കാരുണ്യച്ചിറക്​ വിടർത്തി ‘മിഷൻ വിങ്​സ്​ ഓഫ്​ കംപാഷൻ’ വിമാനം പറന്നു 

ദോഹ: അവരുടെ സ്വപ്​നങ്ങൾ പൂവണിയണമെന്ന്​ ഞങ്ങൾ അത്ര​േമൽ ആഗ്രഹിച്ചിരുന്നു. ഒരു പ്രതിസന്ധിയിലും അവർ  തനിച്ചാകരുതെന്നും തളരരുതെന്നും​ ഞങ്ങൾക്ക്​ നിർബന്ധവുമുണ്ടായിരുന്നു. അതിനാൽ അവർ ഉറങ്ങു​േമ്പാൾ ഞങ്ങൾ ആ  ലക്ഷ്യത്തിലേക്കായി ഉണർന്നിരുന്നു, എപ്പോഴും. കോവിഡ്​ രോഗം ജീവിതം കീഴ്​മേൽ മറിച്ചപ്പോൾ പ്രവാസത്തിൽ നിന്ന്​  തിരിച്ചുപോകണമെന്ന്​ ആഗ്രഹിക്കുന്നവർക്കായി​ ഞങ്ങൾ തുടക്കം മുതൽ കൂ​െട നിന്നു. അങ്ങിനെയാണ്​ ഗൾഫ്​മാധ്യമവും  മീഡിയാവണും ‘മിഷൻ വിങ്​സ്​ ഓഫ്​ കംപാഷൻ’ പദ്ധതി തയാറാക്കിയത്​. സഹായമനസ്​കരുടെ അകംനിറഞ്ഞ പിന്തുണയും  കൂടിയായപ്പോൾ അത്​ വളർന്നുപന്തലിച്ചു. ഇപ്പോഴിതാ പദ്ധതിക്ക്​ കീഴിൽ ഖത്തറിൽ നിന്നുള്ള ആദ്യ ചാർ​ട്ടേർഡ്​ വിമാനവും  ശനിയാഴ്​ച പറന്നുയർന്നു. 

കുഞ്ഞുങ്ങളടക്കം 171 യാത്രക്കാർ. ഇനി നാടിൻെറ പച്ചപ്പിലവർ മനസും ശരീരവും തണുപ്പിക്കും.  തങ്ങൾക്കും നാടിനും​ നല്ല ജീവിതം സമ്മാനിച്ച പ്രവാസത്തിലേക്കവർ വീണ്ടും മടങ്ങിയെത്തും. വിമാനത്തിലിരുന്നവർ അയച്ച  സന്ദേശങ്ങളിലെല്ലാം ഞങ്ങൾക്കുള്ള പ്രാർഥനകളായിരുന്നു, അത്​ മാത്രം മതി മുന്നോട്ടുള്ള പ്രയാണത്തിൽ ഞങ്ങൾക്ക്​  കൂടുതൽ കരുത്ത്​ നൽകാൻ. 

ശനിയാഴ്​ച രാവിലെ 9.30ഓടെയാണ്​ ‘മിഷൻ വിങ്​സ്​ ഓഫ്​ കംപാഷൻ’ ഇൻഡിഗോ  വിമാനം ദോഹ വിമാനത്താവളത്തിൽ  നിന്ന്​ കോഴിക്കോ​ട്ടേക്ക്​ പറന്നത്​. ഇന്ത്യൻ എംബസിയുടെ അനുബന്ധ സംഘടനയായ ഐ.സി.ബി.എഫ്​ ആണ്​ ഔദ്യോഗിക  നടപടികൾക്ക്​ സഹായിച്ചത്​.

ഖത്തറിൽ നിന്നുള്ള ‘മിഷൻ വിങ്​സ്​ ഓഫ്​ കംപാഷൻ’ വിമാനത്തിൽ നാട്ടിലെത്തുന്നവർക്കുള്ള യാത്രയയപ്പ്​ ചടങ്ങ്​ ദോഹ വിമാനത്താവളത്തിൽ ഗൾഫ്​ മാധ്യമം മീഡിയാവൺ എക്​സിക്യുട്ടീവ്​ കമ്മിറ്റി ചെയർമാൻ റഹീം ഓമശ്ശേരി ഉദ്​ഘാടനം ചെയ്യുന്നു

 

യാത്രയുമായി ബന്ധപ്പെട്ട എല്ലാ ഒരുക്കങ്ങളും വെള്ളിയാഴ്​ച രാത്രിയോടെ തന്നെ പൂർത്തീകരിച്ചിരുന്നു. നേരത്തേ തന്നെ  ടിക്കറ്റുകളും നൽകി. ശനിയാഴ്​ച രാവിലെ ആറ്​ മണിക്ക്​ തന്നെ യാത്രക്കാർ വിമാനത്താവളത്തിലെത്തി. ഈത്തപ്പഴം, സ്​ നാക്​സ്​, കുടിവെള്ളം, മാസ്​ക്​, സാനിറ്റൈസർ, പേന തുടങ്ങിയവ അടങ്ങിയ കിറ്റും യാത്രക്കാർക്കെല്ലാം നൽകി. യാത്രയയപ്പ്​  ചടങ്ങ്​ ഗൾഫ്​മാധ്യമംമീഡിയാവൺ എക്​സിക്യുട്ടീവ്​ കമ്മിറ്റി ചെയർമാൻ റഹീം ഓമശ്ശേരി ഉദ്​ഘാടനം ചെയ്​തു. ഏറെ  സന്തോഷം നൽകുന്ന നിമിഷമാണിതെന്നും ഇതിനകം നിരവധി പ്രവാസികളെയാണ്​ പദ്ധതിക്ക്​ കീഴിൽ സൗജന്യമായി  നാട്ടിലെത്തിച്ചതെന്നും അദ്ദേഹം പറഞ്ഞു. സൂക്ഷ്​മപരിശോധനക്ക്​ ശേഷമാണ്​ തീർത്തും അർഹരായവരെ   തെരഞ്ഞെടുക്കുന്നതെന്നും അദ്ദേഹം പറഞ്ഞു.

പദ്ധതി അംഗങ്ങളായ നാസർ വേളം, അഡ്വ. മുഹമ്മദ്​ ഇക്​ബാൽ, അസ്​ഹർ അലി, നാസർ ആലുവ, ഷാഫി എ.എം, അബ്​ദുൽ ഗഫൂർ എ.ആർ, ഹനീഫ, ഗൾഫ്​മാധ്യമം മാർക്കറ്റിങ്​ ആൻറ്​ അഡ്​മിൻ മാനേജർ ആർ.വി. റഫീക്ക്​, ബ്യൂറോ ചീഫ്​ ഒ.  മുസ്​തഫ, മീഡിയാവൺ മാർക്കറ്റിങ്​ മാനേജർ നിഷാന്ത്​ തറമ്മേൽ, ബ്യൂറോ ചീഫ്​ പി.സി. സൈഫുദ്ദീൻ, അമീർ അലി, നബീൽ  മാരാത്ത്​ എന്നിവർ പ​ങ്കെടുത്തു.

ഇതിനകം പദ്ധതിക്ക്​ കീഴിൽ ഖത്തറിൽ നിന്ന്​ വന്ദേഭാരത്​ വിമാനങ്ങളിലും വിവിധ ചാർ​ട്ടേർഡ്​ വിമാനങ്ങളിലുമായി ആകെ  158 പേരെയാണ്​ സൗജന്യമായി നാട്ടിലെത്തിച്ചത്​. ഇന്ന്​ പറന്ന വിമാനത്തിലെ 171 പേരും ചേരുന്നതോടെ പദ്ധതിക്ക്​ കീഴിൽ  നാട്ടിലെത്തുന്നവരുടെ എണ്ണം 329 ആകും.