കാണൂ, മുഹമ്മദ്​ അയാന്‍റെ സ്വപ്​നം സാക്ഷാത്​ക്കരിക്കുന്ന വിധം

ദോഹ: ശാന്തിനികേതൻ ഇന്ത്യൻ സ്​കൂളിലെ അഞ്ചാംക്ലാസുകാരൻ മുഹമ്മദ്​ അയാൻ അബ്​ദുസ്സലാം കൂടുതൽ മിടുക്കനാകുകയാണ്​. അല്ലെങ്കിൽ നോക്കൂ, തന്‍റെ കുഞ്ഞുസമ്പാദ്യം അവൻ എങ്ങിനെയാണ്​ വിനിയോഗിച്ചതെന്ന്​. അവന്‍റെ കുഞ്ഞിക്കൈകളാൽ നൽകിയ സൗജന്യ വിമാന ടിക്കറ്റുകളാൽ ഖത്തറിലെ ഏറ്റവും അർഹരായ രണ്ടു പ്രവാസികൾ ഉടൻ നാട്ടിലേക്ക്​ മടങ്ങും.

അവന്‍റെ വലിയ സ്വപ്​നങ്ങൾ സാക്ഷാത്​കരിക്കാൻ ഗൾഫ്​മാധ്യമവും മീഡിയാവണ്ണും ഒരുക്കിയ ‘മിഷൻ വിങ്​സ്​ ഓഫ്​ കംപാഷൻ’ പദ്ധതിയും കൂടെയുണ്ട്​. കോവിഡി​​​െൻറ പശ്​ചാത്തലത്തിൽ നാട്ടിലെത്താൻ യാത്രക്ക്​ അവസരം ലഭിച്ചിട്ടും ടിക്കറ്റിന്​ പണമില്ലെന്ന കാരണത്താൽ കഷ്​ടപ്പെടുന്ന പ്രവാസികൾക്ക്​ ഉദാരമനസ്​കരുടെ സഹായത്താൽ സൗജന്യ വിമാനടിക്കറ്റുകൾ നൽകുന്ന പദ്ധതിയാണ്​ ‘മിഷൻ വിങ്​സ്​ ഓഫ്​ കംപാഷൻ’. പദ്ധതിയെക്കുറിച്ച് കണ്ടുംകേട്ടുമറിഞ്ഞ മുഹമ്മദ്​ അയാൻ അന്നേ മനസിലിട്ടു ആ ആഗ്രഹം. അങ്ങിനെയാണ്​ സ്വരുക്കൂട്ടിയ സമ്പാദ്യം പദ്ധതി അധികൃതരെ ഏൽപ്പിക്കുന്നത്​.

മുഹമ്മദ്​ അയാൻ അബ്​ദുസ്സലാം ‘ഗൾഫ്​മാധ്യമം’ മാർക്കറ്റിങ്​ ആൻഡ്​ അഡ്​മിൻ മാനേജർ ആർ.വി. റഫീക്കിന്​​ തുക കൈമാറുന്നു

 

രണ്ട്​ വിമാനടിക്കറ്റിനുള്ള പണം ‘ഗൾഫ്​മാധ്യമം’ മാർക്കറ്റിങ്​ ആൻഡ്​ അഡ്​മിൻ മാനേജർ ആർ.വി. റഫീക്ക്​ ഏറ്റുവാങ്ങി. ഇതിനകം പദ്ധതി വഴി​ ഖത്തറിൽ നിന്ന്​ സൗജന്യ ടിക്കറ്റിൽ നാടണഞ്ഞത്​ 31 പ്രവാസികളാണ്​. എംബസിയില്‍ നിന്നും യാത്രക്ക​ുള്ള അനുമതി ലഭിച്ചവര്‍ക്ക് ടിക്കറ്റെടുക്കാനുള്ള സാമ്പത്തിക സഹായമാണ് പദ്ധതി അധികൃതർ കൈമാറുന്നത്​.

നേരത്തെ രജിസ്​റ്റർ ചെയ്​തവരിൽനിന്ന്​ തെരഞ്ഞെടുക്കുന്നവർക്ക്​ തുടർഅന്വേഷണങ്ങൾ നടത്തിയാണ്​ ടിക്കറ്റിനുള്ള പണം അനുവദിക്കുന്നത്​. ഇതിനായി പ്രത്യേക കമ്മിറ്റികളും പ്രവർത്തിച്ചുവരുന്നുണ്ട്​. അടുത്ത ഘട്ടത്തിൽ കേരളത്തിലേക്കുള്ള വിവിധ വിമാനങ്ങളിലുള്ളവർക്കും സൗജന്യ ടിക്കറ്റുകൾ നൽകുന്നു​ണ്ട്​.