മിഷൻ വിങ്​സ്​ ഒാഫ്​ കംപാഷൻ’: ഖത്തറിലെ അൽഹബാരി ഗ്രൂപ്പ്​ 25 ടിക്കറ്റുകൾ നൽകി

ദോഹ: ‘ഗൾഫ്​ മാധ്യമ’വും മീഡിയ വണ്ണും ചേർന്നൊരുക്കിയ ‘മിഷൻ വിങ്​സ്​ ഒാഫ്​ കംപാഷൻ’ പദ്ധതിയിലേക്ക്​ ഖത്തറിലെ  അൽഹബാരി ഗ്രൂപ്പ്​ 25 വിമാനടിക്കറ്റുകൾ നൽകി. സ്​ക്രാപ്പ്​ ട്രേഡിങ്​, കൺസ്​ട്രക്ഷൻ, ഹോൾ സെയിൽ ആൻറ്​ റീടെയ്​ൽ,  റിയൽഎസ്​റ്റേറ്റ്​, ട്രാൻസ്​പർ​ട്ടേഷൻ രംഗങ്ങളിലെ പ്രമുഖ കമ്പനിയാണ്​ അൽഹബാരി ഗ്രൂപ്പ്. ആർ.കെ.കുഞ്ഞമ്മദാണ്​  മാനേജിങ്​ ഡയറക്​ടർ. വികെ. റഷീദ്​, വി.കെ. ഇസ്​മായിൽ, ആർകെ. ഫൈസൽ എന്നിവർ ഡയറക്​ടർമാരാണ്​. ആർ.കെ.  റഫീക്ക്​ (എക്​സിക്യുട്ടീവ്​ ഡയറക്​ടർ)

. 25 വിമാനടിക്കറ്റുകൾക്കുള്ള തുകയുടെ ചെക്ക്​ മാനേജിങ്​ ഡയറക്​ടർ  ആർ.കെ.കുഞ്ഞമ്മദ്​ ഗൾഫ്​മാധ്യമം മീഡിയാവൺ എക്​സിക്യുട്ടീവ്​ കമ്മിറ്റി അംഗം അഡ്വ. മുഹമ്മദ്​ ഇക്​ബാലിന് കൈമാറി.  ഡയറക്​ടർമാരായ വി.കെ.ഇസ്​മായിൽ, ആർ.കെ. ഫൈസൽ, ഗ്രൂപ്പ് ജനറൽ മാനേജർ മാസിൻ മുഹമ്മദ്​, ഫിനാൻസ്​ മാനേജർ ടി.കെ. ഇസ്​മായിൽ, സമീർ, നാഫിസബ്​രി എന്നിവരും ചടങ്ങിൽ പ​ങ്കെടുത്തു.

നാടണയാൻ ആശയേറെയുണ്ടായിട്ടും വിമാനടിക്കറ്റിന്​ പണമില്ലെന്ന കാരണത്താൽ കഷ്​ടപ്പെടുന്ന പ്രവാസികൾക്കായി  ഒരുക്കിയ പദ്ധതിയാണ്​ ‘മിഷൻ വിങ്​സ്​ ഒാഫ്​ കംപാഷൻ’. ദിനംതോറും പദ്ധതിയുമായി സഹകരിക്കാൻ ഉദാരമനസ്​കർ എത്തുകയാണ്​. ഇന്ത്യൻ എംബസിയിൽ പേര്​ ചേർത്ത്​ യാത്രക്ക്​  തെരഞ്ഞെടുക്ക​പ്പെട്ട അർഹർക്കാണ്​ പദ്ധതിയിലൂടെ സൗജന്യവിമാനടിക്കറ്റ്​ നൽകുക.​ 

കോവിഡ്​ പശ്​ചാത്തലത്തിൽ ഇന്ത്യക്കാരെ നാട്ടിലെത്തിക്കാൻ ഇന്ത്യൻ സർക്കാർ അയക്കുന്ന പ്രത്യേക വിമാനങ്ങളിലെ  യാത്രക്ക്​ തെരഞ്ഞെടുക്കപ്പെട്ടിട്ടും ടിക്കറ്റിന്​ പണമില്ലാതെ നിരവധി പേരാണ്​ കഷ്​ടപ്പെടുന്നത്​. നൻമ വറ്റാത്ത പ്രവാസി സമൂഹവും വ്യവസായ നായകരും നിശബ്​ദ സേവകരും കൈകോർത്താണ്​ ‘വിങ്​സ്​ ഒാഫ്​  കംപാഷൻ’ പദ്ധതി യാഥാർത്ഥ്യമാക്കുന്നത്​. പദ്ധതിയുമായി സഹകരിക്കാൻ താൽപര്യമുള്ളവർക്ക്​ ഖത്തറിൽ 00974 5509  1170 നമ്പറിൽ വാട്​സ്​ആപ്പ്​ ചെയ്യാം.