ഫലസ്​തീനികൾക്കെതിരായ ഇസ്രായേൽ അതിക്രമം: അറബ്​ ലീഗ്​ അസാധാരണ മ​ന്ത്രിതല യോഗം ചൊവ്വാഴ്​ച

ദോഹ: ഫലസ്​തീനികൾക്കെതിരായ ഇസ്രാ​യേൽ അതിക്രമം ചർച്ച ചെയ്യാൻ ഖത്തറിൻെറ അധ്യക്ഷതയിൽ അറബ്​ ലീഗിൻെറ അസാധാരണ മ​ന്ത്രിതല യോഗം. ചൊവ്വാഴ്​ചയാണ്​ ഓൺലൈൻയോഗം നടക്കുകയെന്ന്​ അറബ്​ലീഗ്​ ജനറൽ സെക്ര​ട്ടേറിയറ്റ്​ അറിയിച്ചു. അൽ ഖുദുസിൽ നടക്കുന്ന ഇസ്രായേൽ ആക്രമണങ്ങൾ ചർച്ച ചെയ്യനാണിത്​. അറബ്​ലീഗ്​ രാജ്യങ്ങളു​െട വിദേശകാര്യമന്ത്രിമാർ പ​ങ്കെടുക്കും. ഫലസ്​തീൻെറ അഭ്യർഥനപ്രകാരമാണ്​ യോഗം.

സ്​ഥിരംക്ഷണിതാക്കളുടെ യോഗത്തിന്​ പകരം ഫലസ്​തീനിലെ നിലവിലെ സഹാചര്യം കണക്കിലെടുത്താണ്​ വിദേശകാര്യമന്ത്രിമാർ പ​ങ്കെടുക്കുന്ന തലത്തിലേക്ക്​ യോഗം മാറ്റിയതെന്ന്​ അറബ്​ ലീഗ്​ അസിസ്​റ്റൻറ്​ സെക്രട്ടറി ജനറൽ ഹസം സാകി പറഞ്ഞു. മസ്​ജിദുൽ അഖ്​സയിൽ റമദാനിലെ അവസാനവെള്ളിയാഴ്​ച നമസ്​കരിക്കുകയായിരുന്ന വിശ്വാസികൾക്ക്​ നേരെയും ശൈഖ്​ ജർറാഹ്​ പ്രദേശത്തുകാർക്കുനേരെയുമുള്ള ഇസ്രായേൽ പട്ടാളത്തിൻെറ നിരന്തര ആക്രമണത്തിൻെറ പശ്​ചാത്തലത്തിലാണിത്​. ഖുദുസിനെയും ജൂതവത്​കരിക്കാനുള്ള ആസൂത്രിക നീക്കത്തിൻെറ ഭാഗമായാണിത്​. നിയമാനുസൃതമായ ഭൂപ്രദേശഅതിർത്തികളും ചരിത്രപരമായ ഫലസ്​തീൻെറ നിലയും മാറ്റാനാണ്​ ഇസ്രായേലിൻെറ അതിക്രമങ്ങൾ. അറബ്​ ലീഗ്​ യോഗത്തിൽ അൽ ഖുദുസിലെ മുസ്​ലിംകൾക്കുനേരെയും ക്രിസ്​ത്യാനികൾക്കുനേരെയുമുള്ള ഇസ്രായേൽ കുറ്റകൃത്യങ്ങളും ​ൈകയേറ്റവും വിദേശകാര്യമന്ത്രിമാർ ചർച്ച ചെയ്യും.

വിശുദ്ധ റമദാനിൽ നമസ്​കരിക്കുന്ന വിശ്വാസികൾക്ക്​ നേരെയുണ്ടാകുന്ന ക്രൂരതയും പ്രത്യേകം ചർച്ചയാക്കും. ഖുദുസിലെയും ശൈഖ്​ ജർറായിലെയും ഫലസ്​തീനികളുടെ വീടുകളും സ്​ഥലങ്ങളും കൈവശപ്പെടുത്താനാണ്​ ഇസ്രായേൽ ഇപ്പോഴുള്ള ആക്രമണങ്ങൾ നടത്തുന്നത്​. മുസ്​ലിംകളുടെ വിശുദ്ധ സ്​ഥലം ഒഴിപ്പിക്കുകയും അവി​െട ഇസ്രായേലികളെ കുടിയിരുത്താനും​ ലക്ഷ്യമിട്ടാണ്​ ഇതെന്നും ഹസം സാകി പറഞ്ഞു. ഫലസ്​തീനിലെ ഏറ്റവും പുതിയ സംഭവവികാസങ്ങളുടെ പശ്ചാത്തലത്തിൽ പ്രസിഡൻറ് മഹ്മൂദ് അബ്ബാസുമായി അമീർ ശൈഖ് തമീം ബിൻ ഹമദ് ആൽഥാനി കഴിഞ്ഞ ദിവസം ഫോൺ സംഭാഷണം നടത്തിയിരുന്നു.

ഫലസ്​തീനികളുടെ നിയമപരമായ അവകാശങ്ങൾ പുനസ്​ഥാപിക്കുന്നതിനായുള്ള ശ്രമങ്ങളിൽ ഖത്തറിെൻറ പൂർണ പിന്തുണ അമീർ ശൈഖ് തമീം വീണ്ടും ഫലസ്​തീൻ പ്രസിഡൻറിന് ഉറപ്പുനൽകിയിരുന്നു. ഫലസ്​തീനികളുടെ മതപരമായ അവകാശങ്ങൾ സംരക്ഷിച്ച്​ 1967ലെ അതിർത്തി പ്രകാരം ഖുദ്സ്​ കേന്ദ്രമാക്കി സ്വതന്ത്ര പരമാധികാര ഫലസ്​തീൻ രാഷ്​ട്രമുൾപ്പെടെയുള്ളവ നൽകണമെന്നതാണ്​ ഖത്തറിൻെറ എക്കാലത്തെയും നിലപാട്​.