കൂടുതൽ കയറ്റുമതി ഇന്ത്യയിലേക്ക്​

ദോഹ: കഴിഞ്ഞമാസങ്ങളിൽ കസ്​റ്റംസുമായി ബന്ധപ്പെട്ട ഖത്തറി​െൻറ കയറ്റുമതി കൂടുതൽ നടന്നത്​ ഇന്ത്യയിലേക്ക്. അതേസമയം, ഇറക്കുമതി നടന്നിരിക്കുന്നത്​ കൂടുതൽ അമേരിക്കയിൽനിന്നാണ്​. കഴിഞ്ഞമാസം ജനറൽ കസ്​റ്റംസ്​ അതോറിറ്റി റിലീസ്​ ചെയ്തത് 3,05,383 കസ്​റ്റംസ്​ ഡിക്ലറേഷനുകളാണ്​. എയർ കാർഗോ വിഭാഗത്തിൽ 2,82,390 ഡിക്ലറേഷനുകളും സമുദ്ര വിഭാഗം കസ്​റ്റംസിൽ 22,990 ഡിക്ലറേഷനുകളുമാണ് റിലീസ്​ ചെയ്തതെന്ന് ജി.എ.സി പുറത്തുവിട്ട പ്രതിമാസ റിപ്പോർട്ടിൽ വ്യക്തമാക്കുന്നു.

മണിക്കൂറിൽ 99 ശതമാനം എന്ന നിരക്കിലാണ് കസ്​റ്റംസ്​ ഡിക്ലറേഷനുകൾ. അമേരിക്കയിൽനിന്നാണ് ഖത്തറിലേക്ക് ഏറ്റവും വലിയ ഇറക്കുമതി നടന്നത്​. ഇന്ത്യയിലേക്കാണ് വലിയ കയറ്റുമതിയെന്നും റിപ്പോർട്ടിൽ ചൂണ്ടിക്കാട്ടുന്നു.

ഗവൺമെൻറ് ഏജൻസികൾക്കുള്ള കസ്​റ്റംസ്​ ഡിക്ലറേഷനുകളുടെ എണ്ണം 23,796 ആണ്​. കഴിഞ്ഞ ഏതാനും മാസങ്ങളായി ചരക്കുകളുടെ കസ്​റ്റംസ്​ ക്ലിയറൻസ്​ നടക്കുന്നത്​ ഇൻറർനെറ്റ് വഴിയാണ്​.

കോവിഡ് പശ്ചാത്തലത്തിലും വ്യക്തിഗത ചരക്കുകളുടെ ഇറക്കുമതിയിൽ വലിയ വർധനവാണ് രേഖപ്പെടുത്തിയിരിക്കുന്നത്​. ഡി.എച്ച്.എൽ, അരാമെക്സ്​ പോലെയുള്ള കൊറിയർ കമ്പനികളുടെ ഇറക്കുമതി നിരക്കിൽ 40 ശതമാനം വർധനവുണ്ടായിട്ടുണ്ട്​.

ഷോപ്പിങ്ങിൽ ഒാൺലൈനാണ് എളുപ്പവും ആധുനികവുമായ മാർഗം. എന്നാൽ, ഒൺലൈൻ വഴി സ്വകാര്യ, വ്യക്തിഗത ഉൽപന്നങ്ങൾ എങ്ങനെ ഇറക്കുമതി ചെയ്യണമെന്നും കസ്​റ്റംസ്​ നടപടികളെ കുറിച്ചും അധിക പേർക്കും അറിയില്ല. 3,000 റിയാലിന് മുകളിലുള്ള വ്യക്തിഗത ഉൽപന്നങ്ങൾക്കും ചരക്കുകൾക്കും അഞ്ചു​ ശതമാനം ഫീസ്​ ഈടാക്കും.

കസ്​റ്റംസ്​ ഡ്യൂട്ടിയിൽനിന്ന്​ ഒഴിവാക്കിയ ഉൽപന്നങ്ങളുടെയും ചരക്കുകളുടെയും വിവരങ്ങൾ അൽ നദീബ് സിസ്​റ്റത്തിൽ ലഭ്യമാണെന്നും ജി.എ.സി അറിയിച്ചു.