എജുക്കേഷൻ സിറ്റിയിൽ ഉയരുന്നു; മരുഭൂമിയിലെ വജ്രം

ദോഹ: മരുഭൂമിയിലെ വജ്രം എന്നറിയപ്പെടുന്ന എജുക്കേഷൻ സിറ്റിയിലെ സ്​റ്റേഡിയം നിർമ്മാണം ത്വരിതഗതിയിൽ പുരോഗമിക്കുന്നു. 2022 ലോകകപ്പി​​െൻറ പ്രധാന സ്​റ്റേഡിയങ്ങളിലൊന്നാണ് എജുക്കേഷൻ സിറ്റിയുടെ തെക്കൻ ക്യാമ്പസി​​െൻറ പടിഞ്ഞാറ് നിർമിക്കുന്ന സ്​റ്റേഡിയം. സങ്കീർണമായ ജ്യാമിതീയ മാതൃകകളിൽ നിന്ന് പ്രചോദനമുൾക്കൊണ്ടാണ് സ്​റ്റേഡിയത്തി​​െൻറ രൂപരേഖ തയാറാക്കിയിരിക്കുന്നത്.
സ്​റ്റേഡിയത്തി​​െൻറ കോൺക്രീറ്റ് ജോലികൾ അവസാനത്തിലേക്ക്​ അടുക്കുകയാണെന്നും സ്​റ്റേഡിയത്തിന് ചുറ്റും വി ആകൃതിയിലുള്ള കോളങ്ങൾ സ്​ഥാപിച്ചു കഴിഞ്ഞതായും സംഘാടകരായ സുപ്രീം കമ്മിറ്റി ഫോർ ഡെലിവറി ആൻഡ് ലെഗസി ട്വീറ്റ് ചെയ്തു.

പാരമ്പര്യ ഇസ്​ലാമിക വാസ്​തുശിൽപവിദ്യക്കുള്ള സമർപ്പണം കൂടിയായിരിക്കും ഖത്തർ ഫൗണ്ടേഷന്​ അകത്തെ ലോകകപ്പ് സ്​റ്റേഡിയം. എജുക്കേഷൻ സിറ്റിയുടെ കായിക വികസനത്തി​​െൻറ കേന്ദ്രബിന്ദു കൂടിയായി സ്​റ്റേഡിയം മാറും. കൂടാതെ ഖത്തർ ഫൗണ്ടേഷ​​​െൻറ സാമൂഹിക വികസന പദ്ധതികളിൽ നിർണായക പങ്ക് വഹിക്കാനുമാകും. വിവിധ കലാ–വിനോദ പരിപാടികൾക്ക് സജ്ജമാക്കാൻ വിധം മാറ്റാൻ കഴിയുന്നതാണ് സ്​റ്റേഡിയത്തി​​െൻറ നിർമാണ ഘടന. പരിപാടികളുടെ സ്വഭാവമനുസരിച്ച് ഗ്രൗണ്ടും ഇരിപ്പിടങ്ങളും ക്രമീകരിക്കാനാകുമെന്നാണ് സംഘാടകർ അറിയിച്ചിരിക്കുന്നത്. 40000 സീറ്റുകളാണ് ക്വാർട്ടർ ഫൈനൽ ഘട്ടം വരെയുള്ള മത്സരത്തിന് തയ്യാറെടുക്കുന്ന സ്​റ്റേഡിയത്തിൽ ഒരുക്കുന്നത്. ലോകകപ്പിന് ശേഷം സീറ്റുകളുടെ എണ്ണം പകുതിയായി ചുരുക്കും. ബാക്കി വരുന്ന സീറ്റുകൾ വികസ്വര രാജ്യങ്ങളിലെ കായിക വികസനത്തിന് സംഭാവന ചെയ്യും.