നിഹാൻ പ്രീമിയർ ലീഗ്​ സീസൺ മൂന്ന്​ 26 മുതൽ

ദോഹ: ഖത്തറിലെ പ്രവാസി ക്രിക്കറ്റ് താരങ്ങൾ പങ്കെടുക്കുന്ന ടെന്നീസ്‌ ബാൾ ക്രിക്കറ്റ്‌ ലീഗായ ‘നിഹാൻ പ്രീമിയർ ലീഗ്‌ ടി 20’ മത്സരങ്ങൾക്ക്​ ഒക്ടോബർ 26ന്​ തുടക്കമാകും. ലീഗിനു മുന്നോടിയായുള്ള ക്യാപ്റ്റൻമാരുടെ യോഗം, ജഴ്സി വിതരണം, പൂൾ ഡ്രോ എന്നിവ നടന്നു. 28 ടീമുകളുടെയും ക്യാപ്റ്റന്മാരും സ്പോൺസർമാരായ ട്രൂത്ത്‌ റിയൽ എസ്​റ്റേറ്റ്‌ ഗ്രൂപ്പ്‌ പ്രതിനിധികളും പങ്കെടുത്തു. എൻ.പി.എൽ വിജയികൾക്ക്‌ ഇത്തവണ ക്യാഷ് അവാർഡ് പ്രഖ്യാപിച്ചിട്ടുണ്ട് ഒന്നാം സ്ഥാനത്തെത്തുന്ന ടീമിന് 5000 റിയാലും രണ്ടാം സ്ഥാനക്കാർക്ക്‌ 2500 റിയാലും നൽകും. മൂന്നും നാലും സ്ഥാനക്കാർക്ക്​ 1000 റിയാൽ വീതവും നൽകും. ആറ്​ മാസം നീളുന്ന ലീഗിൽ 28 ടീമുകളിലായി 600 ഓളം കളിക്കാർ മാറ്റുരക്കും. ഖത്തർ ക്രിക്കറ്റിന്‌ മികച്ച താരങ്ങളെ സംഭാവന ചെയ്ത എൻ.പി.എൽ ഇത്തവണയും പതിവ്‌ തെറ്റിക്കില്ലെന്ന പ്രതീക്ഷയിലാണ്‌ ടീം ക്യാപ്റ്റന്മാർ. ടെന്നീസ് ബാൾ ക്രിക്കറ്റിന്​ പരമാവധി പ്രോത്സാഹനം നൽകുകയുമാണ് ലക്ഷ്യമെന്നു ലീഗ് ചെയർമാൻ അലി ഹസൻ, കോ ഓർഡിനേറ്റർ ഗദ്ദാഫി, കൺവീനർ അനുരാജ് എന്നിവർ പറഞ്ഞു.