Begin typing your search above and press return to search.
exit_to_app
exit_to_app
Homechevron_rightGulfchevron_rightQatarchevron_rightഫിഫ ബെസ്റ്റ്​ വേദിയിലെ...

ഫിഫ ബെസ്റ്റ്​ വേദിയിലെ 'മലയാളി ബെസ്റ്റ്'

text_fields
bookmark_border
ഫിഫ ബെസ്റ്റ്​ വേദിയിലെ മലയാളി ബെസ്റ്റ്
cancel
camera_alt

ഫിഫ ബെസ്റ്റ്​ പുരസ്കാരവേദിയിലെ ഡിജിറ്റൽ ചുമരിൽ ഫിഫ ഫാൻ മൂവ്​മെന്‍റ്​ അംഗങ്ങൾ നിറഞ്ഞപ്പോൾ

ദോഹ: ലോകമെങ്ങുമുള്ള ഫുട്​ബാൾ ആരാധകരുടെ കണ്ണുകളെല്ലാം പതിഞ്ഞ വേദി. ഒരേസമയം, ലോകത്തിന്‍റെ വിവിധ ഭാഗങ്ങളിൽനിന്നായി ദശലക്ഷം പേർ വീക്ഷിച്ച ഫിഫ ദി ബെസ്റ്റ്​ പുരസ്കാര പ്രഖ്യാപനമായിരുന്നു കഴിഞ്ഞ രാത്രിയിൽ ഏറ്റവും വലിയ ഫുട്​ബാൾ വിശേഷം. സൂപ്പർതാരങ്ങൾക്ക്​ പോലും പ്രിയമായ ഈ വേദിയിൽ ഒരുനിമിഷമെങ്കിലും എത്തിനോക്കാനായെങ്കിൽ എന്ന്​ കൊതിക്കാത്ത ഫുട്​ബാൾ പ്രേമികളുണ്ടാവില്ല. കോവിഡ്​ പശ്ചാത്തലത്തിൽ മുൻവർഷത്തേതുപോലെ ഇക്കുറിയും കാണികളുടെ സാന്നിധ്യമില്ലാതെ നടന്ന ചടങ്ങിൽ,​ പക്ഷേ വേദിയിലെ കൂറ്റൻ ഡിജിറ്റൽ ചുമർ നിറയെ കാണികളുണ്ടായിരുന്നു. ലോകത്തിന്‍റെ പലഭാഗങ്ങളിൽ നിന്നായി തിരഞ്ഞെടുക്കപ്പെട്ട ഫുട്​ബാൾ ആരാധകർ. അവരിൽ അഞ്ചുപേർ മലയാളികളായിരുന്നുവെന്നതാണ്​ കേരളത്തിന്‍റെ ഫുട്​ബാൾ പ്രേമത്തെ ആഗോള ശ്രദ്ധയിലെത്തിക്കുന്നത്​. രണ്ടു പേർ ഖത്തറിലെ​യും രണ്ടു പേർ യു.എ.ഇയിലെയും പ്രവാസികൾ.

ആലുവ എടത്തല സ്വദേശി അജാസും കോഴിക്കോട്​ കുറ്റ്യാടി പാറക്കടവിൽനിന്നുള്ള ലബീബുമാണ്​ ഖത്തറിൽനിന്നുള്ള മലയാളി സാന്നിധ്യം. ഫിഫ ഫാൻ മൂവ്​മെന്‍റിൽ പ്രധാനിയായ മഞ്ചേരി സ്വദേശിയായ ജാമിറും തൃശൂർ സ്വദേശി സുബീഷ്​ വാസുദേവനുമായിരുന്നു യു.എ.ഇയിൽ നിന്നുള്ളവർ. ഇവർക്കൊപ്പം മുംബൈയിൽനിന്ന്​ നവീനുംകൂടി ചേർന്നതോടെ 250ഓളം പേരുമായി നിറഞ്ഞ വെർച്വൽ വാളിലെ മലയാളി സാന്നിധ്യമായി. ക്രിസ്റ്റ്യാനോ റൊണാൾഡോ നടന്ന്​ വേദിയിലെത്തുമ്പോഴും മികച്ച താരങ്ങൾക്കുള്ള പുരസ്കാരത്തിന്​ റോബർട്ട്​​ ലെവൻഡോവ്​സ്​കിയെയും അലക്സിയ പ്യൂറ്റെൽസിനെയും കോച്ചായി തോമസ്​ തുഷലിനെയുമെല്ലാം പ്രഖ്യാപിക്കുമ്പോൾ ചുമരിൽ നിറഞ്ഞ കൈയടികൾക്കിടയിൽ ഇവരും പങ്കുചേർന്നു. ഫിഫ നേരിട്ട്​ നിയന്ത്രിക്കുന്ന ഫാൻ മൂവ്​മെന്‍റിൽ 1500ഓളം അംഗങ്ങളാണുള്ളത്​. ഇവരിൽനിന്ന്​ തിര​ഞ്ഞെടുക്കപ്പെട്ട 250 പേരാണ്​ ഫിഫ ബെസ്റ്റ്​ ചടങ്ങിൽ പ​ങ്കെടുത്തത്​. ​അവാർഡ്​ ചടങ്ങിന്​ മുമ്പേ പ​ങ്കെടുക്കുന്ന അംഗങ്ങളെയെല്ലാം ഉൾപ്പെടുത്തി ട്രയൽസ്​ നടത്തിയായിരുന്നു​ ഒരുക്കം. ശനിയാഴ്ച മൂന്ന്​ മണി​ക്കൂറോളം നീണ്ട പരിശീലനം. ശേഷം, ചടങ്ങിന്​ 90 മിനിറ്റ്​ മുമ്പേ തന്നെ ഫാൻ വാളിലേക്ക്​ ലോഗിൻ ചെയ്ത്​ പ്രവേശിച്ചുകൊണ്ടായിരുന്നു പങ്കാളിത്തം.


ജാമിർ, സുബീഷ്​ വാസുദേവൻ, ലബീബ്​ അലി, അജാസ്


ഖത്തർ റെയിലി​ൽ ചീഫ്​ കൺട്രോളറായി ജോലിചെയ്യുന്ന അജാസ്​ കഴിഞ്ഞ ഏതാനും വർഷങ്ങളായി ഖത്തറിന്‍റെ ഫുട്​ബാൾ തുടിപ്പുകൾക്കൊപ്പമുണ്ട്​. ക്ലബ്​ ലോകകപ്പുകളും അറബ്​ കപ്പു​മായി കാൽപന്തുകളിയുടെ ആവേശം സമൂഹമാധ്യമങ്ങളിലൂടെ ലോകത്തെങ്ങും എത്തിക്കുന്ന ആലുവ സ്വദേശി 2008ലാണ്​ ഫാൻ മൂവ്​മെന്‍റിൽ അംഗമാവുന്നത്​. ഖത്തർ സർവകലാശാലയിൽ റിസർച്​​ അസിസ്റ്റന്‍റായി പ്രവർത്തിക്കുന്ന ലബീബും അറബ്​ കപ്പിലും മറ്റുമായി വളന്‍റിയർ കുപ്പായത്തിൽ സജീവമായുണ്ട്​. ഖത്തർ ലോകകപ്പിന്‍റെ ഫാൻ ലീഡർ നെറ്റ്​വർക്കിൽ അംഗമായ ജാമിറാണ്​ ഇവരിൽ ഏറ്റവും ആദ്യം ഫാൻ മൂവ്​മെന്‍റിലും അംഗമായത്​. ഇന്ത്യയിലെയും യു.എ.ഇയിലെയും ഫുട്​ബാൾ മത്സരങ്ങളുമായി ബന്ധപ്പെട്ട വിഡിയോ നിർമാണവും വിശേഷങ്ങൾ പങ്കുവെക്കലുമായി ഫിഫ പ്ലാറ്റ്​ഫോമുകളിൽ സജീവമാണ്​ കടുത്ത ചെൽസി ആരാധകനായ ജാമിർ. കഴിഞ്ഞ അറബ്​ കപ്പിനിടെ ഖത്തറിന്‍റെ പ്രത്യേക അതിഥികളായെത്തിയ 44 ഫാൻ നെറ്റ്​വർക്​ അംഗങ്ങളിൽ ഏക മലയാളിയായും ജാമിർ ഉണ്ടായിരുന്നു. ദുബൈയിൽ അക്കൗണ്ടന്‍റായി ജോലിചെയ്യുകയാണ്​ ഇദ്ദേഹം. സമൂഹ മാധ്യമങ്ങളിൽ കളിയെഴുത്തുകാരനായ സുബീഷ്​ വാസുദേവനും ഫിഫ പ്ലാറ്റ്​ഫോമുകളിൽ എഴുത്തുകളുമായി സജീവമാണ്​. നിലവിൽ അബൂദബിയിൽ ഡിസൈനറായാണ്​ ജോലിചെയ്യുന്നത്​.

Show Full Article
TAGS:doha Malayalee Best FIFA Best Venue 
News Summary - 'Malayalee Best' at FIFA Best Venue
Next Story