ഫലസ്​തീൻെറ സൗന്ദര്യവുമായി 'മിയ' പ്രദർശനം

ദോഹ: ഇസ്രായേലിൻെറ കടന്നു കയറ്റത്തിൽ ലോകത്തിൻെറ കണ്ണീരായി മാറിയ ഫലസ്​തീൻെറ സൗന്ദര്യ മുഖം അടയാളപ്പെടുത്തി ഖത്തറിലെ ഇസ്​ലാമിക് ആർട്ട് മ്യൂസിയം (മിയ) ലൈബ്രറിയിൽ ഫലസ്​തീൻ എക്​സിബിഷൻ.

'ബ്യൂട്ടിഫുൾ മെമ്മറീസ്​ ഓഫ് ഫലസ്​തീൻ' എന്ന പേരിലുള്ള പ്രദർശനം സെപ്തംബർ 30 വരെ തുടരും. മിയ ലൈബ്രറിയിലെ അപൂർവ ശേഖരത്തിൽനിന്നുള്ള പുസ്​തകങ്ങളാണ് പ്രദർശനത്തിലുള്ളത്.

യാത്ര വിവരണങ്ങളായി യൂറോപ്യൻ മാഗസിനുകളിൽ പ്രസിദ്ധീകരിച്ച കഥകൾ, ചരിത്രങ്ങൾ തുടങ്ങിയ ഉൾപ്പെടുന്നതാണ് പുസ്​തകങ്ങൾ.അറബ് ലോകത്തിൻെറ വശ്യതയെ വർണിക്കുന്ന പ്രസിദ്ധീകരണങ്ങളാണ് ഇവയിൽ അധികവും.

പ്രദർശനത്തിൻെറ ഭാഗമായി വെബിനാറുകൾ, എംേബ്രായ്ഡറി, ലാൻഡ്സ്​കേപ്പ് പെയിൻറിങ്​ ശിൽപശാലകൾ എന്നിവയും മ്യൂസിയം അധികൃതർ സംഘടിപ്പിക്കുന്നുണ്ട്. www.mia.org.qa/en/library എന്ന മിയ ലൈബ്രറിയുടെ വെബ് പേജിലൂടെയും പ്രദർശനം കാണാൻ സാധിക്കും.

ശനി മുതൽ വ്യാഴം വരെ രാവിലെ ഒമ്പതു മുതൽ വൈകീട്ട് ഏഴു വരെയാണ് മ്യൂസിയം ലൈബ്രറി പ്രവൃത്തി സമയം. വെള്ളിയാഴ്ച ഉച്ചക്ക് ഒന്നു മുതൽ വൈകീട്ട് ഏഴു​ വരെയും. കോവിഡ് സുരക്ഷ മാനദണ്ഡങ്ങൾ പാലിച്ച് മ്യൂസിയത്തിനുള്ളിലേക്ക്​ സന്ദർശകരുടെയും ജീവനക്കാരുടെയും പ്രവേശനം പരിമിതപ്പെടുത്തിയിട്ടുണ്ട്.മ്യൂസിയത്തിലെത്തുന്നതിന് മുമ്പായി https://visit.qm.org.qa/ എന്ന ലിങ്കിൽ പ്രവേശിച്ച് ടിക്കറ്റ് ബുക്ക് ചെയ്യണം.