസാന്നിധ്യവുമായ വിന്‍സെന്‍റ്​ ജേക്കബിനും കുടുംബത്തിനും യാത്രയയപ്പ് നൽകി. കെ.വി. തോമസ്‌ ഉപഹാരം സമര്‍പ്പിച്ചു. യാത്രയയപ്പിന്​ വിന്‍സെന്‍റ് ജേക്കബ്‌ നന്ദി പറഞ്ഞു.