ഒളിമ്പിക്സ് ബീച്ച് വോളി: ഖത്തറിന് ഇന്ന് പ്രീക്വാർട്ടർ

ദോഹ: ഒളിമ്പിക്സിൽ ഖത്തറിന്റെ മെഡൽ പ്രതീക്ഷയുമായി ബീച്ച് വോളി ടീം തിങ്കളാഴ്ച പ്രീക്വാർട്ടർ അങ്കത്തിനിറങ്ങുന്നു. പൂൾ ‘എ’യിൽ മൂന്നിൽ മൂന്ന് കളിയും ജയിച്ച് ഒന്നാം സ്ഥാനക്കാരായ ഷെരിഫ് യൂനുസ്-അഹമ്മദ് തിജാൻ സഖ്യം പ്രീക്വാർട്ടറിൽ ചിലിയൻ കൂട്ടി​നെ നേരിടും. എസ്തബൻ ഗ്രിമൽത്-മാർകോ ഗ്രിമൽത് സഖ്യമാണ് എതിരാളികൾ. ക്വാർട്ടർ ഫൈനലിൽ കടക്കുന്നതോടെ മെഡലിലേക്കുള്ള ദൂരം ഒരു ജയം അകലത്തിലെത്തും.

ഗ്രൂപ് റൗണ്ടിൽ ലോക ഒന്നാം നമ്പർ സഖ്യം ഉൾപ്പെടെയുള്ള ടീമുകൾക്കെതിരായിരുന്നു ഖത്തറിന്റെ ഷെരീഫ്-അഹമ്മദ് സഖ്യങ്ങളുടെ വിജയങ്ങൾ. ഇറ്റലി, സ്വീഡൻ, ആസ്ട്രേലിയ ടീമുകൾക്കെതിരെ നേടിയ മിന്നും ജയങ്ങൾ ഖത്തറിന് നോക്കൗട്ടിൽ ആത്മവിശ്വാസം ഇരട്ടിയാക്കും. ഗ്രൂപ് ‘ബി’യിൽ നിന്നും മൂന്നാം സ്ഥാനക്കാരായാണ് ചിലി പ്രീക്വാർട്ടറിലേക്ക് മുന്നേറിയത്. മൂന്ന് കളിയിൽ ഒരു ജയം മാത്രമായിരുന്നു അവരുടെ സമ്പാദ്യം.