‘മിലിപോൾ ഖത്തർ 2018’ പ്രദർശനം ഒക്ടോബറിൽ
text_fieldsദോഹ: അമീർ ശൈഖ് തമീം ബിൻ ഹമദ് ആൽഥാനിയുടെ രക്ഷാകർതൃത്വത്തിൽ 12ാമത് മിലിപോൾ ഖത്തർ ഒക്ടോബറിൽ ദോഹ എക്സിബിഷൻ ആൻഡ് കൺവെൻഷൻ സെൻററിൽ നടക്കും. മധ്യപൂർവ മേഖലയിലെ ആഭ്യന്തര സുരക്ഷ സംബന്ധിച്ച പ്രധാന പ്രദർശനമായ മിലിപോൾ ഖത്തർ ആഭ്യന്തരമന്ത്രാലയമാണ് സംഘടിപ്പിക്കുന്നത്. ഒക്ടോബർ 29 മുതൽ 31 വരെയാണ് മിലിപോൾ ഖത്തർ നടക്കുക. മിലിപോൾ ഖത്തർ പ്രദർശനം ആരംഭിച്ചതിന് ശേഷമുള്ള ഏറ്റവും വലിയ പ്രദർശനമായിരിക്കും ഒക്ടോബറിൽ നടക്കുക. ഈ വർഷം മുതൽ സിവിൽ ഡിഫൻസ് പ്രദർശനവും സമ്മേളനവും മിലിപോൾ ഖത്തറിൽ ഉൾപ്പെടുത്തിയിട്ടുണ്ടെന്നും ആഭ്യന്തരമന്ത്രാലയം വാർത്താസമ്മേളനത്തിൽ അറിയിച്ചു.
മിലിപോൾ ഖത്തർ കമ്മിറ്റി പ്രസിഡൻറ് ബ്രിഗേഡിയർ നാസർ ബിൻ ഫഹദ് ആൽഥാനി, ആഭ്യന്തരമന്ത്രാലയത്തിലെ ലോജിസ്റ്റിക്സ് ഡയറക്ടറേറ്റ് അസി.ഡയറക്ടർ ബ്രിഗേഡിയർ സഈദ് റാഷിദ് അൽ ശാഫി, മിലി പോൾ എക്സിബിഷൻ ഡയറക്ടർ മ്യൂറിയേൽ കഫൻറാരിസ് തുടങ്ങിയവർ വാർത്താ സമ്മേളനത്തിൽ പങ്കെടുത്തു. പൊതുജനങ്ങളുടെ സംരക്ഷണവും സുരക്ഷയും ഉറപ്പാക്കുന്നതുമായി ബന്ധപ്പെട്ടും പ്രതിരോധം, സുരക്ഷാ മേഖലകളിലെ ഏറ്റവും പുതിയ സംവിധാനങ്ങൾ സംബന്ധിച്ചും ഉൗന്നൽ നൽകിയാണ് 'മിലിപോൾ ഖത്തർ 2018' സംഘടിപ്പിക്കുന്നത്. കൂടാതെ തത്സമയ ചോദ്യോത്തര പരിപാടികളും മിലിപോളിൽ സംഘടിപ്പിക്കുന്നുണ്ട്. സുരക്ഷാമേഖലയിലെ ഏറ്റവും പുതിയ സംവിധാനങ്ങൾ നേരിട്ട് വീക്ഷിക്കുന്നതിന് സന്ദർശകർക്ക് പ്രത്യേക അവസരവും സംഘാടകർ ഒരുക്കും.
കേസ് സ്റ്റഡീസ് ഉൾപ്പെടെയുള്ള വിജ്ഞാന പ്രദമായ സെഷനുകളും ലോക നേതാക്കളെ പങ്കെടുപ്പിച്ചു കൊണ്ടുള്ള പ്രധാനപ്പെട്ട ചർച്ചകളും വിശകലനങ്ങളും ഇതോടനുബന്ധിച്ച് നടത്തും. സിവിൽ ഡിഫൻസിനെ മിലിപോളിെൻറ ഭാഗമായി ചേർത്തത് വലിയ മാറ്റമാണെന്നും മിഡിലീസ്റ്റിലെ ആഭ്യന്തര സുരക്ഷ സംബന്ധിച്ച പ്രധാനപ്പെട്ട പ്രദർശനമാണിതെന്നും വാർത്താ സമ്മേളനത്തിൽ ബ്രിഗേഡിയർ നാസർ ബിൻ ഫഹദ് ആൽഥാനി പറഞ്ഞു.
അന്താരാഷ്ട്ര പ്രദർശനങ്ങളുടെയും സമ്മേളനങ്ങളുടെയും പ്രധാന കേന്ദ്രമായി ഖത്തർ മാറിയിരിക്കുന്നു. മിലിപോൾ പോലെയുള്ള വമ്പൻ പരിപാടികൾ അതിനുള്ള തെളിവാണെന്നും സുരക്ഷാ മേഖലയിലെ പ്രഫഷണലുകൾക്കും സേവനദാതാക്കൾക്കും കൂടിക്കാഴ്ചകൾ നടത്താനും ആശയങ്ങൾ കൈമാറുന്നതിനുമുള്ള സുവർണാവസരമാണ് മിലിപോൾ ഒരുക്കുന്നതെന്നും അദ്ദേഹം കൂട്ടിച്ചേർത്തു. 1996 മുതൽ ഖത്തർ ആഭ്യന്തരമന്ത്രാലയവും ഫ്രഞ്ച് കമ്പനിയായ കോമെക്സ്പോസിയവുമാണ് മിലിപോൾ ഖത്തർ സംഘടിപ്പിച്ചുവരുന്നത്. രണ്ട് വർഷം കൂടുമ്പോൾ സംഘടിപ്പിക്കുന്ന മിലിപോളിൽ പങ്കെടുക്കുന്നതിനായി പൊതുസുരക്ഷാ മേഖലയിൽ നിന്നുള്ള വിദഗ്ധരാണ് ഖത്തറിലേക്ക് എത്തുന്നത്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.