ഖത്തറിൽ നിക്കാഹ്​; ലളിതമാണ്​ നടപടിക്രമങ്ങൾ

ഇന്ത്യക്കാർക്ക് ഖത്തറിൽ വിവാഹം നടത്താനുള്ള നടപടിക്രമങ്ങൾ പ്രയാസകരമാണെന്നു​ പറഞ്ഞ്​ സമൂഹമാധ്യമങ്ങളിൽ ചില വിഡിയോകൾ പ്രചരിക്കുന്നുണ്ട്​. അടുത്തിടെ എ​െൻറ മക​െൻറ നിക്കാഹ് ദോഹയിൽ നടത്തിയിരുന്നു. ഇതിനാൽ ഇതുമായി ബന്ധപ്പെട്ട്​ നിരവധി പേർ കാര്യങ്ങൾ അന്വേഷിക്കുന്നുണ്ട്​. വളരെ ലളിതമാണ് ഖത്തറിലെ നടപടിക്രമങ്ങൾ എന്നാണ് എ​െൻറ അനുഭവം. കോവിഡ് പശ്ചാത്തലത്തിൽ നാട്ടിൽ പോവാൻ കഴിയാത്ത സാഹചര്യത്തിൽ ദോഹയിൽ വിവാഹകർമങ്ങൾ നടത്താൻ ഏറെ പേർ ആഗ്രഹിക്കുന്നുണ്ട്​. അത്തരമാളുകൾക്ക്​ പ്രയോജനപ്പെടുമെന്ന് കരുതിയാണ്​ ഈ കുറിപ്പ്​.

ഖത്തറിൽ സ്ഥിരതാമസക്കാരായ വധൂവരന്മാരുടെ കാര്യമാണ് സൂചിപ്പിക്കുന്നത്. ആദ്യം അൽസദ്ദിലുള്ള കുടുംബകോടതിയിൽ വിവാഹം നടത്താൻ ഉദ്ദേശിക്കുന്ന തീയതി കാണിച്ച് രജിസ്​റ്റർ ചെയ്യണം. നേരിട്ട്​ എത്തിയാൽ ചുരുങ്ങിയ സമയത്തിനുള്ളിൽ കോടതിയിലെ കാര്യങ്ങൾ ശരിയാക്കിക്കിട്ടും. ഇവിടെനിന്ന് വിവാഹകർമം നടത്തിത്തരാൻ ചുമതലപ്പെടുത്തിയ പ്രതിനിധിയുടെ പേരും ഫോൺ നമ്പറും ലഭ്യമാക്കും. ഇദ്ദേഹമാണ്​ വിവാഹത്തിന്​ കാർമികത്വം വഹിക്കുക. അതായത്​ ഖാദി. അദ്ദേഹത്തെ നേരിട്ട് വിളിച്ച് സമയവും സ്ഥലവും പറഞ്ഞുകൊടുത്താൽ അവർ ആവശ്യമായ ഫോറങ്ങളും മറ്റുമായി നിക്കാഹ് നടത്തുന്ന സ്ഥലത്ത് നിശ്ചിത സമയത്തു തന്നെ വരും. കോടതി ചുമതലപ്പെടുത്തിയ വ്യക്തി വരനോടും വധുവിനോടും വിവരങ്ങൾ ചോദിച്ചറിയും.

വിവാഹത്തിന് സമ്മതമാണോ എന്നതടക്കമുള്ള കാര്യങ്ങൾ അന്വേഷിച്ചറിഞ്ഞതിനു​ ശേഷം നിശ്ചിത സമ്മതപത്രത്തിൽ രണ്ടു പേരെക്കൊണ്ടും ഒപ്പുവെപ്പിക്കും. ശേഷം അദ്ദേഹം തന്നെ നിക്കാഹ് നടത്തികൊടുക്കും. അതിന് മുന്നോടിയായി വധൂവരന്മാർ അംഗീകൃത സ്വകാര്യ ക്ലിനിക്കുകളിൽനിന്ന് പ്രീമരിറ്റൽ മെഡിക്കൽ എടുക്കണം. ഇതിന്​ ഒരാൾക്ക്​ ആയിരം റിയാലാണ്​ വേണ്ടത്​. ഈ സർട്ടിഫിക്കറ്റ്​ ഒരാഴ്​ചക്കുള്ളിൽ കിട്ടും. നിക്കാഹ് സമയത്ത് മെഡിക്കൽ സർട്ടിഫിക്കറ്റ്, വധൂവരന്മാരുടെ ഒറിജിനൽ ​ഖത്തർ ഐ.ഡി കാർഡ്​, വധുവി​െൻറ പിതാവി​െൻറയും രണ്ടു സാക്ഷികളുടെയും ഒറിജിനൽ ഖത്തർ ഐ.ഡിയും കോപ്പിയും എന്നിവ കരുതണം. അത്രയും കാര്യങ്ങളേ കോടതി വഴി നടത്തുന്ന നിക്കാഹിന് ഇവിടെ ആവശ്യമുള്ളൂ. രണ്ട് ദിവസത്തിനുള്ളിൽ കോടതിയിൽനിന്നുള്ള ഔദ്യോഗിക മാരേജ് സർട്ടിഫിക്കറ്റ് കൈയിൽ കിട്ടുകയും ചെയ്യും.

ഈ സർട്ടിഫിക്കറ്റ് ഇന്ത്യൻ എംബസിയിൽനിന്ന് അറ്റസ്​റ്റ്​ ചെയ്യണമെന്നുണ്ടെങ്കിൽ അംഗീകൃത ടൈപ്പിങ്​ സെൻററിൽനിന്ന് ഇംഗ്ലീഷിലേക്ക് വിവർത്തനം ചെയ്യണം. ഇതിന്​ നിയമസാധുത ഉണ്ടാക്കാനായി ഖത്തർ ചേംബറിൽനിന്ന് അറ്റസ്​റ്റ്​ ചെയ്യിക്കണം. ചേംബറി​െൻറ ഓഫിസിൽ നേരിട്ട്​ പോയാൽ പെ​ട്ടെന്നു​ തന്നെ ഇത്​ ​നടത്തിത്തരും. 100 റിയാലാണ്​ ഫീസ്​. ശേഷം ഖത്തർ വിദേശകാര്യമന്ത്രാലയത്തിൽ അറ്റസ്​റ്റ്​ ചെയ്യണം. ഇതും നേരിട്ട്​ പോയാൽ അപ്പോൾ തന്നെ ചെയ്​തുകിട്ടുന്നതാണ്​. ഇവിടെയും 100 റിയാലാണ്​ ഫീസ്​. അതിനു ശേഷം മാത്രമാണ് എംബസി അറ്റസ്​റ്റ്​ ചെയ്യുക. എല്ലാത്തിനും ഒറിജിനൽ രേഖകളുമായാണ്​ പോകേണ്ടത്​. കോവിഡ്​കാലമായതിനാൽ വിവാഹചടങ്ങിലെ ആളുകളുടെ പ്രാതിനിധ്യം, പ​​ങ്കെടുക്കുന്നവരുടെ എണ്ണം തുടങ്ങിയവ കോവിഡ്​നടപടികൾ പാലിച്ചായിരിക്കണം.