പഴയ കറൻസി നോട്ടുകൾ ഡിസംബർവരെ മാറ്റിയെടുക്കാം

ദോഹ: ഖത്തറിലെ പഴയ കറൻസി നോട്ടുകൾ പ്രാദേശിക ബാങ്കുകളിൽനിന്ന്​ മാറ്റിവാങ്ങാനുള്ള സമയം ഖത്തർ സെൻട്രൽ ബാങ്ക്​ (ക്യൂ.സി.ബി) ദീർഘിപ്പിച്ചു. 2021 ഡിസംബർ വരെ പഴയ നോട്ടുകൾ മാറ്റിവാങ്ങാമെന്നാണ്​ പുതിയ അറിയിപ്പ്​. ഇതുസംബന്ധിച്ച്​ ബാങ്കുകൾ ഉപഭോക്​താക്കൾക്ക്​ അറിയിപ്പുകൾ അയക്കുന്നുണ്ട്​. നേരത്തേ നോട്ടുകൾ മാറ്റിവാങ്ങാനുള്ള അവസാനദിവസം ജൂലൈ ഒന്ന്​ ആയിരുന്നു. ഖത്തർ സെൻട്രൽ ബാങ്കിൻെറ ഉത്തരവ്​ പ്രകാരം പഴയ നോട്ടുകൾ മാറ്റാനുള്ള അവസാന ദിവസം 2021 ഡിസംബർ ആയിരിക്കുമെന്ന്​ ഖത്തർ ഇസ്​ലാമിക്​ ബാങ്ക്​ (ക്യൂ.ഐ.ബി) അയച്ച അറിയിപ്പിൽ പറയുന്നു. പഴയ നോട്ടുകൾ ഈ തീയതിക്കുള്ളിൽ എ.ടി.എമ്മുകളിൽ നിക്ഷേപിക്കുകയും ചെയ്യാം​.

ഇതിന്​ ശേഷം പഴയ നോട്ടുകൾക്ക്​ സാധുത ഇല്ലാതാകും. എന്നാൽ, പഴയ നോട്ടുകൾ പിൻവലിച്ചതിന്​ ശേഷമുള്ള 10 വർഷത്തിനുള്ളിൽ സെൻട്രൽ ബാങ്കിൽനിന്ന്​ മാത്രം അവ മാറ്റിവാങ്ങാൻ കഴിയും. എല്ലാ ബാങ്കുകളുടെയും എ.ടി.എമ്മുകളിൽ പഴയ നോട്ടുകൾ നിക്ഷേപിക്കാനുള്ള സൗകര്യമുണ്ട്​. ഇതിലൂടെ പുതിയ നോട്ടുകൾ ലഭിക്കാനുള്ള അവസരവുമുണ്ട്​.

2020 ഡിസംബർ 13നാണ്​ നാലാം സീരീസിലുള്ള ഖത്തരി കറസി നോട്ടുകൾ ​െസൻട്രൽ ബാങ്ക്​ പിൻവലിച്ചത്​. കഴിഞ്ഞ ഡിസംബർ 18ന്​ ദേശീയദിനത്തിൽ അഞ്ചാം സീരീസ്​ നോട്ടുകൾ വിനിമയത്തിൽ വരുകയും ചെയ്​തു. ഇതിന്​ പുറമേ 200 റിയാലിൻെറ പുതിയ നോട്ടും പുറത്തിറക്കിയിരുന്നു. ശൈഖ്​ അബ്​ദുല്ല ബിൻ ജാസിം ആൽഥാനിയുടെ ഫോ​ട്ടോ ആലേഖനം ചെയ്​തതാണ്​ പുതിയ 200ൻെറ നോട്ട്​. ഖത്തർ നാഷനൽ മ്യൂസിയവും മ്യൂസിയം ഓഫ്​ ഇസ്​ലാമിക്​ ആർട്ടും ഈ നോട്ടിൽ കാണാം​.

പുതിയ നോട്ടുകളുടെ മുൻവശത്തെ ഡിസൈൻ പരമ്പരാഗത ജ്യാമിതീയ പാറ്റേണുകളെ അടിസ്​ഥാനമാക്കിയുള്ളതാണ്​. ദേശീയപതാകയും ഖത്തരി സസ്യജാലങ്ങളും ഉൾക്കൊള്ളുന്നുമുണ്ട്​. നോട്ടിൽ കാണുന്ന പ്രത്യേക കവാടത്തിൻെറ ചിത്രം പരമ്പരാഗത ഖത്തരി വാസ്​തുവിദ്യയെയാണ്​ അടയാ​ളപ്പെടുത്തുന്നത്​.

നോട്ടിൻെറ പിറകുവശം ഖത്തരി പാരമ്പര്യം, ഇസ്​ലാമിക ചരിത്രം, സംസ്​കാരം, സസ്യജാലങ്ങൾ, ജന്തുജാലകങ്ങൾ, വിദ്യാഭ്യാസ–കായിക–സാമ്പത്തികമേഖലയിലെ വികസനമാണ്​ കാണിക്കുന്നത്​. പുതിയ നോട്ടുകളിലെ അക്കങ്ങളും സമാന്തരമായ വരകളും കാഴ്​ചത്തകരാർ ഉള്ളവർക്കുകൂടി വിനിമയം എളുപ്പമാക്കാനുള്ളതാണ്​.

നോട്ടുകൾ ​​ലൈറ്റിൽ പിടിച്ചാൽ​ ബാക്കിലെയും മുന്നിലെയും അപൂർണമായ ചിത്രങ്ങൾ പൂർണതയിൽ കാണുന്നതരത്തിലാകും. നോട്ടിൻെറ മൂല്യവും തെളിഞ്ഞുവരും. പുതിയ നോട്ടുകൾ ലൈറ്റിൽ പിടിച്ചാൽ​ ഖത്തറിൻെറ ദേശീയ എംബ്ലത്തിലെ വാട്ടർ മാർക്ക്​ കാണാം. നോട്ടിൻെറ മൂല്യത്തിൻെറ ഡിനോമിനേഷനും കാണാനാകും. ഓരോ സുരക്ഷാ ത്രഡുകളും നോട്ടിൻെറ മൂല്യത്തെയാണ്​ കാണിക്കുന്നത്​. നോട്ടുകൾ ചരിച്ചുവെച്ചുനോക്കിയാൽ ത്രിമാന ഛായാചിത്രം ദൃശ്യമാകുന്നവിധം മാറും. ​സുരക്ഷാത്രഡുകളും മാറുന്നതായി കാണാം. നോട്ടിലെ കവാടത്തിൻെറ ചിത്രത്തിലുള്ള പൂവിൻെറ നിറം മാറുകയും ചെയ്യും. നേരിയ വലയം ഈ പൂവിന്​ ചുറ്റും കറങ്ങുന്നതായും കാണാം.

പുതിയനോട്ടുകൾ നിലവിൽവന്നതോടെ പാർക്കിങ്​ അടക്കമുള്ള ചില സേവനങ്ങൾക്ക്​ പുതിയ നോട്ടുകൾ മാത്രമാണ്​ സ്വീകരിക്കുന്നത്​. കാർ പാർക്കിങ്ങിനുള്ള ഫീസ്​ ഈടാക്കുന്ന ഓ​ട്ടോമാറ്റിക്​ ​യന്ത്രങ്ങളിൽ ചിലതിൽ പ​ുതിയ നോട്ടുകൾ മാത്രമേ സ്വീകരിക്കുന്നുള്ളൂ. കോവിഡ്​ സാഹചര്യത്തിൽ നാട്ടിൽ കുടുങ്ങിയ ഖത്തർ പ്രവാസികൾക്ക്​ പഴയ നോട്ടുകൾ മാറ്റാനുള്ള കാലാവധി നീട്ടിനൽകിയത്​ ആശ്വാസകരമാകും. പലരുടെയും കൈവശം പഴയ നോട്ടുകൾ ഉണ്ടാകാം.