റമദാനിലെ ക്ഷേമപ്രവർത്തനങ്ങൾക്ക് 23 ലക്ഷം റിയാൽ നീക്കിവെച്ച് മലബാർ ഗോള്ഡ് ആൻഡ് ഡയമണ്ട്സ്
text_fields
ദോഹ: പ്രമുഖ ജ്വല്ലറി റീട്ടെയില് ബ്രാന്ഡായ മലബാര് ഗോള്ഡ് ആൻഡ് ഡയമണ്ട്സ് റമദാന് മാസത്തില് ജീവകാരുണ്യ പ്രവർത്തനങ്ങളുമായി സജീവമാകുന്നു. ഇഫ്താര് ഭക്ഷണക്കിറ്റുകൾ വിതരണം ചെയ്യുന്നതിനായി ഗ്രൂപ് 23 ലക്ഷം ഖത്തർ റിയാൽ ഇത്തവണ നീക്കിവെക്കുന്നതായി മാനേജ്മെന്റ് അറിയിച്ചു. 13 രാജ്യങ്ങളില് വര്ഷം മുഴുവനും നടത്തുന്ന ഇ.എസ്.ജി ഉദ്യമങ്ങള്ക്ക് പുറമേയാണ് ഇത്.
റമദാനിൽ കുടുംബങ്ങള്ക്കും വ്യക്തികള്ക്കും ഇഫ്താര് ഭക്ഷണവും കിറ്റുകളും വിതരണം ചെയ്യും. ഇതിനായി എംബസികള്, അതോറിറ്റികള്, എന്ജി.ഒകള്,സംഘടനകള് എന്നിവയുമായി സഹകരിക്കും. യു.എ.ഇ, സൗദി അറേബ്യ, ബഹ്റൈന്, ഖത്തര്, ഒമാന്, കുവൈത്ത്, മലേഷ്യ, സിംഗപ്പൂര്, യു.എസ്.എ, യു.കെ, കാനഡ, ആസ്ട്രേലിയ എന്നിവിടങ്ങളിലായി ഈ വര്ഷം 180,000ൽ അധികം ഇഫ്താര് കിറ്റുകള് വിതരണം ചെയ്യും.
ഖത്തറില് അൽ വക്റ, വുഖൈര്, ഷഹാനിയ, ജാബിയ, അല് ഖോര്, മര്ഖ്യ എന്നിവിടങ്ങളിലെ തൊഴിലാളികള്ക്കിടയില് ഇഫ്താര് ഭക്ഷണം വിതരണം ചെയ്യും. ഖത്തര് സ്പര്ശം, യൂത്ത് ഫോറം, കള്ചറല് ഫോറം, സംസ്കൃതി, ഐ.സി.ബി.എഫ്, ഫോക്കസ് ഖത്തര് എന്നിവയുമായി സഹകരിച്ചാണ് ഭക്ഷണ വിതരണം നടത്തുന്നത്.
സാമൂഹിക ക്ഷേമ ഉദ്യമങ്ങള് മലബാര് ഗ്രൂപ്പിന്റെ പ്രധാന ലക്ഷ്യമാണെന്നും ഇത് ഓരോ വര്ഷവും കൂടുതല് സജീവമായി തുടരുന്നതായും മലബാര് ഗ്രൂപ് ചെയര്മാന് എം.പി.അഹമ്മദ് പറഞ്ഞു. ക്ഷേമപ്രവര്ത്തനങ്ങള്ക്ക് സ്ഥാപനത്തിലെ മുഴുവന് ടീമിന്റെയും സജീവമായ പങ്കാളിത്തമുണ്ടെന്ന് മലബാര് ഗ്രൂപ് വൈസ് ചെയര്മാന് കെ.പി.അബ്ദുല് സലാം പറഞ്ഞു.
എല്ലാവരുടെയും വളര്ച്ച ഉറപ്പാക്കുക എന്ന നയത്തിന്റെ ഭാഗമായാണ് സാമൂഹിക ശാക്തീകരണ ഉദ്യമങ്ങള് മുന്നോട്ടുപോകുന്നതെന്ന് മലബാര് ഗോള്ഡ് ആൻഡ് ഡയമണ്ട്സ് ഇന്റര്നാഷനല് ഓപറേഷന്സ് മാനേജിങ് ഡയറക്ടര് ഷംലാല് അഹമ്മദ് പറഞ്ഞു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.