മലയാളികൾ ഖത്തർ വഴി സൗദിയിൽ

ദോഹ/റിയാദ്​: സൗദിയിലേക്കും യു.എ.ഇയിലേക്കും പോകാനായി ഖത്തറിലെത്തിയ ആദ്യ സംഘങ്ങൾ ​ലക്ഷ്യത്തിലെത്തി. വ്യാഴാഴ്​ച രാത്രിയും വെള്ളിയാഴ്​ച പുലർച്ചെയുമായാണ്​ ഖത്തർ വഴിയുള്ള മലയാളികൾ സൗദിയിലെത്തിയത്​. ഗൾഫിലെ മറ്റെല്ലാ വഴിയും അടഞ്ഞപ്പോൾ തുറന്ന ഖത്തർ ഇടത്താവളമാക്കി, 14 ദിവസം തങ്ങിയ ശേഷമാണ്​ ഇവർ സൗദിയിലെത്തിയത്​.

വ്യാഴാഴ്​ച രാത്രി 9.10നുള്ള ഖത്തർ എയർവേസ്​ വിമാനത്തിൽ ജിദ്ദയിലിറങ്ങിയ കോഴിക്കോട് മുക്കം ചേന്ദമംഗലൂർ സ്വദേശി ജംഷീദ് റഹ്‌മാനാണ്​ ഖത്തർ മാർഗം സൗദിയിലെത്തിയ ആദ്യ മലയാളി. ജൂലൈ 14 നാണ്​ ഇദ്ദേഹം ഓൺ അറൈവൽ വിസയിൽ ഖത്തറിലിറങ്ങിയത്. യാത്രക്ക് 72 മണിക്കൂർ മുമ്പ്​ ആർ.ടി.പി.സി.ആർ പരിശോധന നടത്തി കോവിഡ്​ ബാധിച്ചിട്ടില്ലെന്ന്​ ഉറപ്പാക്കി. അത്​ തെളിയിക്കുന്ന നെഗറ്റിവ് സർട്ടിഫിക്കറ്റ്​ കൈയിൽ കരുതി. കൂടാതെ സൗദിയുടെ വിദേശികൾക്കുള്ള മുഖീം പോർട്ടലിൽ രജിസ്​റ്റർ ചെയ്യുകയും തവക്കൽനാ ആപ്പിൽ കോവിഡ് വാക്‌സിനേഷൻ പൂർത്തീകരിച്ചത് അപ്ഡേറ്റ് ചെയ്യുകയും ചെയ്തു.

ഇൗ നടപടികളെല്ലാം പൂർത്തീകരിച്ചത്​ യാത്ര സുഗമമാക്കിയതായി ജംഷീദ് 'ഗൾഫ്​ മാധ്യമ'ത്തോട്​ പറഞ്ഞു. ജിദ്ദ വിമാനത്താവളത്തിൽ ഒരു തരത്തിലുമുള്ള പരിശോധനയും നേരിടേണ്ടിവന്നില്ലെന്നും സാധാരണ നടപടിക്രമങ്ങൾ മാത്രമേ ഉണ്ടായിരുന്നുള്ളൂവെന്നും ജംഷീദ് പറഞ്ഞു. തവക്കൽനയിൽ ഇമ്യൂൺ സ്​റ്റാറ്റസ് അപ്ഡേറ്റ് ചെയ്തിരുന്നതിനാൽ നിർബന്ധിത സമ്പർക്കവിലക്ക്​ ഒഴിവായി. മലപ്പുറം കൊട്ടപ്പുറം സ്വദേശി കെ.കെ. അബ്​ദുൽ റസാഖ്, പാലക്കാട് എടത്തനാട്ടുകര സ്വദേശികളായ ശറഫുദ്ദീൻ, ബഷീർ എന്നിവരും വെള്ളിയാഴ്​ച പുലർ​െച്ചയോടെ സൗദിയിലെത്തി. ഇനിയുള്ള ദിവസങ്ങളിൽ ദോഹയിൽ നിന്ന് കൂടുതൽ പേർ സൗദിയിലെ വിവിധ നഗരങ്ങളിൽ എത്തും. നിലവിൽ നൂറുകണക്കിന്​ സൗദി പ്രവാസികളാണ് ഖത്തർ വഴി യാത്രക്കായി ദോഹയിലുള്ളത്.

ശ്രദ്ധിക്കേണ്ട കാര്യങ്ങൾ

തവക്കൽന ആപ്പിൽ ഇമ്യൂൺ സ്​റ്റാറ്റസ്​ ഉറപ്പാക്കുക. ശേഷം, ലഭിക്കുന്ന ഹെൽത്​ പാസ്​പോർട്ട്​ ഡൗൺലോഡ്​ ചെയ്​ത്​ പ്രി‍െൻറടുത്ത്​ കൈയിൽ സൂക്ഷിക്കുക. മുഖീം പോർട്ടലിലെ അറൈവൽ രജിസ്​ട്രേഷ​ൻ കോപ്പിയും സൂക്ഷിക്കുക. സൗദി റീ എൻട്രി വിസ കോപ്പി, വാക്​സിനേഷൻ സർട്ടിഫിക്കറ്റ്​ ഇത്രയും രേഖകൾ കൈവശം വെക്കൽ ദോഹയിൽ നിന്നുള്ള നടപടികൾ പൂർത്തിയാക്കാൻ എളുപ്പമാവും.