ഇസ്രായേൽ–ഹമാസ്​ വെടിനിർത്തൽ, നിർണായകമായി ഖത്തർ നിലപാടുകൾ

ദോഹ: നീണ്ട 11 ദിവസത്തിന്​ ശേഷം ഇസ്രായേലും ഹമാസും വെടിനിർത്തിയതോടെ സമാധാനപ്രേമികൾക്ക്​ താൽക്കാലിക ആശ്വാസം. തുടക്കംമുതൽ തന്നെ ഖത്തറിൻെറ നേതൃത്വത്തിലും നടന്ന വിവിധ നീക്കങ്ങളും വെടിനിർത്തലിലേക്ക്​ നീങ്ങിയതിൽ നിർണായകഘടകമായി​. ഇസ്രായേൽ ആക്രമണങ്ങളിൽ ഇതുവരെ 65 കുട്ടികൾ ഉൾപ്പെടെ 232 ഫലസ്​തീനികൾ കൊല്ലപ്പെട്ടതായാണ്​ കണക്ക്​. റോക്കറ്റാക്രമണത്തിൽ ഇസ്രായേലിൽ രണ്ടു കുട്ടികൾ ഉൾപ്പെടെ 12 പേരും കൊല്ലപ്പെട്ടിട്ടുണ്ട്​. ഇതിൽ മലയാളി നഴ്​സായ സൗമ്യയും ഉൾ​െപ്പടും. പ്രശ്​നത്തിൻെറ തുടക്കം മുതൽ ഖത്തറുമായി വിവിധ രാഷ്​ട്ര നേതാക്കൾ ഇട​െപട്ടിരുന്നു.

ഇസ്രായേൽ ആക്രമണം കടുപ്പിച്ച സാഹചര്യത്തിൽ വിവിധ രാഷ്​ട്ര നേതാക്കൾ ഖത്തറുമായി ബന്ധപ്പെട്ടിരുന്നു​. ഖത്തർ വിദേശകാര്യമ​ന്ത്രി ശൈഖ്​ മുഹമ്മദ്​ ബിൻ അബ്​ദുറഹ്​മാൻ ആൽഥാനിയെ വിവിധ ​രാഷ്​ട്രനേതാക്കൾ ഫോണിൽ വിളിച്ച്​ കാര്യങ്ങൾ വിലയിരുത്തുകയും ചെയ്​തു. ജർമനിയുടെ വിദേശകാര്യമന്ത്രി ഹെയ്​കു മാസ്, ഇന്തോനേഷ്യൻ വിദേശകാര്യമന്ത്രി റെറ്റ്​നോ മർസുദി, ജോർഡൻ അധികൃതർ എന്നിവർ ശൈഖ്​ മുഹമ്മദ്​ ബിൻ അബ്​ദുറഹ്​മാൻ ആൽഥാനിയുമായി ഫോണിൽ സംസാരിച്ചിരുന്നു.

ഖത്തർ ശൂറാ കൗൺസിൽ സ്​പീക്കർ അഹ്​മദ്​ ബിൻ അബ്​ദുല്ല ബിൻ സെയ്​ദ്​ ആൽമഹ്​മൂദുമായി തുർക്കി അസംബ്ലി സ്​പീക്കർ മുസ്​തഫ സെൻതോപ്​ ഫോണിൽ സംസാരിച്ച്​ കാര്യങ്ങൾ വിലിയിരുത്തിയിരുന്നു. ഫലസ്​തീൻ വിഷയത്തിൽ ഖത്തറിൻെറ നിലപാടിൽ ഒരടി പിന്നോട്ടില്ലെന്നും സ്വതന്ത്ര പരമാധികാര ഫലസ്​തീൻ രാഷ്​ട്രമെന്ന ഫലസ്​തീനികളുടെ അവകാശങ്ങൾ സംരക്ഷിക്കുന്നതിനുള്ള ശ്രമങ്ങൾക്ക് പിന്തുണ ഉണ്ടാകുമെന്നും​ അമീർ ശൈഖ്​ തമീം ബിൻ ഹമദ്​ ആൽഥാനിയും വ്യക്തമാക്കിയിരുന്നു.

ഫലസ്​തീനികളുടെ മതപരമായ അവകാശങ്ങൾ അംഗീകരിച്ച്​ 1967ലെ അതിർത്തി പ്രകാരം ഖുദ്സ്​ കേന്ദ്രമാക്കി സ്വതന്ത്ര പരമാധികാര ഫലസ്​തീൻ രാഷ്​ട്രമുൾപ്പെടെയുള്ളവ നൽകണമെന്നതാണ്​ ഖത്തറിൻെറ എക്കാലത്തെയും നിലപാട്​.ഇസ്രായേൽ തുടരുന്ന അധിനിവേശവും ജൂതവത്​കരണം വ്യാപിപ്പിക്കാനുള്ള നീക്കവുമാണ്​ നിലവിലുള്ള സ​​ംഘർഷങ്ങളുടെ കാരണമെന്നും ഖത്തർ വിവിധ വേദികളിൽ വെട്ടിത്തുറന്ന്​ പറഞ്ഞിരുന്നു. ഫലസ്​തീനികളുടെ വംശഹത്യയാണ്​ നടക്കുന്നതെന്നും വിദേശകാര്യമന്ത്രി നിലപാട്​ വ്യക്​തമാക്കിയിരിക്കുന്നു.

ഇസ്രായേൽ ആക്രമണം അവസാനിപ്പിക്കാൻ അടിയന്തരനടപടികൾ വേണമെന്ന്​ ഖത്തർ ഐക്യരാഷ്​ട്രസഭയിൽ കഴിഞ്ഞദിവസം ആവശ്യപ്പെട്ടിരുന്നു. മിഡിൽ ഇൗസ്​റ്റിലെ പ്രത്യേകസാഹചര്യത്തിൻെറ പശ്ചാത്തലത്തിൽ ചേർന്ന യു.എൻ. അടിയന്തര ജനറൽ അസംബ്ലിയിൽ ഉപപ്രധാനമന്ത്രിയും വിദേശകാര്യമന്ത്രിയുമായ ശൈഖ്​ മുഹമ്മദ്​ ബിൻ അബ്​ദുറഹ്​മാൻ ആൽഥാനിയാണ്​ ഇക്കാര്യം ആവശ്യപ്പെട്ടത്​.

വെള്ളിയാഴ്​ച പ്രാദേശികസമയം പുലർച്ച രണ്ടുമണിയോടെയാണ്​ ഇരുകൂട്ടരും പ്രഖ്യാപിച്ച വെടിനിർത്തൽ നിലവിൽവന്നത്​. പരസ്​പരധാരണയോടെയാണ്​ ഇതെന്ന്​ ഇരുകൂട്ടരും വ്യക്​തമാക്കിയിരുന്നു. ഈജിപ്​ത്​, ഖത്തർ, ഐക്യരാഷ്​ട്രസഭ എന്നിവയുടെ മധ്യസ്​ഥ ശ്രമങ്ങളാണ്​ ​െവടിനിർത്തലിലേക്ക്​ അടുപ്പിച്ചതെന്ന്​ റോയി​ട്ടേഴ്​സ്​ അടക്കമുള്ള അന്താരാഷ്​ട്ര മാധ്യമങ്ങൾ റിപ്പോർട്ട്​​ ചെയ്​തു.

വർഷങ്ങളായി ഗസ്സയിൽ ഖത്തറിൻെറ നേതൃത്വത്തിൽ ഗസ്സ പുനർനിർമാണ കമ്മിറ്റി സജീവമായി പ്രവർത്തിക്കുന്നുണ്ട്​. വിവിധ കാലങ്ങളിൽ ഇസ്രായേൽ അതിക്രമങ്ങളിൽ തകർന്ന ഗസ്സയുടെ സമൂലനവീകരണം ലക്ഷ്യമിട്ടാണ്​ കമ്മിറ്റി പ്രവർത്തിക്കുന്നത്​. ഇസ്രായേലിൻെറ നരമേധത്തിനെതിരായ ഗൾഫിലെ ചലനങ്ങളുടെ കേന്ദ്രമായി ഖത്തർ മാറിയിരുന്നു. കഴിഞ്ഞ ശനിയാഴ്​ച രാത്രി ഫലസ്​തീന്​ ഐക്യദാർഢ്യവുമായി ആയിരങ്ങളാണ്​ ഖത്തറിൽ ഒത്തുകൂടിയത്​. ഇന്ത്യക്കാരടക്കം നൂറുകണക്കിനാളുകളാണ്​ ബാനറുകളും ഫലസ്​തീൻ കൊടികളുമേന്തി ഇമാം അബ്​ദുൽ വഹാബ്​ പള്ളി (ഗ്രാൻഡ്​ മോസ്​ക്​) പരിസരത്ത്​ സംഗമിച്ചത്​.

വൈകീട്ട്​ ഏഴിന്​ തുടങ്ങിയ ഐക്യദാർഢ്യ സംഗമം രാത്രി പത്തു വരെ നീണ്ടു. നൂറുകണക്കിന്​ ഖത്തരികളും വിദേശികളും പ​ങ്കെടുത്തു. ഹമാസിൻെറ രാഷ്​ട്രീയകാര്യ മേധാവി ഡോ. ഇസ്​മായിൽ ഹനിയ്യയും ആഗോള മുസ്​ലിം പണ്ഡിതസഭ ജനറൽസെക്രട്ടറി അലി അൽഖുറദാഇ ഉൾപ്പെടെയുള്ളവരും പ​ങ്കെടുത്തിരുന്നു.

ഖത്തർ റെഡ്​ക്രസൻറ്​ സൊസൈറ്റിയുടെ ഗസ്സയിലെ ആസ്ഥാനത്തിനു​ നേരെയും ഇസ്രായേല്‍ ഷെല്ലാക്രമണം നടത്തിയിരുന്നു. റെഡ്​ക്രസൻറ്​ സൊസൈറ്റി വഴി അനേകം ലോകരാജ്യങ്ങൾക്കാണ്​ വിവിധ സഹായങ്ങൾ ഖത്തർ എത്തിക്കുന്നത്​. തങ്ങളുടെ ആസ്​ഥാനം നിലനിന്ന കെട്ടിടം തകർത്തതിന്​ ശേഷവും ഫലസ്​തീനിൽ ജീവകാരുണ്യ ആരോഗ്യസേവനങ്ങൾ നൽകുന്നത്​ തുടരുമെന്നാണ്​ ഖത്തർ റെഡ്​ക്രസൻറ്​ സൊസൈറ്റി വ്യക്​തമാക്കിയിരുന്നത്​.

ഗസ്സയിൽ ഇസ്രായേൽ നടത്തുന്ന നരമേധത്തിൻെറ കൃത്യമായ വിവരങ്ങൾ ലോകത്തിനു​ മുന്നിൽ എത്തിക്കുന്നത്​ ദോഹ ആസ്​ഥാനമായുള്ള 'അൽ ജസീറ' ചാനൽ ആണ്​.ഗസ്സ സിറ്റിയിലെ അൽജസീറ റിപ്പോർട്ടർ യുംന അൽസെയ്​ദ്​ അതിസാഹസികമായാണ്​ ബോംബ്​ ആക്രമണത്തിൻെറ തൽസമയ റിപ്പോർട്ടിങ്​ നടത്തുന്നത്​. ഇവർ വാർത്ത റിപ്പോർട്ട്​ ചെയ്യുന്നതിനിടെ ഇസ്രായേലിൻെറ ബോംബുകൾ തൊട്ടടുത്ത്​ പതിച്ചിരുന്നു. ഇതിൻെറ ശബ്​ദവും തുടർന്നുള്ള സംഭവങ്ങളും ദൃശ്യങ്ങളിൽ കാണാമായിരുന്നു.

കഴിഞ്ഞ ദിവസം ചാനലിൻെറയും അസോസിയേറ്റഡ്​ പ്രസ്​ (എ.പി) ന്യൂസ്​ ഏജൻസിയുടേയും ഗസ്സയിലെ ഓഫിസുകളും ഇസ്രായേൽ തകർത്തിരുന്നു. ഇസ്രായേൽ ആക്രമണത്തിൻെറ ദൃശ്യങ്ങൾ ലോകത്തിനു മുന്നിൽ എത്തിക്കുന്നതിനാൽ അൽജസീറക്ക്​ യു ട്യൂബ്​ വിലക്ക്​ ഏർപ്പെടുത്തിയിരുന്നു. എന്നാൽ പിന്നീട്​ വിലക്ക്​ നീക്കുകയായിരുന്നു.