ലുസൈൽ ഒരുങ്ങി; ഉദ്​ഘാടനം ഉടൻ

​ദോഹ: ലോകകപ്പിന്​ പന്തുരുളാനുള്ള ദിനങ്ങൾ കുറഞ്ഞ്​ വരവെ ഫൈനൽ വേദിയായ ലുസൈൽ ഐക്കണി സ്​റ്റേഡിയവും മത്സര സജ്ജമാവുന്നു. നിർമാണ പ്രവൃത്തികളെല്ലാം പൂർത്തിയായ ലുസൈൽ സ്​റ്റേഡിയം അധികം വൈകാതെ ഉദ്​ഘാടനം ചെയ്യുമെന്ന്​ പ്രദേശിക സംഘാടകരായ സുപ്രീം കമ്മിറ്റി ഫോർ ഡെലിവറി ആൻഡ്​ ലെഗസി അറിയിച്ചു. നവംബർ 21ന്​ കിക്കോഫ്​ കുറിക്കുന്ന ലോകകപ്പിന്‍റെ മറ്റ്​ ഏഴ്​ വേദികളും ഇതിനകം മത്സരങ്ങൾകൊണ്ട്​ സജീവമായതാണ്​. ഏറ്റവും കൂടുതൽ ഇരിപ്പിട സൗകര്യവും, ഫൈനൽ ഉൾപ്പെടെ പ്രധാന മത്സരങ്ങളുടെ വേദിയുമായ ലുസൈൽ സ്​റ്റേഡിയത്തിൽ മാത്രമാണ്​ ഇനി പന്തുരുളാനുള്ളത്​.

ലോകകപ്പിന്​ 287 ദിനം ബാക്കിനിൽക്കെ എല്ലാ സ്​റ്റേഡിയങ്ങളും പൂർണമായും മത്സര സജ്ജമായതായി സുപ്രീം കമ്മിറ്റി ഡെപ്യൂട്ടി ഡയറക്ടർ ജനറൽ ഖാലിദ്​ അൽ മൗലവി അറിയിച്ചു. ലുസൈൽ സ്​റ്റേഡിയത്തിന്‍റെ ഉദ്​ഘാടന പ്രഖ്യാപനം വൈകാതെ നടക്കും. 'ഒമ്പതു മാസത്തിലേറെ സമയം മുന്നിലിരിക്കെ ലോകകപ്പിന്‍റെ എല്ലാ വേദികളും മത്സര സജ്ജമായെന്ന്​ പ്രഖ്യാപിക്കുന്നതിൽ അഭിമാനമുണ്ട്​. ലുസൈൽ സ്​റ്റേഡിയത്തിന്‍റെ ഉദ്​ഘാടനം നിശ്ചയിച്ചിട്ടില്ല. എന്നാൽ, എല്ലാ നിർമാണ പ്രവർത്തനങ്ങളും പൂർത്തിയാക്കി ഏത്​ സമയവും ഉദ്​ഘാടനത്തിന്​ സജ്ജമായി കഴിഞ്ഞു. വൈകാതെ സ്​റ്റേഡിയം കാൽപന്ത്​ ആരാധകർക്കായി തുറന്നുനൽകാൻ കഴിയും. സ്​റ്റേഡിയവും, അതുമായി ബന്ധപ്പെട്ടതുമായ മുഴുവൻ അടിസ്ഥാന സൗകര്യ നിർമാണവും പൂർത്തിയായി ' -ലോകകപ്പ്​ യോഗ്യത നേടിയ ടീമുകളുടെ ​പതാക ഉയർത്തൽ ചടങ്ങിൽ പ​ങ്കെടുത്താണ്​​ ഖാലിദ്​ അൽ മൗലവി ഇക്കാര്യം പറഞ്ഞത്​.

2026 ലോകകപ്പിന്‍റെ സംയുക്​ത ആതിഥേയരായ കാനഡ, അമേരിക്ക, മെക്സികോ എന്നീ മൂന്ന്​ രാജ്യങ്ങളും 'കോൺകകാഫ്​' മേഖലയിൽ നിന്നും ഖത്തറിലേക്ക്​ യോഗ്യത നേടുന്നത്​ സ്വാഗതാർഹമാണെന്ന്​ അദ്ദേഹം പറഞ്ഞു. അടുത്ത ലോകകപ്പിന്‍റെ ആതിഥേയർ എന്ന നിലയിൽ അവരുടെ സാന്നിധ്യം ഖത്തറിനും, ഖത്തറിന്‍റെ ഒരുക്കങ്ങൾ അറിയാനും അനുഭവിക്കാനും അവർക്കുമുള്ള അവസരമായി ലോകകപ്പ്​ മാറുമെന്നും അദ്ദേഹം വ്യക്​തമാക്കി.

കഴിഞ്ഞ നവംബർ 30 മുതൽ ഡിസംബർ 18 വരെ നടന്ന ഫിഫ അറബ്​ കപ്പ്​ മത്സരങ്ങളോടെ ഖത്തറിന്‍റെ മുഴുവൻ സംവിധാനങ്ങളുടെയും ട്രയൽ റൺ പൂർത്തിയാക്കിയിരുന്നു. ലുസൈൽ സ്​റ്റേഡിയവും ഖലീഫ ഇന്‍റർനാഷനൽ സ്​റ്റേഡിയവും ഒഴികെ ആറ്​ വേദികളിലും മത്സരങ്ങൾ നടന്നു.

ഉദ്​ഘാടന മത്സരവേദിയായ അൽബെയ്ത്​ സ്​റ്റേഡിയം, റാസ്​ അബൂഅബൂദിലെ കണ്ടെയ്​നർ സ്​റ്റേഡിയം എന്നിവയുടെ ഉദ്​ഘാടനവും അറബ്​ കപ്പിനിടെ നടന്നു.